HCCC 187/2010
HCCC187/2010
香港特別行政區
高等法院
原訟法庭
刑事案件2010年第187號
----------------
-----------------------------------------
判刑 以下內容乃法庭數碼錄音謄本
官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條，以及一項管有危險藥物罪，違反香港法例第134章《危險藥物條例》第8（1）（a）及（2）條。案情指被告從住所單位外出嘅時候被埋伏嘅警員截查，發現佢手中有一小包嘅毒品，被告稱嗰包毒品係供佢自用嘅。警員及後搜查佢嘅住所，發現內有十六包毒品以及包裝工具，包括三十四個膠袋以及一個電子磅。被告承認佢管有該些毒品作販運。
單位內嘅毒品經過化驗之後，證實為349.20克嘅粉末，內含218.54克氯胺酮。另外被告手中嘅毒品則為內含0.03克氯胺酮嘅0.10克粉末。
被告現年28歲，過往共有十一個刑事定罪紀錄，曾經喺2001年3月同埋2005年12月因為同本控罪相類似嘅販運危險藥物罪，分別被判去戒毒所，以及16個月嘅監禁。佢最後一次嘅案底係2009年3月23號，因為管有危險藥物罪而被判處罰款2,500元。
大律師喺求情嘅時候表示被告嘅父母早年離異，由母親照顧，佢喺06年因為工傷之後只能夠擔任散工維生，而佢同女友嘅兒子已屆9歲，兩人正準備籌備結婚，佢先會鋌而走險干犯本案嘅。大律師續指被告本身係有吸食氯胺酮嘅習慣，今次犯案之後坦白認罪，希望本席能夠予以一個較低嘅起刑點。
本席喺量刑嘅時候考慮咗本案嘅案情、毒品嘅種類、重量、有關嘅量刑指引，亦都考慮咗被告認罪同埋大律師嘅求情。根據許守城一案嘅量刑指引，販運50至到300克氯胺酮嘅起刑點係由6年至9年，就住本案控罪二所涉及嘅218.85克嘅氯胺酮，本席採納八年半嘅起刑點，予以三分之一嘅認罪扣減，判刑68個月。另外就住管有危險藥物罪，本席以9個月作為起刑點，判刑6個月。兩罪嘅判刑同期執行。