被告人喺席前承認一項處理已知道或相信為代表從可公訴罪行嘅得益嘅財產罪，違反《有組織及嚴重罪行條例》第25（1）同埋（3）條；另外一項冇按照法庭嘅指定歸押罪，違反《刑事訴訟程序條例》嘅第9L條。
案情撮要顯示，被告人原被控一項串謀販運危險藥物罪同埋一項販運危險藥物罪，嗰件案件另外亦都牽涉到兩名嘅被告人。案件喺2012年3月5日喺高等法院開審，但係被告人並冇出席當日嘅審訊，咁最終法庭係發出拘捕令。2024年6月12日，被告人喺佢嘅屋企被警方人員拘捕。
至於第四項控罪，被告人嘅香港滙豐銀行戶口喺2007年7月9日至到2010年12月8日期間共有718宗嘅可疑交易，牽涉到共1,985,525.4元，而其中嘅88.32個per cent嘅存款係現金存款，而絕大部分嘅款項喺存入之後就係被提走或者係轉走，咁而呢啲被提走同埋轉走嘅款項就係佔咗提款額嘅98.8個per cent。被告人喺香港冇任何嘅物業，2008年嘅4月至到2009年3月31日期間，佢只有約30,000元嘅收入，呢啲30,000元嘅收入係佢聲稱從事兼職清潔同埋速遞員嘅收入。
就住第三項控罪，法例定下嘅最高刑罰係12個月嘅即時監禁。被告人總共潛逃嘅時間係長達十二年，咁逃避嘅審訊係涉及兩項嚴重嘅販運危險藥物控罪，涉案嘅另外兩名被告人喺承認控罪之後係分別被判處六年三個月同埋六年九個月嘅即時監禁。
有鑒於背後嘅刑事控罪，就住第三項控罪，本席係以9個月嘅即時監禁作為量刑起點。因為被告人承認控罪，故此刑期係下調至6個月嘅即時監禁。
至於第四項控罪，涉及所處理嘅從可公訴罪行得益嘅財產，即係涉及所謂嘅「洗黑錢」嘅款項係1,985,525鈫，時間就係橫跨三年五個月，而涉及嘅交易宗數就係718宗。
咁時間唔係一個短嘅時間，交易嘅數目亦都唔係一個細嘅數目，不過除此之外，就冇其他嘅證據指被告人係知道呢一啲「黑錢」背後牽涉嘅可公訴罪行。
呢件案件應該咁講，亦都係冇證據指出係牽涉到任何有跨境犯罪嘅元素，同埋係背後有呢個黑社會或者犯罪集團操縱嘅原因在內。另外，「清洗黑錢」嘅手法亦都係簡單嘅銀行戶口嘅提存，並不是係十分複雜嘅「清洗黑錢」。
蘇大律師代表被告人係指出，根據律政司司長 訴 雲國強 [2012] 1 HKLRD 197所述，「清洗黑錢」量刑嘅時候最重要考慮嘅就係金額嘅多少。清洗一至兩百萬嘅「黑錢」，量刑嘅起點係3年嘅即時監禁。考慮到過往嘅案例，本席亦都同意3年嘅即時監禁係一個合適嘅量刑起點。有鑒於被告人承認呢一項控罪，所以刑罰係下調至兩年嘅即時監禁。基於上訴庭喺HKSAR v Lo Kam Fai [2016] 2 HKLRD 308所定下嘅判刑原則，第三項控罪嘅6個月即時監禁係應該同第四項控罪嘅兩年即時監禁分期執行。
總結以上所述，就被告人所承認嘅兩項控罪，判處兩年半嘅即時監禁。