被告葉振輝，你係被控一項販運危險藥物罪，違反香港法例第134章《危險藥物條例》第4（1）（a）同埋（3）條。你喺裁判官席前認罪，咁認咗罪之後就交付嚟高等法院原訟庭係判刑嘅。
咁睇番你承認咗嘅案情。承認案情就顯示，有一隊嘅警方人員就喺2015年3月2號嗰日，喺元朗區就進行反毒品嘅行動，當時見到被告人你喺丹桂路50號丹桂軒第2座出面對開就係出現，咁當時就截停咗你，當時話你係形跡可疑嘅。咁截停咗你之後，就搜過你身，就冇發現任何嘅呢個違法物品。咁但係其實警方喺較早前已經攞咗一張搜查令嘅，就係搜查你嘅住所，咁喺當時拉咗你，即係截停你之後，搵唔到嘢之後，就帶咗你上去你嘅屋企度搜，咁就即係憑呢一個嘅搜查令，嗰個地方就其實喺番丹桂軒第2座嘅，2樓B座，咁入咗去之後，即係用你嗰個鎖匙開咗之後，就去開始「抄」，咁搜查之後就發覺，即係喺你個住所入面，就搵到有一啲懷疑嘅危險藥物，同埋有可以再封口嘅膠袋，同埋有呢個電子磅，同埋又有羮咁樣，咁就拉咗被告你，就話你係販運危險藥物。
咁當時喺警誡之下，你就承認，你係因為等錢使，幫人送「K仔」嘅。
咁返到去元朗警署，就有繼續搜你身，當時搜你身之後，就喺你嘅身度搵到一啲嘅物品，其中包括係有現金1,510鈫同埋有一個諾基亞嘅手提電話。
咁警方就同你進行一個會面紀錄，就係錄影嘅形式，咁當時你就講咗嗰件事件到底係點，簡單啲嚟講就話，你應承咗就幫人做帶家，帶毒品，咁就係有個叫做阿強嘅人，就介紹你咁做嘅，咁呢個阿強亦都將一個呢個手提電話，諾基亞電話，係提供畀你嗰個人嚟嘅，咁你就話，你就係即係有一日喇，阿強就搵你，咁然後就喺阿強度攞到嗰個毒品、攞到嗰個電子磅、同埋嗰個匙羮，咁就拎咗返屋企，擠喺屋企度。咁後屘就2月嘅時候，就曾經透過阿強就送過一次貨，咁然後就未收到錢嘅，跟住就拉咗，咁而1,510鈫就係你自己嘅積蓄嚟，即係換言之就唔係話販毒、幫人帶毒而賺到嘅金錢。
咁講番啲毒品，拎咗去化驗。化驗之後就發現，係內含448克氯胺酮（即係「K仔」）嗰個嘅粉末，個粉末嘅重量即係655.10克嘅。咁有個嘅市值，就係77,302鈫。咁呢個就係你承認咗嘅案情。
咁講你嘅背景同埋求情嘅陳詞，24歲，未婚嘅，就1997年就嚟香港住，即係喺大陸出世，讀書就讀到去中五嘅程度，曾經喺一個賣壽司嘅餐廳水吧嗰度做工作，咁就由2015年嘅年頭開始已經係失業。就先前係冇刑事紀錄嘅。
咁你嘅代表律師林大律師，就喺求情嘅時候同我講就話，其實你嚟咗之後，即係7歲嚟咗香港之後，係14歲嗰年爸爸就中風過咗身，咁自從爸爸過咗身，喺以往嗰10年，因為而家你24歲吖嘛，以往嗰十年，其實媽媽就一路都係有呢一個抑鬱症，就亦都將一個你媽媽嘅醫療報告係畀我睇，咁亦都係睇到喺過往十年有呢一個抑鬱症嘅，同埋即係其他嘅詳情，我私隱嘅問題，我唔喺呢度講。
