HCCC 198/2014
香港特別行政區
高等法院
原訟法庭
刑事案件2014年第198號
----------------
----------------------
判刑 以下內容乃法庭數碼錄音謄本
官：
被告係被控一項販運毒品罪，涉及嘅毒品係純度1.65公斤嘅氯胺酮，亦即係俗稱「K仔」嘅毒品。咁案件曾經係審訊過㗎喇，被告人上次係被定罪，後來上訴庭判上訴得直，發回重審嘅。現時被告就係承認控罪，亦都同意案情。
咁簡單嚟講，警員喺案發當天，喺寶勒巷發現到被告人在一個私家車上係形跡可疑，於是就上前截停由被告人開嘅呢架私家車。後來，警員喺車後面乘客座位上見到有個袋，喺檢查之後，發現裡面有八個膠袋，就係載有呢個「K仔」嘅粉末。後來，被告同埋兩名乘客都被拘捕，即係葉民熙同埋黃佳榮。
在後來嘅警誡會面嘅時候，咁被告人承認佢係私家車嘅車主，當日早上嘅時候，葉民熙就叫佢去寶勒巷嗰度去接佢。到咗之後，葉民熙同埋黃佳榮就上車，葉民熙仲將係裝有毒品嘅袋放喺佢車嘅後面座位。之後，佢剛剛開車就被警員截停喇，咁被告人現時就承認佢係幫葉民熙去販運毒品。毒品嘅市值大概係港幣二十幾萬元。
被告今年28歲，佢係離咗婚嘅，有個6歲嘅女兒，佢讀完中一之後一直有進修同埋工作，佢本嚟係想抗辯本案嘅，但係經過考慮之後，佢決定就認罪，希望法庭係輕判，而佢係並冇刑事紀錄嘅。梅大律師就呈上多封求情信同埋被告被扣押時間嘅呢個進修嘅文件，支持被告係真心悔改、努力上進嘅心態。
本案嘅氯胺酮份量係好大嘅，有成1,650克，咁根據案例，1,000克以上嘅氯胺酮，應該判監14年以上嘅。被告人在上次審訊定罪之後，法官嘅判刑係16年，咁初步睇起上嚟，以個數量嚟到計算，本席覺得似乎係低咗，但係考慮過梅大律師呈上嘅案例之後，本席認為16年係恰當嘅刑期起點，不過就冇充分嘅理由再向下調喇，因此刑期起點係16年。
今次係重審，原則上被告今次承認控罪，本席可以用低過三分一嘅扣減幅度嘅，但係在考慮後，本席接納被告今次係真心有悔意，本席都係決定採用番三分一嘅扣減，刑期因此會變成十年八個月。
本席接納被告喺監獄之中係有繼續努力學習，呢一點係值得鼓勵，但係販毒係非常嚴重嘅罪行，對社會（尤其係年輕人）嘅遺害係極大嘅，不能漠視。無論如何，在考慮後，本席會酌情將十年八個月嘅刑期減為十年六個月，咁希望被告可以履行佢今天透過代表大律師對父母及女兒所作嘅話會重新做人嘅呢一個承諾。