香港特別行政區 訴 吳家健

HCCC68/2010

香港特別行政區

高等法院

原訟法庭

刑事案件2010年第68號

----------------

----------------

-----------------------------------------------

判刑
以下內容乃法庭數碼錄音謄本

-----------------------------------------------

官： 被告人係承認咗一共三項嘅控罪，即係猥褻侵犯及兩項企圖強姦罪。

涉案嘅女童係被告妻子嘅妹妹，第一次事發時，佢只係十三歲幾。事情第一次發生係喺2008年夏天嘅某日，女童係喺被告人屋企留宿，咁被告就趁住妻子瞓咗，佢喺廳嗰度就係抱住女童，佢嘅嘴，又撫摸女童嘅乳房同埋下體，女童當時有嘗試係推開被告嘅。

到2009年嘅5月初，女童參加咗海事青年團嘅宿營活動，被告當時係活動嘅負責長官，喺凌晨嘅時間，被告係去到女童瞓覺嘅救生艇裡面，佢除咗自己同埋女童嘅褲，企圖係與女童性交，女童有掙扎，但最後佢感覺到有東西進入佢體內同埋移動。

到咗2009年嘅8月，女童去咗海事青年團嘅總部，準備參加一個訓練營嘅活動，咁但係被告就借意叫咗佢入辦公室鎖上門，然後係侵犯佢，除咗佢嘅褲，將佢抱上寫字，想同佢性交，女童就不停反抗同埋拍打被告人。雖然被告嘅陽具有觸及女童嘅大腿內側，但係最後佢都未能真正進行性交，女童之後成功係脫身。

後來學校社工知道呢件事，咁女童母親亦都決定報警求助，被告喺2009年11月25日係被拘捕，之後被告喺警誡之下係作過一啲嘅陳述同埋解釋。

被告今年27歲，以往係並冇任何嘅刑事紀錄。代表被告嘅蘇大律師係向法庭講述咗多項對被告有利嘅求情因素。本席亦都閱讀過心理專家報告及被告家人、朋友、前校長等等嘅求情信件，共有二十幾份，可以見得到，就係佢哋對被告依然仲係好支持。

以心理專家嘅評估，被告並非係有異常嘅心理傾向，佢係唔識恰當咁樣處理佢嘅性慾問題，專家認為佢重犯嘅機會係低。

本案嘅嚴重性不單在於女童嘅年紀，更加在於被告同女童嘅關係。被告既係女童嘅長輩，又係女童喺海事青年團嘅長官，被告喺屋企同埋海事青年團活動期間侵犯女童，實在可以話係雙重咁樣破壞咗佢對女童應該有嘅誠信關係。另一方面，就第二及第三項控罪而言，被告亦都係喺短短時間之內兩次對佢作出侵犯，雖然被告並冇對女童施以恐嚇或者係用好大嘅武力，最後行動亦都因為女童反對及反抗而結束，但相比之下，本案嘅案情，本席認為係比較另一件案，就係K. Tavan CACC 169/2008 嘅情節係更為嚴重。

經過考慮之後，本席會以3年、6年、6年作為三項控罪嘅刑期基準，本席會給予被告全部因為佢承認控罪三分一嘅扣減，刑期因此變為係兩年、4年同埋4年。

本席接納被告其實喺其他方面，都算得係一名勤奮上進嘅年青人，對家庭都係有承擔，今次嘅事件，已經係會令佢失去幾年大好家庭嘅生活同埋工作嘅發展。無論如何，本席係希望佢喺懲教署嘅監管同埋指導之下係繼續進修，參加心理輔導嘅課程，能夠提高佢處理性慾嘅能力，喺出獄之後能夠修補同家人嘅關係，積極面對人生。

本席亦都希望因為唔需要上庭覆述呢啲尷尬同埋痛苦經歷嘅女童，可以更快咁樣重返佢正常嘅生活。

喺進一步考慮到本案嘅情況及整體刑期方面，本席會下令第一項兩年刑期其中嘅6個月與第二項刑期係分期執行，而第三項4年刑期中嘅兩年，與第一及第二項刑期分期執行，總共刑期因此會係六年六個月。