|
HCCC 442/2016
香港特別行政區
高等法院
原訟法庭
刑事案件2016年第442號
----------------
----------------
| 出席人士： |
律政司檢控官戚雅琳小姐，代表香港特別行政區 |
| |
關唐利先生，由法律援助署延聘，代表被告人 |
----------------------
判刑
以下內容乃法庭數碼錄音謄本
----------------------
官：
被告人喺一名裁判官席前承認一項搶劫罪，被交付高等法院原訟法庭判處。
本席喺判處嘅時候，考慮咗案件嘅整體情況，包括案件嘅性質同埋情節、被告人嘅個人背景同埋辯方大律師嘅求情陳詞。
本案嘅事主係一名22歲嘅性工作者，喺一間酒店提供性服務。被告人喺得到事主嘅性服務同埋與事主淋浴之後，示意事主瞓番喺床上面，佢然後坐咗喺事主嘅胸口位置，用身體嘅重量壓住佢嘅身體，令到事主感到呼吸困難。被告人然後撫摸事主嘅頸部同埋𡃶佢，之後用雙手揑住事主嘅頸部，令到事主感到唔舒服。當事主話畀佢聽嘅時候，被告人加大力度，然後從外套嘅袋攞咗一把鎅刀，推出刀片，壓住事主嘅頸嘅左側，然後用英語叫事主交出所有嘅金錢，否則就會殺死佢。事主感到害怕，告知被告人啲錢放咗喺櫃桶嗰度。被告人走去櫃桶，喺過程裡面，繼續用鎅刀指住事主，然後從櫃桶攞咗一啲現金，放咗喺自己嘅外套袋裡面。之後叫事主打開夾萬，事主初時拒絕，但係被告人握住鎅刀，而且掌摑佢嘅右邊面，事主唯有順從，喺驚慌之下打開夾萬，攞咗所有嘅現金同埋其他財物，交咗畀被告人。被告人離開房間嘅時候，事主懇求佢唔好攞走佢嘅金錢，因為佢有一個兩歲嘅兒子需要用錢，被告人不理會，並且再掌摑佢嘅面。
事主追住被告人，大聲呼叫，喺見到一名保安員嘅時候，話畀佢聽佢剛剛被一名男子打劫。保安員追截被告人，並且要求同事支援，不久，另外一名保安員喺街上面捉住被告人，報警處理。
警員向被告人調查，並且搜身，從被告人嘅外套左袋搵到現金泰國幣4,520銖、港幣9,530元同埋一個水錶機，又從被告人嘅右袋搜到現金港幣2,400元、泰國幣390銖、一部流動電話同埋一個智能卡嘅外殼。
喺被拘捕同埋警誡之下，被告人話「阿Sir，因為要養老婆，冇錢使，所以先打劫個女仔。」喺另一次會面嘅時候，佢話佢召妓係想打劫，佢並冇支付服務費800元畀事主。
被告人現年28歲，中七程度，係水務署抄錶員，亦都喺馬會兼職。被告人已婚，妻子係泰國人，而家喺泰國居住，仲係讀緊書。被告人同父母一齊居住喺一個公屋單位，佢係初犯嘅。
喺求情嘅時候，關大律師指出，被告人係喺嚴重嘅經濟狀況之下犯案，被告人為咗照顧年長嘅父母，同埋為著令妻子可以繼續學業，每個月要支付佢哋大約兩萬元。此外，佢嘅妻子喺不久之前曾經因為病，需要手術，花費咗大筆金錢。被告人入不敷支，所以欠下銀行一筆嘅債項，喺咁嘅情況之下，一時愚蠢，先至干犯咗本案。
關大律師請法庭顧及以下嘅事項：一，被告人雖然係帶有鎅刀，但係鎅刀係佢抄錶嘅時候所需要用嘅工具，因此，時常都帶喺身上；二，被告人喺犯案嘅時候，並冇用到鎅刀傷害事主；三，被告人對事主所用嘅武力只係屬於輕微；四，被告人喺被捕之後立即坦誠招認，並且交代咗佢嘅犯案背景；第五，喺法庭嘅時候，被告人第一時間承認控罪；第六，被告人並冇刑事定罪紀錄；第七，被告人嘅父母同埋姑姐都係依然支持被告人，今日亦都喺法庭，出席聆訊。
辯方呈遞咗三封信，第一封信係被告人親自寫嘅，佢交代咗佢嘅犯案背景，所述如關大律師所講嘅係一致嘅，被告人亦都表示悔意，表示佢會決心更新。第二封信係被告人嘅妻子寫嘅，佢確認關大律師求情所講嘅係屬實，代被告人求情，希望輕判。另一封信係父親寫嘅，佢確認被告人的確係有供養佢哋同埋妻子，因而經濟壓力係大嘅，佢哋相信被告人有真誠嘅悔意。
被告人喺一間酒店嘅房間，係事主提供性服務嘅地方，用鎅刀威脅佢，並且曾經以手揑住事主嘅頸部，亦都曾經掌摑佢。根據茆廣生（[1981] HKLR 610）一案，該案上訴庭提出嘅判處考慮，再加上被告人嘅搶劫對象係性工作者，上訴法庭喺例如黎國輝（CACC 346/2008）同埋鄭福華（CACC 442/2005）裡面所指出，法庭不可以忽視性工作者嘅工作性質，令到佢較容易成為搶劫嘅對象。
考慮咗整體情況，本席認為一個7年嘅量刑基準先至足以反映本案嘅嚴重程度，被告人承認控罪，應該得到三分一嘅刑期扣減。考慮咗整體情況，包括辯方大律師嘅求情陳詞、顧及被告人初犯，同埋佢應該會失去咗水務署嘅工作，本席認為三分一嘅刑期扣減就係被告人應有嘅減刑幅度。
係，被告人，請起立。基於上述理由，本席就你本項控罪，判你監禁四年八個月。
|