香港特別行政區 訴 宋沛傑

HCCC378/2010

香港特別行政區

高等法院

原訟法庭

刑事案件2010年第378號

----------------

----------------

------------------------------------------------

判刑
以下內容乃法庭數碼錄音謄本

------------------------------------------------

官：　被告喺聆訊之後被裁定兩項強姦罪罪名成立。

被告同本案嘅受害人係前度男女朋友，喺案發嘅時候已經分手，並且已經超過一年冇發生性關係。喺當晚被告係應受害人嘅邀請去酒吧飲嘢同埋傾偈，之後開咗酒，然後跟住受害人飲咗三杯白酒同埋一杯香檳，跟住醉咗，冇知覺，冇記憶之下被被告人帶咗去時鐘酒店，兩度被告人喺咁嘅情況下同受害人發生性行為。

被告人現年33歲，過往並冇刑事紀錄。佢曾經喺加拿大接受教育，喺犯事嘅時候係有固定嘅職業。不過大律師指出，被告嘅公司因為得悉佢涉及本案，已經喺上週將佢開除，即係被告人一手創立嘅事業隨住本事件而毀諸一旦。

被告對事件既冇承擔，亦都冇悔意，受害人需要挺身而出舉報佢，並且需要喺庭上重溫經歷，面對一啲令佢極難堪嘅指控。另外被告喺事件中，其中一次並冇使用安全設施。明顯佢整個作為係喺受害人醉酒嘅時候乘人之危。

就住第一項控罪，本席認為6年嘅起刑點係適合嘅。第二項控罪本席以5年作為起刑點，被告喺聆訊之後被定罪，不獲扣減。另外本席考慮量刑嘅整體性，下令兩項控罪嘅刑期同期執行。