HCCC 276/2009
HCCC276/2009
香港特別行政區
高等法院
原訟法庭
刑事案件2009年第276號
----------------
--------------------------------------
判刑 以下內容乃法庭數碼錄音謄本
官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。
案情指，被告被警員截查，發現佢手持嘅紙袋內，有四個載有白色粉末嘅膠袋。被告承認毒品係「K仔」以及正在替人運送毒品，以換取金錢嘅報酬。毒品經過化驗之後，證實為995.05克粉末，內含794.50克氯胺酮，毒品總數重量當時零售價為港幣115,425.80元。
被告現年26歲，已婚，曾經有三次合共四項嘅刑事紀錄，最後一項係喺2007年7月25號，因為經營不道德場所而被判6個月監禁，緩刑36個月。本案係喺緩刑期內干犯嘅。
大律師喺求情嘅時候表示，被告因為要負擔前妻與女兒嘅生活費，收入入不敷支，向財務公司以及朋友借貸，需要每月還款，經濟拮据，受不起朋友嘅誘使，而干犯本案嘅。大律師續指，被告喺被捕之後即時坦白招認，嚟到法庭嘅時候亦都承認控罪，彰顯佢嘅悔意。大律師話，被告已經了解失去自由嘅滋味，佢希望喺服刑期間學習一技之長，好讓佢出獄嘅時候重過新生。大律師希望本席喺判刑嘅時候考慮到量刑指引界別中有限嘅空間，從而給予最寬大嘅處理。
本席喺量刑嘅時候考慮咗本案嘅案情、毒品嘅種類、重量、以及量刑指引、被告承認控罪，以及大律師嘅求情。本案發生係喺許守城案嘅新量刑指引頒發之後嘅日期，而根據呢個新嘅量刑指引，販運600至到1000克嘅氯胺酮，監禁嘅起刑點係由12至到14年。就本案嘅794.50克嘅氯胺酮，本席採納13年嘅起刑點，予以三分之一嘅認罪扣減，判刑104個月（八年八個月）。
另外，本案係喺被告人干犯最後嘅案件（即KCCC 4349/2007）緩刑期間干犯，本席睇唔到有任何嘅理由不即時執行緩刑令，下令即時執行6個月嘅緩刑令，但係考慮到量刑整體性嘅原則，下令其中4個月分期執行，即係該案嘅4個月同本案八年零八個月分期執行，總刑期係9年。