官： 兩名被告人一同被控一項販運危險藥物罪（即控罪一），同埋分別各被控一項販運危險藥物罪，第一被告係控罪二，第二被告係控罪三；三項控罪都係違反香港法例134章《危險藥物條例》第4（1）（a）同埋第（3）條。
第一被告喺裁判官席前已經係認咗罪，而第二被告今朝喺本席席前承認控罪。
咁第一被告喺裁判官席前承認控罪嘅案情顯示，喺今年嘅1月12日，當時有一隊嘅警方人員係去到新翠邨近新傑樓嗰度，做一啲監視嘅工作，就見到第一被告喺新傑樓附近出現。當時就冇嘢嘅，就似乎講緊手提電話。於是差人就跟蹤呢個第一被告，咁就見佢由新翠邨去咗隆亨邨，咁跟住警方就唔見咗被告嘅蹤影一陣間，咁跟住佢就再出現，再出現嘅時候，就喺手度住一個藍白色嘅紙袋。警員係繼續跟蹤呢一個第一被告，最終就喺第一被告預備上一部的士嘅時候，就將佢截停咗，搜查呢個袋之後就發覺呢個紙袋入面有四個膠袋，入面係裝住當時懷疑係氯胺酮嘅嘢喇，同埋有兩個電子磅嘅。咁第一被告當時就話畀差人聽，佢係第一次幫人帶氯胺酮嘅啫，就唔知道係咁大件事嘅，亦都話畀差人聽，就係佢係成功送咗貨之後，會有1,200鈫作為報酬，咁呢個就係第一控罪嘅內容喇。
咁跟住第一被告就係帶咗差人返去佢屋企，就喺呢一個新翠邨新傑樓嘅1619室嘅，咁當時喺間屋入面，又發現有另外一個黑色嘅膠袋，入面就載住十三包當時懷疑係氯胺酮，咁第一被告話畀差人聽，嗰啲毒品就係以前送貨嘅時候送剩，咁就同嗰度住嗰啲人係無關嘅，呢個就係第二項控罪。
跟住返到去差館，就有做一個錄影嘅會面。喺錄影會面當中，第一被告就話畀差人聽，有個人叫做阿超嘅，就叫佢係帶呢啲嘅毒品，就係1,200鈫，咁佢就去咗隆亨邨其中一間大廈（唔記得個名㗎喇）上咗去五樓，咁喺嗰度，呢個阿超就將嗰個紙袋即係交咗畀佢，即係袋住有四包氯胺酮，同埋有兩個磅嗰個袋交畀佢，於是佢就預備帶返屋企，諗住再係聽取指示嘅，咁跟住已經畀差人拉咗喇。而喺屋企度搵到嗰十三包，佢就話佢係用1,600鈫去買返嚟，即係成個月前買㗎喇，就預備係賣畀人嘅。
咁經過化驗之後，嗰四包（即係喺嗰個紙袋入面搵到嗰四包）嘅毒品，就證實咗係內含831.96克氯胺酮嘅995.08克粉末，而喺被告屋企搵到嗰十三包，就係內含143.41克氯胺酮嘅172.68克粉末，即係話呢兩批嘅毒品加埋晒，呢個氯胺酮嘅總重量係975.37克，即係話相當近一公斤㗎喇。
第二被告嗰個案情方面，就係喺今年嘅1月13日，當時警方係執行一個搜查令，就去到隆亨邨學心樓嘅501室度係搜查，咁搜查嘅時候，就喺呢個屋入面，就發現到有呢一個懷疑嘅氯胺酮同埋有個電子磅，仲有一啲係可再封口嘅膠袋，咁就喺間屋嘅床下底度搵到嘅，咁當時第二被告就唔喺屋企嘅。咁警員搵到之後，遲啲第二被告就返嚟喇，咁返到嚟之後，佢就承認話喺床下底搵到呢啲物品係佢嘅。咁拉咗被告喇，就話佢係販運毒品，同埋警誡之下，第二被告就係話嗰啲毒品就係以前用剩嘅，就同佢阿媽係無關嘅。
