HCCC 53/2010
HCCC53/2010
香港特別行政區
高等法院
原訟法庭
刑事案件2010年第53號
----------------
主審法官：
高等法院法官湯寶臣
日期：
2010年4月20日上午10時12分
出席人士：
律政司高級檢控官高寶翠小姐，代表香港特別行政區 蔡維邦先生，由法律援助署委派的黃國康律師事務所延聘，代表被告人
控罪：
[1] 至 [2] 搶劫罪（Robbery） 判刑
-----------------------------------
以下內容乃法庭數碼錄音謄本
官： 被告係被控兩項嘅搶劫罪，被告承認咗控罪同埋同意有關嘅案情，兩項控罪都係涉及打劫必勝客店舖嘅經理。
案情指出，喺2009年11月2日早上，必勝客北角店嘅舖頭經理打算將五萬多鈫存入銀行嘅時間，被告喺街上面從後係箍佢頸，用刀指住佢嘅腰部，就話要錢。咁經理就雖然將錢交咗畀被告，但係就從後追趕。咁被告後嚟係抌低咗啲錢嘅，但係經理依然係繼續追上同埋捉住被告。被拘捕之後，被告承認佢喺早前10月2日晚係入咗柴灣必勝客舖頭，打劫咗經理三萬幾鈫。
被告指出佢係曾經喺必勝客分店做職員，因此熟悉必勝客嘅運作，佢喺行動之前係有去過呢兩間分店視察周圍嘅環境。被告話佢係因為經濟困難，所以欠咗「大耳窿」嘅錢，而喺柴灣分店所搶到嘅錢，就已經係用咗嚟交還部分嘅債項。
被告人今年29歲，以往並無犯罪紀錄，亦都冇吸食毒品嘅習慣。
代表大律師喺求情嘅時間提出，被告的確係因為經濟壓力而出此下策。咁睇過辯方呈上嚟嘅信件之後，本席亦都係相信被告唔係因為話有啲壞習慣，例如係吸毒、賭錢等等而自甘墮落去搶劫，咁但係被告用刀去搶劫係嚴重嘅罪行，佢亦都明顯係有計劃同埋預謀咁樣嚟進行嘅。咁無論如何，希望被告喺監禁嘅期間就唔好再浪費時間，而係好好學返一門嘅手藝，以便將來係重投社會嘅。
經過考慮之後，第一項嘅控罪係涉及入屋行劫，本席會以6年作為刑期嘅基準；第二項嘅控罪，本席係會以5年作為刑期基準。本席會給予三分一嘅刑期減免，因為佢嘅承認控罪，咁即係兩項嘅刑期基準分別變成4年同埋40個月。
本席下令第二項40個月嘅其中22個月，與第一項嘅4年係同期執行，18個月係分期，即係話一年半係分期執行，咁總刑期係五年半。