HCCC 192/2009
HCCC192/2009
香港特別行政區
高等法院
原訟法庭
刑事案件2009年第192號
----------------
訴
楊建江
--------------------------------------------
判刑 以下內容乃法庭數碼錄音謄本
官： 本案被告承認六項搶劫罪，違反香港法例第210章《盜竊罪條例》第10（1）及（2）條。
案情指，被告喺2008年1月至11月內，六度喺晚上分別於美容店舖內、商店內、補習社內，以及喺屋苑嘅升降機大堂行劫，劫去嘅財物包括每次600元至到4,700元不等嘅現金，亦都有手提電話，同埋內有信用卡嘅銀包等等。喺呢六次嘅行劫過程中，被告均有出示利刀、牛肉刀或水果刀等武器，指嚇事主。其中一次曾經向事主威嚇會用刀捅佢，另外一次則從後箍住事主嘅頸。最後一次事發之後，被告潛逃回內地，喺大陸進入香港嘅時候被捕。
被告現年46歲，已婚，同太太有一名3歲嘅兒子，而太太同兒子居於內地。佢有七次涉及九項嘅刑事紀錄，兩項嘅紀錄類同，最後一次係喺1995年因為搶劫、無牌管有槍械或彈藥及串謀搶劫罪，被判監禁9年，佢喺2002年出獄。
大律師求情嘅時候指，被告出獄之後，佢喺2003年曾經將佢名下嘅居屋賣咗，而喺深圳經營一間精品店，但係該精品店自2005年開始生意一落千丈，喺2007年結業，所有投資嘅金錢付諸東流，化為烏有。而被告係因為經濟困難，先至鋌而走險，干犯本案嘅六件事件。
大律師指佢行劫所得嘅金錢，全部用在養妻活兒上，而每一次所涉嘅財物價值不高，佢犯罪全為求財，並冇意圖傷害事主。大律師強調，被告每次犯事嘅時間不長，第一時間認罪，節省法庭嘅時間，彰顯佢嘅悔意。大律師要求本席考慮各方面嘅因素，予以一個最低嘅起刑點，並且考慮量刑整體性嘅原則。
本席喺量刑嘅時候，考慮咗本案嘅案情、大律師嘅求情、有關嘅量刑指引。根據茆廣生案，被告人犯案嘅時候曾經向受害人亮出刀或利器，一般起刑點係5年。上訴庭亦指屢犯恐嚇、虐待受害人、闖入私人地方犯案等，均屬罪加一等嘅因素。上訴庭建議，刑期應因此等因素而往上調。本案一共涉及六次獨立嘅行劫事故，本席有必要將起刑點從5年往上調。就所有嘅控罪，本席認為一個9年嘅總起刑點係適當嘅。予以三分之一嘅量刑扣減，每項控罪判刑6年，同期執行。