咁而林大律師亦都向本席呈交咗一封你本人寫嘅信，表達到你嗰個悔意，同埋就希望可以個刑期係較短，等你早啲返去社會度做人。咁另一封就係你媽媽幫你寫嘅求情信，咁你媽媽一來就怪責佢自己，即係話佢自己教得你唔好，所以你犯咗呢件事，亦都係要求本席畀個機會你嘅。咁你媽媽除咗佢自己寫封信之外，就將一封係你寫畀佢嘅信都連埋畀本席睇，呢一封信就睇到你向媽媽道歉嗰個心意係點樣、呢件事你點樣後悔法。咁另外，除咗呢兩封信之外，仲有一封信就係你哋家庭入面有一位朋友，就係一位姓賴嘅女士，就係講--即係亦都係幫你求情，就係話你點樣誤交損友，犯咗呢件事。咁最主要其實三封信嗰個目的都係希望本席盡量輕判嘅。
咁林大律師就強調，被告你係認罪，同埋你係首次犯事嘅。咁佢亦都話，其實被告你都知呢一類嘅案件都係涉及販運危險藥物嘅案件，係有量刑嘅指引，咁都只係要求本席盡量喺嗰個範疇採納一個較輕嘅判刑咁解啫。咁都事實上真係，販運危險藥物係非常之嚴重嘅罪行，一個犯人係經過公訴罪行而定罪，最高嗰個刑罰係可以去到終身監禁，同埋呢個罰款去到$5,000,000嘅。咁呢件案件因為涉及係氯胺酮，氯胺酮喺上訴庭一件叫做許守城嘅案件就頒下咗量刑指引，咁就係關於話，販運危險藥物，係販運呢個氯胺酮，嗰個量刑應該係點樣做。咁你而家呢件案件涉及就係448克，咁就係落呢個許守城嗰件案件入面300至600呢個範疇，咁而300至600嘅範疇，就呢個上訴庭已經講咗，呢個起點係要喺9至12年之間嘅，咁當然本席就要考慮，喺9至12年之間點樣去選擇一個恰當嘅量刑起點。咁最重要嘅就係考慮呢件案件嘅案情，頭先都已經講咗，你係喺咩嘢嘅情況之下去犯呢件案件。咁亦都考慮到成件案件嗰個案情嚟計，就本席認為你作為呢一個帶家嗰個做法，同埋就係--即係個恰當量刑起點應該就係9年。
咁亦都因為呢件案件，因為你唔係重犯，即係仲係初犯，亦都冇其他我認為係需要將呢一個9年加重嘅因素，咁所以就係用9年嚟做量刑起點。你認罪，亦都係好早認罪，一定係一個及時嘅認罪，可以得到足足嘅三分之一刑期扣減，即係話個刑期就6年。
本席得悉你媽媽係有呢一個嘅抑鬱症，都好同情你嘅遭遇，但係個問題就係，佢而家嗰個精神嘅狀況，即係你係佢嘅精神支柱，並唔構成一個特別嘅理由係令到本席唔跟呢個指引去判刑，亦都唔構成一個特別嘅理由係話，除咗三分之一嘅刑期扣減之外，再加一啲嘅扣減，就唔構成。咁我只係希望，被告媽媽向前睇，喺呢件事件，即係先前就冇犯過事，咁而家係已經有一個罪名成立咗，同埋需要係坐監，亦都反省到自己做錯咗啲乜嘢，希望媽媽係睇到話個仔已經得到呢個教訓，咁妳話佢6年，老實講，即係嗰個三分一刑期扣減之後得番嗰6年，其實如果你係行為良好，你自己都知道，係唔需要坐6年，其實係早過6年可以出嚟，或者4年已經可以出到嚟，咁你就自己好自為之，媽媽就係希望個仔出番嚟嗰日，係做番一個好人，亦都繼續支持媽媽，咁就唔好去做--媽媽就千祈唔好去做傻事，即係最主要就係呢一啲嘅講法就係，基本上我唔可以因為媽媽係有呢一個情況就係話你要坐輕啲，因為我覺得對個社會要有一個嘅負擔，即係呢個負責，係咪？
咁就呢一個販運危險藥物罪，正式嗰個判刑就係6年。