香港特別行政區 訴 彭曉新

HCCC417/2011

香港特別行政區

高等法院

原訟法庭

刑事案件2011年第417號

----------------

----------------------

判刑
以下內容乃法庭數碼錄音謄本

----------------------

官：　

被告經審訊之後，被裁定一項販運危險藥物罪成立，涉及淨含毒量0.86公斤嘅可卡因。

案情方面好簡單，警方喺屯門山景邨景華樓地下某處將被告截停，結果從佢身上搜到涉案嘅可卡因。警誡下，被告承認替人帶毒。

被告剛滿64歲，大陸出生，84年來港，之後做過龍虎舞獅，亦可能做過老師，案發時已經退休。此外，佢已婚，又離婚，冇刑事定罪紀錄。

求情時律師話，被告自從兒子入獄後，已經恢復探望及接濟妻子，之前又從未犯事，所以希望輕判，但係呢啲都唔係有效嘅求情理由。事實上，被告喺辯護上，肆意誣捏警方，作出一個令人難以置信嘅故事，即係有人用一百萬市值嘅毒品，願意犧牲呢批毒品去誣捏一個佢咁嘅年紀、據稱又毫無瓜葛嘅一個人，顯示佢毫無悔意嘅。

觀乎涉案毒品嘅數量，本案嘅量刑基準應該係21年，被告唔認罪，冇有效嘅求情理由，就維持喺現有嘅水平。

我宣判被告需要為本案入獄21年。