[2018] HKCFI 649 · HCCC 157/2017
HCCC 157/2017
[2018] HKCFI 649
香港特別行政區
高等法院
原訟法庭
刑事案件2017年第157號
----------------
-----------------------------------------
判刑
以下內容乃法庭數碼錄音謄本
官：
被告喺聆訊之後被裁定一項販運危險藥物罪，罪名成立。
案情指，警員睇到被告喺的士嘅行為可疑，當被告落車之後截停佢，喺佢個斜孭袋入面搵到不同嘅盛器載住毒品，而毒品經過化驗之下，證實為內含3.56克海洛英鹽酸鹽嘅4.35克混合劑，以及內含37.74克甲基苯丙胺鹽酸鹽嘅38.6克晶狀固體同埋內含0.17克可卡因嘅0.23克固體，而所有毒品當時嘅市值大約係16,243元。
被告曾經有六次嘅刑事紀錄，一共七項，其中係有三項涉及危險藥物，93年係因為管有危險藥物被判罰款，其後喺1999年係有兩項嘅販運危險藥物罪，一共被判監14年。佢喺2008年9月刑滿出獄。
根據大律師嘅求情，就希望本席予以一個低嘅量刑起點。根據譚伊真嘅量刑指引，販運「冰」毒10至到70克，起刑點係7至到11年。而海洛英同埋可卡因，如果單獨嚟計，少於10克係2至5年，而本案嘅海洛英同埋可卡因一共合重係3.73克，如果將本案嘅「冰」毒同埋海洛英加起上嚟，個重量係一共係41.47克，係唔會令到喺「冰」毒嗰度進階至到另外一個界別嘅。
考慮到所有本案嘅案情、有關毒品嘅重量，以及被告係慣犯嘅因素，本席認為一個九年半嘅起刑點係適合嘅。由於係喺審訊之後被定罪，故此，不予以任何嘅量刑折扣，判刑九年半。