香港特別行政區 訴 林文德

HCCC 462/2016

[2018] HKCFI 549

香港特別行政區

高等法院

原訟法庭

刑事案件2016年第462號

----------------

----------------

------------------------------------------

判刑

以下內容乃法庭數碼錄音謄本

------------------------------------------

官：　

被告人係經審訊之後被裁定兩項販運危險藥物罪罪名成立，被告人現年41歲，佢受教育至中一，曾經任職侍應生同埋廚房學徒，由1994年開始任職果欄，根據審訊時嘅證供，佢後來成為果欄買手，都相當多年時間。

家庭背景方面，佢係已經離咗婚，但係同前妻保持一個密切聯繫，亦都有經常探望女兒。喺審訊嘅時候，我亦都聽到佢有一位年老嘅父親需要佢照顧。

刑事紀錄方面，被告有兩項盜竊罪紀錄，但係就住判刑考慮嚟講，我唔會將佢嘅兩項盜竊罪考慮在內，我會當佢係一個冇案底嘅人士嚟處理。

但係另一方面，佢面對嘅係兩項非常之嚴重嘅罪行，佢嘅家庭背景，喺呢件案嚟講，我冇辦法畀到幾多比重畀佢，因為上訴法庭嘅判刑案例我必須要遵從。對於被告人面對一個將會係唔短嘅刑期，尤其是對佢家人帶嚟嘅影響，本席都非常之難過，但係我亦都需要根據法律去判處佢需要得到嘅刑罰。

喺上訴庭案例Attorney General v Pedro Nel Rojas [1994] 2 HKCLR 69裡面講到，可卡因嘅判刑係會應用到販運海洛英嘅判刑指引。就第一條控罪嚟講，涉及嘅可卡因嘅重量係916克。根據上訴庭嘅另一個案例HKSAR v Abdallah [2009] 2 HKLRD 437，販運600克至到1,200克嘅判刑指引係20年至23年監禁。控罪一涉及916克可卡因，若果純粹以數學方式計算，年期會係二十一年七個月。喺呢單案裡面，本席都睇唔到任何理由要偏離呢一個判刑指引，所以本席係會以二十一年七個月作為控罪一嘅量刑起點。就控罪二嚟講，涉及嘅可卡因嘅份量係158.46克，根據上訴法庭，女皇訴劉德明及其他人嘅案例，[1990] 2 HKLR 370，販運50至到200克嘅可卡因嘅判刑嘅範圍係8至12年。控罪二涉及158.46克，如果純粹以數學方式計算，得出嘅刑期係十年十一個月。同樣地，本席係睇唔到任何理由要偏離上訴法庭嘅判刑指引，所以本席係以十年十一個月作為控罪二嘅量刑起點。

然之後，本席要考慮到呢一個被告嘅求情。但係喺呢單案裡面被告係經審訊之後定罪，而佢嘅家庭背景亦都唔足以作為任何嘅減刑理由，我亦都睇唔到有任何充足嘅理由去減輕被告嘅刑罰。所以，控罪一，我判處被告人入獄二十一年七個月；控罪二，被告人需要入獄十年十一個月。但係我必須要考慮到整體嘅原則。喺呢件案裡面，我認為整體刑期係需要考慮到兩項控罪所牽涉可卡因嘅總重量，因為呢兩項嘅控罪係同一日差唔多嘅時間發生。本席亦都有理由相信控罪一嘅可卡因係嚟自控罪二嘅地點，即係嗰個鐵皮屋。咁嘅情況底下，兩項控罪參考咗Abdallah嘅案例，總刑期係二十二年四個月，而本席亦都將呢一個作為控罪一同控罪二嘅總刑期。為咗達至呢個總刑期，本席下令，將控罪二判刑裡面其中九個月同控罪一分期執行，其餘同期執行，達至總刑期二十二年四個月。