被告黃明珠係被控一項控罪，販運危險藥物，違反香港法例第134章《危險藥物條例》第4（1）（a）及（3）條。
被告人喺裁判官席前已經係認罪嘅，咁係交付嚟高等法院嘅原訟法庭判刑。
根據被告人承認案情顯示，喺2014年7月24日，當時被告人就喺呢一個羅湖管制站入境大堂度，係畀海關人員截停。咁搜身嘅時候就發覺，喺佢嘅腰部係纏咗八包嘅危險藥物，咁而當時拉咗被告人同埋警誡被告人之下，被告人就話，綁喺佢身上嗰啲就係「K仔」毒品嚟，咁而就係話，有一個男子喺深圳將呢啲毒品交畀佢，叫佢帶番嚟香港，事成之後會有3,000鈫嘅報酬。
咁後來，被告人就係參與一個錄影嘅會面。咁喺錄影會面嘅時候，當被問及話腰上面纏咗嗰啲係乜嘢，咁當時被告人就話唔知係咩嘢嚟嘅，唔肯定係咩嘢嚟嘅。咁而被告人當時其實係有8,000鈫喺身上嘅，佢就解釋嗰8,000鈫係喺賭場贏番嚟嘅。咁而當然到最後，被告人喺裁判官嘅席前，亦都喺本席席前，承認咗嗰啲嘅危險藥物其實就係佢係販毒嘅。咁而驗咗之後，亦都知道係有1.97公斤嘅粉末，而入面包含咗係1.20公斤嘅呢個氯胺酮。咁呢個就係案情。
咁關於被告人嘅背景事實同埋呢個求情陳詞方面，被告人而家就係55歲，冇先前犯罪嘅紀錄。咁佢話，就係話畀呢個警方聽，有一份即係我哋俗稱叫做三世嘅口供，就話係單身，冇職業，同埋亦都唔係一個吸毒者嘅。
代表被告人嘅馬大律師喺求情嘅時候就話畀本席聽，其實喺1979年被告人已經係結咗婚，咁但係不過就喺2007年同先生離咗婚，而當時同即係已經離咗婚呢位先生，其實就生咗有五個仔女嘅，不過喺案發嘅時候就得番一個仔同一個女仲係同被告人一齊住，另外嗰三個已經搬走咗，後屘就先生仲過埋身添，咁過咗身之後，就冇剩低話任何呢個財產係畀被告人或者嗰啲仔女嘅。咁而案發嘅時候，基本上一家三口，被告人、同一個仔、同一個女，就係靠喺綜援度得到嘅4,500鈫一個月嚟過活嘅，因為大啲嗰三個、搬走咗嗰幾個仔女，就冇話畀家用畀被告人嘅，咁而當時被告人嗰個經濟環境方面就係非常之有沉重嘅擔子。而馬大律師幫被告人求情嘅時候亦都話畀我聽，被告人雖然曾經嘗試過去做嘢，係做呢個侍應，但係因為有骨刺嘅情況，所以就唔能夠久站，即係企唔得耐，所以就做唔到。咁另外被告人喺事發嘅時候，亦都有一個身體上有毛病，就係子宮出咗問題，當時就擔心係會病變，可能引致有癌症，而或者係需要做手術。咁就係話，喺咁樣嘅情況之下，就係受到呢一啲不良份子嘅引導，而自己係愚蠢咁樣干犯咗咁嚴重嘅罪行，咁而家被告人嗰個情況據講就係，即係關於子宮嘅情況，就並冇係繼續變壞落去，咁而亦都喺監管嘅期間係繼續由得佢睇醫生，睇住個情況嘅。咁而馬大律師亦都好坦白承認，被告人只不過係將佢點解干犯控罪嗰個背景話畀本席聽，但係佢被告人自己嗰個嘅詳情，即係嗰個背景嘅情況，就並唔係構成令本席可以唔依隨上訴法庭頒下嘅量刑指引嚟判刑。
販運危險藥物係一項非常之嚴重嘅罪行，咁當然就係拉到嘅時候，一定係重判嘅，因為根本上法律上嗰個規定可以判刑終身監禁嘅，咁當然喺呢件案件就唔會終身監禁，但係即係話，法律嘅睇法就係，販運毒品係可以嚴重至去到最高嘅刑罰係終身監禁。
咁喺頭先其實大律師都已經提過，就係一件叫做許守城 Secretary for Justice v Hii Siew Cheng [2009] 1 HKLRD 1嘅案件，就係上訴法庭頒下咗販運氯胺酮嘅量刑指引。咁簡單啲講，因為已經係超過咗1公斤，而家係1.20公斤，咁所以根據嗰個量刑指引，就嗰個量刑起點一定係要喺14年起㗎喇，由14年起嚟計。
咁而另外一件案件就係叫做單松健 [2013] 1 HKLRD 622嘅，係稍後嘅案件，係2011年嘅案件。咁喺嗰件案件，上訴法庭就考慮係多過1公斤嘅氯胺酮，咁講出就係，如果係一公斤至到兩公斤，即係去到兩公斤，可以話，2,000克，咁就會係喺14至18年呢一個考慮量刑起點嘅，就喺單松健嗰度講咗。
咁喺呢件案件，我要考慮嘅就係話一個量刑起點，咁呢個量刑起點就係以初犯，而就即係睇咗個案情，未計呢個減刑因素、又未計加刑因素而達至嘅，咁樣先至叫量刑起點。當然，我考慮呢個量刑起點，係當然以被告人初犯呢一個範疇嚟睇，我都考慮到被告人已經係成55歲喇，先至係首次干犯控罪，所以我就考慮咗呢件案件係點樣喺個管制站度睇到妳帶啲毒品，咁樣呢個詳細嘅情況，我就認為14年嘅量刑起點係啱。咁因為被告人妳係將啲毒品由深圳帶嚟香港，呢一個係構成一個加刑嘅因素，就要將嗰14年係向上調，令到嗰個起點係高咗。
咁我考慮咗一件案件，就叫做Abdallah [2009] 2 HKLRD 437嘅，即係外籍嘅人士。咁嗰件案件就係處理超過1公斤以上嘅呢個海洛英，唔係呢個「K仔」嘅，唔係氯胺酮嘅，嗰件案件係關於海洛英嘅。不過喺嗰件案件，即係其中一樣嘢我認為同呢件案件係有一個關係，就因為嗰件案件講咗，如果嗰個被告人係帶1公斤以上嘅海洛英嚟香港，即係有呢一個跨境嘅性質，就嗰個量刑起點嗰個加刑嘅範疇係唔應該少過兩年。咁當然，我就要考慮到，因為呢件案件涉及嘅就唔係海洛英，係氯胺酮，咁而氯胺酮同海洛英嗰個量刑係有分別嘅，即係氯胺酮嗰個量刑較海洛英為低嘅。咁所以我考慮過之後，我就認為喺呢件案件嚟講，加刑1年係適合嘅。
咁即係話，以14年嘅量刑起點，因為加刑因素再加多1年，變咗喺未減刑之前就係15年。
咁好喇，被告人的確係非常之合作，喺最早可以認罪嘅時候已經認咗罪，咁可以得到足足嘅三分之一刑期扣減。而被告人嘅家境、佢本身嘅情況、佢受到財政上嘅困難，呢啲全部都唔係構成特別嘅理由，令本席可以再係將嗰個刑期嚟遞減嘅。咁變咗以15年呢個量刑起點，減咗三分一之後，嗰個刑期就係10年。
因此，以呢個被告人妳干犯咗被定罪嘅販運危險藥物罪，需要服刑10年。