香港特別行政區 訴 陳澤偉

HCCC 337/2014

香港特別行政區

高等法院

原訟法庭

刑事案件2014年第337號

----------------

----------------

----------------------

判刑
以下內容乃法庭數碼錄音謄本

----------------------

官：　

被告人陳澤偉被控一項販運危險藥物罪，違反香港法例第134章《危險藥物條例》嘅第4（1）（a）同埋（3）條。被告人喺裁判官嘅席前認罪同埋同意案情之後，係交付嚟高等法院原訟法庭判刑嘅。

案情其實都相當簡單，喺今年（即係2014年）2月12日，當時有一隊嘅警員就係喺下晝3點半鐘，就喺呢一個觀塘APM商場附近，有個跨境巴士站嘅附近範圍度係進行一個反毒品行動嘅。大概係五點幾，就係睇到被告人你呢，就係行動好鬼祟咁樣，就係由個巴士站度衝過去嗰個的士站嗰邊，當時係截停咗你。後屘搜你嘅身，你當時有個背囊嘅，背囊入面就搵到個公文袋，公文袋入面就搵到有三包當時就懷疑係一個危險藥物嚟嘅，咁就已經拉你，就話你係販運危險藥物，咁被告人你--拉咗你之後，你就話「阿Sir，啲『K仔』係我幫人帶嘅，諗住賺少少錢暏。」後屘帶咗返去差館，有一個錄影嘅會面，當時錄影會面嘅時候，被告人就--即係你就講咁一啲嘅詳情喇，好簡單講過就話你當時係做一個運輸工人，賺8,000鈫一個月，就幫人帶呢啲毒品，就100鈫一包，第一次運毒嘅啫咁樣。而當時係懷疑嘅毒品拎咗去化驗喇，化驗咗之後，就發現原來就係0.72公斤，即係720克嘅粉末，而入面係有0.56公斤，即係560克嘅氯胺酮嘅，而以當時嘅市價呢，就大概係83,520鈫。呢個就係被告人你承認咗嘅案情。

關於被告人你嘅背景同埋求情嗰方面喇，被告人而家你就19歲，犯案嘅時候就18歲，先前係冇任何刑事紀錄嘅。而睇番嗰個背景，就話你讀完中三之後都有上過啲堂嘅，即係譬如係髮型呀，或者係呢個做酒保咁樣嘅，咁就係去充實你自己。而以前亦都試過去做呢個酒吧嘅工作，又試過喺碼頭度做工人，而你嘅代表律師蘇大律師話畀我聽呢，就你做碼頭工人嘅時候係賺9,000鈫一個月嘅。

而蘇大律師求情嘅時候，就非常之強調被告人你係先前冇刑事紀錄同埋年紀輕喇，亦都係好後悔，同埋係一早就已經認咗罪，而被告人亦都係有屋企人嘅支持，爸爸、媽媽同埋家姐都嚟咗。被告人你自己同埋你嘅父母、兄姊，仲有就係一位社工都係分別有寫信嚟畀本席，基本上都係話即係你係本來本性善良，但係就誤入歧途，希望法庭係盡量輕判你嘅。

販運危險藥物係非常之嚴重嘅罪行，一旦被捕，係需要去嚴懲嗰啲罪犯嘅，而涉案而家係氯胺酮，涉案嗰個嘅份量就係560克嘅，即係5.6公斤，而你嘅代表律師一定已經話咗畀你聽有先例，就叫許守城[2009]1 HKLRD 1嘅案件，就係上訴庭已經訂下咗，如果喺販運氯胺酮嘅時候嗰個量刑嘅準則嘅，而販運係300至600克嘅氯胺酮呢，就嗰個判刑嘅起點喺9至10年之間。你而家係560克，即係其實都好近300至600克嗰個600克嘅頂點嗰邊㗎喇，當然喇，我都接納你嘅代表大律師所講，判刑就唔係凈係睇嗰個份量嘅，好似計數咁樣計嘅，都唔係嘅，都要睇睇全個環境情況，總之嗰個量刑就會喺9至12年之間，亦都睇唔到有乜嘢嘅理由係可以低過9年或者係高過12年，所以我就要喺9至12年之間去考慮一個起點。

我考慮晒呢件案件嘅案情，尤其係冇任何嘅資料顯示你係有話預備帶啲毒品去過境，即係去內地或者啱啱喺內地返落嚟，因為有呢啲呢，就變咗係有一個國際性嘅原因，就令到個案情係更加嚴重嘅。我睇咗呢件案件之後，我就認為一個恰當嘅量刑起點係10年，你係初犯，而且頭先我已經講咗喇，就係冇呢一個加刑嘅因素，所以就嗰個量刑起點都仍然係10年。好喇，咁你認罪喇，亦都係最早嘅時候已經認罪，同埋就係你都算係相當年輕，因為犯案嘅時候先得嗰18歲，同埋係完全以前冇案底。我考慮晒全部嘅詳情，包括任何同呢件案件有關嘅任何事物，我就係決定畀你嗰個嘅扣減係百分之四十五，如果以10年嚟計百分之四十五嘅扣減，就等於66個月，即係話五年六個月，五年半。

可以講呢，即係呢個唔係一個短嘅刑期，但係亦都可以講係話我對你都係額外開恩㗎喇，嗰個刑期係短咗，你自己就真係要好自為之，尤其喺監獄嘅時候，你係有機會去進修，希望你用呢幾年嘅時間係讀好書佢，將來出番嚟嘅時候係更加有一技傍身，令到你可以重投社會，唔好辜負爸爸、媽媽同埋屋企人對你嘅關心同埋愛護，明白喇嘛？

被告人：明白。

官：坐低。咁就呢個控罪，你就係要被判監禁係五年六個月，唔該。