咁後屘返到去差館度，喺一個錄影會面嘅時候，第二被告就話畀差人聽，有個人叫做阿強，就叫佢去收取一包嘅嘢，咁佢就去喇，咁就見到阿強之後，就收咗嗰包嘢，咁嗰包嘢入面其實係咩嘢呢？就有幾包氯胺酮嘅。咁第二被告就將呢包嘢，就擺咗喺佢自己嘅床下底，咁後屘就拎咗其中一包出嚟，就用個磅去量過喇，咁就大概八盎喥，咁就拎咗出嚟，即係嗰包就係後屘啲差人喺個屋企度搵到嗰包喇，即係第三項控罪嘅物品。咁後屘第二被告就打番電話畀呢個阿強，話畀佢聽，話都係唔想幫佢收埋呢包嘢喇，叫佢搵人攞番走咁，咁阿強就話畀佢聽，遲啲會有個女人嚟收番㗎喇。咁跟住即係稍後時間，就有個女人（即係呢件案嘅第一被告）就真係打電話畀第二被告，就大家安排咗，就呢個第一被告嚟攞番呢個嘅氯胺酮，咁而第一被告攞走咗嘅氯胺酮，後屘就係證實咗即係內含831.96克氯胺酮嗰啲嘅毒品，即係第一項控罪所講嘅情況喇。
咁而至於喺被告屋企，即係床下底搵到嗰啲嘅毒品，最後經過化驗之後證實，係內含6.44克氯胺酮嘅7.55克混合物，咁即係話第二被告所牽涉氯胺酮嘅總重量係838.40克。
背景喇。第一被告19歲，冇刑事紀錄。求情嘅時候，就係大律師話畀我聽，第一被告係來自一個破碎嘅家庭，父母喺佢年輕嘅時候已經係離咗婚，咁自己就唔能夠接受爸爸再婚，咁因而影響到佢嘅學業，最後後屘仲搬咗出嚟自己住添，咁雖然有做過--係喺餐廳做喇，即係呢個茶餐廳喇，咁後來就去做呢一個學徒，就係學呢個髮型嘅，咁不過都係覺得，即係工作係太過困難喇，入不敷支，咁所以終於就冇做到，咁後屘係群埋晒啲不良嘅分子，就干犯咗而家呢一個嘅控罪。
第一被告喺被警員拉咗之後就非常之嘅後悔，亦都喺呢件事件係畀咗一份口供畀控方，係願意指證呢個第二被告人嘅，最終就係引致第二被告都承認咗個控罪，免除咗一個嘅審訊。咁而控方嗰方面，亦都接納第一被告畀控方嘅口供，係喺呢件案件嚟講，有呢個作用嘅。咁而被告本身，同埋佢一位以前嘅老師，都寫咗求情信係畀本席嘅。
第二被告22歲，唔係初犯㗎喇，有五次嘅案底，兩次出庭嘅紀錄，一項係打人，襲擊導致人身體受到實際傷害，一項就係聲稱為黑社會嘅會員，仲有三項係販運危險藥物，咁而佢首兩項係畀咗感化12個月，後屘嗰三項販運危險藥物罪名，係送咗去呢個勞教中心。咁其實被告人你個代表律師，陸大律師同你求情嘅時候，就係提番被告人你本身有寫到一封相當長嘅求情信畀我，同埋你以前啲同事，亦都係寫咗求情信畀我，咁其實除咗係提番信件入面嘅內容之外，都冇乜嘢真係可以幫到你講嚟求情㗎喇，基本上就係話即係你而家好後悔喇，同埋亦都係答應喺獄中係會繼續進修，咁希望有機會係讀大學，有機會讀你自己好心儀嘅酒店系啫。
咁而被告你本身寫畀我嗰封信，就話其實本身係孤兒嚟嘅，就好難得你個養父母養你喇，同埋佢哋根本係視你如佢哋嘅所出，非常之愛鍚你，咁爸爸不幸就2008年去咗世喇。咁喺個信裡面，被告人自己就話因為係想快啲賺快錢，等媽媽可以有一個安樂啲嘅生活，所以先至干犯呢件嘅罪行。咁但係當然喇，正如你嘅代表大律師都承認，你而家唔係話第一次犯事，其實已經係有呢個販運危險藥物嘅前科，咁所以好難講，就係話以為咁樣去搵快錢，係唔知道嗰個後果嘅。
