香港特別行政區 訴 熊家駿

DCCC99/2010

香港特別行政區

區域法院

刑事案件2010年第99號

----------------

----------------

----------------

判刑理由書

----------------

1.  冇任何嘅案例、亦都冇任何相似嘅案例係有呢個判刑嘅標準。換句話說，本席可以用一般嘅判刑嘅法律原則。

2.  長話短說，同你寫求情信嘅人，就話你今次嘅事件係獨立事件，喺你嘅行為嗰度睇唔出--正常行為，睇唔出你會做即係傷人嘅事件，一般寫求情信嘅人都係向法庭講出被告人好處，本席無從同寫求情信嘅人去爭拗，但係肯定佢哋有一樣嘢睇唔到，你自己都睇唔到，就委過於人，你自己情緒不穏，冇錯，係你自己嘅問題，你就推說同人爭執，從你自己嘅表現，你最緊要留意就係你自己頑固，好似買個禮物畀女朋友就好天大嘅恩惠，人哋一定要感激流涕。作供嗰時唔係衝口而出，而係好肯定有咁嘅睇法，我冇「蝦」你個妹、我又冇打佢，咁就等於對佢好。即係換句話講，你嘅人個自私心態係有幾嚴重，呢啲自私心態就好容易就引致悲劇，好似今次對你自己嚟講嘅悲劇，你認為呢位黃志浩先生唔啱，干涉你哋，對佢作出懲罰嘅行動，要令佢受傷害，無論係發洩好、乜都好，你某個程度上，你以為自己係對嘅，對方係錯嘅。呢樣嘢你唔改就遲早會重犯，當然，呢個係我個人意見，根據你律師嘅求情，法庭喺法律上唔可以猜測話你一定會重犯，即係睇你嘅證據有可能，好大可能係唔會重犯。但係唔重犯，一定要處理到自己嘅個人意見，你自己覺得啱其實可能係唔啱，哥哥關心個妹，講多一句說話，某啲好多人都認為係正當，你睇唔到都有可能你冇妹妹，可能唔係設身處地便唔知。

3.  另外一個求情理由就係呢位傷者就已經原諒咗你，咁但係呢啲刑事案就唔係私相授受，但係受害人原諒你亦都係的確係一個好有力嘅求情因素。

4.  本席考慮到呢件案件係特殊，係有些少突發性嘅元素，本席亦都係相信你根本係有控制情緒嘅問題，係咪因為你對自己嘅各樣嘢嘅睇法係太過堅持，抑或係咩嘢原因，法庭唔需要猜測，但係呢啲係你自己個個人嘅情緒問題。所以而家本席盡量輕判你，監禁9個月。