香港特別行政區 訴 CHENG UNTIYA

DCCC1118/2009

香港特別行政區

區域法院

刑事案件2009年第1118號

----------------

----------------

----------------

判刑理由書

----------------

1.  第一項控罪係一個嚴重嘅控罪，根據上訴庭嘅判刑指引，單單係「冰」毒嘅毒品，咁嘅份量係足以判你最少7年監禁。上訴庭嘅判刑指引著重毒品嘅份量，咁呢樣嘢係好明顯嘅原因。另外一個原因，指引要好清晰，如果要同份量掛勾，但係上訴法庭亦都指出販毒嘅模式、所得嘅利潤，或者等等其他因素，都要考慮在內，咁呢樣嘢亦都唔需要上訴庭指引，所有法官都明白呢個狀況。

2.  咁喺你呢件案，你有其他嘅毒品，除咗「冰」毒，咁曾經有上訴庭案例，根據你嘅大律師指出，混合處理呢啲其他毒品，如果係單獨，即係呢幾種毒品同「冰」毒另外處理，混合埋一齊，個判刑指引你都有可能判兩年監。咁亦都冇任何嘅特定方式可將你嗰啲其他類型嘅毒品轉為「冰」毒，只可以同你將「冰」毒轉為其他嘅毒品，咁樣可以利用上訴庭嘅指引，上訴庭有機會咁做，冇咁做，法庭亦都認為冇咁嘅必要將其他類型嘅毒品轉為一種毒品，嚟睇下個量刑應該點樣決定。

3.  上訴庭就冇考慮到如果係多種毒品，有可能係令到個案情更加嚴重。舉個誇張嘅例子，如果一個毒犯身上藏有不同種類嘅毒品，每種份量好少，如果係單獨睇任何一包嘅毒品，個販運罪名都係好輕，咁所以本席認為根本就唔需要硬性規定將任何毒品嘅份量轉化為另外一種毒品份量，或者一定凈係睇其中一個比較嚴重嘅、比較多嘅毒品份量，咁其實好多時法庭都講到，要有全盤考慮。咁喺呢件案，法庭會考慮到正如你律師要求法庭考慮應該著重喺「冰」毒，咁其他根據你大律師講，可以不理，但係本席認為不可以不理，因為你有唔同嘅毒品，危害性、嚴重性一定比單單藏有「冰」毒嚴重。咁當然，其他唔係「冰」毒嘅毒品份量就係唔係好多，咁但係法庭都要象徵式考慮到了你呢件案件係比其他案件嚴重咗啲，人哋有不同毒，你藏咗不同毒。

4.  另外一樣嘢，本席要考慮就係如果呢件案你唔認罪嘅話，個量刑起點係幾多，我可以話畀你聽，呢一個考慮本席未做過嘅，因為本席嘅司法管豁權最多都係7年啫，唔認罪，咁本席都係判7年，根本冇機會考慮嗰啲案件係超出呢個7年。咁所以法庭為咗寧縱就毋枉，考慮到呢個令案件更加嚴重嘅因素，所以加多3個月嘅，咁換句話講，即係如果係唔認罪嘅話，你嘅判刑就會多3個月。咁其他「冰」毒，我就接納你大律師嘅求情，應該用最低嘅起點，即係7年。咁當然大律師都同你講過，認罪就有三分一嘅減免，我唔同意你大律師所講，就係因為你係後悔，你後悔與唔後悔，你認罪都要畀三分之一減免，就算你而家同我講話唔後悔，我都要畀三分之一減免；證據確鑿、唔確鑿，都係要畀三分一減免，就算你嘅運程正斷續，好唔好彩畀警察拉咗，俗話講係「斷正」，即係你延續嘅好運啱啱斷咗咁解，唔係粗鄙，只係畀人講得多，覺得佢係粗鄙嘅話，你都係有三分一減免嘅，即係假如冇任何求情因素，純粹係你認罪，個判刑起點結果就係58個月。咁但係呢樣嘢就冇考慮其他求情因素在內，其他嘅求情因素係咪唔使考慮呢？如果有，法庭冇理由唔考慮。舉個例，假如有另外一個被告人同你一齊犯事，呢個例我舉過好多次，初初以為係理論性啫，咁其實真係事實亦都係發生過，就係一個被告人直情係指證其他另外一個被告人，令到另外其他嘅被告人認罪，咁假如兩個被告人干犯同一件案件，一齊被控，一個就唔認罪，一個唔同警察招認，可能發動輿論攻勢、開記者招待會，聲稱無辜，搞咗一輪之後，最後嚟到法庭先至認罪，咁根據而家嘅法例，上訴庭都係要畀三分一時間，因為佢慳法庭時間，唔係慳警方時間；如果兩個被告同一件案件受到同一對待，都係畀三分一，另外一個同警方合作，指證其他人，唔得到額外嘅減免，不單止被告人本身覺得唔公平，任何公眾人士都唔理解點解會有咁嘅情況發生。

5.  咁其他求情因素本席係接納你真心後悔，但係呢個求情理由，單獨嚟睇就唔係好有力嘅啫。另外一個亦都係表示你係同警方充分合作，亦都係表示你係真係有悔意，咁你亦都可以提供到一啲資料，雖然冇實質嘅幫助，但亦都係證實係正確嘅，咁你同警方承認本身控罪，亦都節省警方調查時間，呢方面法庭可以畀額外寬免，但係就唔可以畀太多，因為已經係扣減左，認罪扣減咗三分一刑期，總體刑期要一次過睇，求情理由亦都係，如果將求情理由逐個、逐個求情理由畀，就變咗有啲不切實際嘅效果。

6.  因為你能夠充分同警方合作，同埋你係真正嘅悔意，所以法庭畀多6個月嘅減免你，所以第一條罪，法庭判你，如果加減前後冇計錯，就係52個月；第二條罪、第三條罪一般平時刑期都係要判監禁，除非有特別理由，咁喺呢件案亦都係環境特殊，所以每一條罪，本席判你4個月監禁。呢三條控罪所有嘅刑期，同期執行。