咁而另外嗰封信就係你以前嗰間叫做味千嘅拉麵廠度做，嗰位嘅主管曾生，同埋其他一啲嘅同事係幫你寫嗰封求情信，佢哋唥都係要求本席就係畀次機會你，就話你喺嗰度做嘢嘅時候，其實就即係非常之勤奮咁去工作嘅，咁佢哋聽--即係當時你其實離開咗呢個廠㗎喇，就話你自己有另外一份工作，咁其實佢哋就覺得你咁樣走咗去，亦都好唔捨得。咁呢位曾生亦都係向法庭表示，如果你係即係服刑完畢出嚟，去番佢哋嗰個麵舖度做，即係呢間廠度做，佢哋係會即係歡迎你返去歸隊嘅。
咁好喇，講番判刑嗰方面喇。販運危險藥物係一個非常之嚴重嘅罪行，呢個被--即係罪犯喺販運咗呢一個咁嚴重嘅罪行，拉咗之後，一定係被重判嘅。咁而氯胺酮，喺上訴庭一件叫做許守城嘅案件，係畀咗量刑指引嘅，而家呢件案件，即係大家嗰個份量都係600至1000克嘅範疇，所以個量刑起點係12至14年嘅。
好喇，就第一被告，其實第一被告真係差唔多成公斤，975.37克，兩項控罪加埋。當然，被告係來自一個破碎家庭，唔多唔少，即係任何人都會對於被告呢一個咁樣嘅遭遇，有一個同情之心，但係另一方面，即係人生喺呢個世界上，唔可能係樣樣嘢都如意嘅，家庭有困難、經濟上有困難，係人之常情，唔可以用呢個理由嚟掩飾自己做錯咗事，加上妳都唔係話即係十二、三歲，嗰啲咁無知嘅細路仔，有19歲喇，妳自己係一定知道妳自己係做緊乜嘢嘅，咁妳自己去選擇，去用一個貪快、唔使咁辛苦就去賺到嘅錢，但係嗰個禍害，對我哋嘅社會，即係唔能夠可以就咁形容，咁所以一定係要重判嘅。
咁亦都考慮晒呢件案件嘅案情喇，當然，第一被告所牽涉其實係兩包唔同嘅毒品嚟嘅，一份就係佢幫人攞喇，就係大份啲嗰包，另外屋企嗰個，其實係以前即係買落嘅，預備去賣嘅，咁未賣嘅，咁所以某程度上，係要考慮兩件唔同嘅事件，當然我都會一併考慮晒所有份量。咁我就認為13年嘅量刑起點係啱，即係兩個加埋一齊13年，咁當然第一被告，妳一早係已經認罪喇，一定可以攞到三分之一嘅刑期扣減㗎喇，咁如果以13年嚟計，減咗三分之一，就會係八年八個月。咁亦都考慮到你事實上係有畀到協助警方，因為我都知道最初嘅時候，第二被告係唔承認控罪嘅，係知道咗話妳畀咗嗰份口供，妳會肯出嚟頂證佢，佢先至改口係認罪嘅，咁喺呢個情況，又加上控方都接納妳係有幫助到喇，所以我係會畀第一被告妳一個額外四個月嘅扣減，即係話個總刑期會係八年四個月。
咁而第二被告喇，其實牽涉個份量係838.40克嘅，夾埋晒，咁第二被告即係份量嚟講，就當然少過第一被告喇，同埋亦都係同一包喇，因為嗰八盎係喺同一包嗰度拎出嚟㗎嘛。但係對第二被告你不利嘅，就係你唔係第一次犯事，你不單止係有案底，仲要係有三件同而家相同嘅販運危險藥物罪名，咁所以就變咗令到呢個罪行係更加嚴重嘅。咁考慮咗你所有嘅情況之後，我都係認為一個13年嘅量刑起點係恰當，咁其實被告，你並唔係最早嘅時候認罪，你唔係喺裁判署嘅時候已經認罪，不過喺法律上嚟講，你都仍然屬於係我哋叫做及時嘅認罪，所以我仍然都係會畀你三分之一嘅刑期扣減，但係除咗呢三分一之外，就冇其他嘅理由再去將呢個刑期係遞減㗎喇。
咁正式判刑喇，第一被告第一項控罪係八年四個月，第二被告都係第一項控罪，就係八年八個月，即係多四個月。第二項控罪，凈係第一被告啫，就係4年，不過同第一控罪同期執行，夾埋都係八年四個月；第二被告第一項控罪頭先講咗八年八個月，第三項控罪係3年，同期執行，即係加埋都係八年八個月。