HCCC 154/2014
香港特別行政區
高等法院
原訟法庭
刑事案件2014年第154號
----------------
----------------------
判刑
以下內容乃法庭數碼錄音謄本
官：
被告承認一項販運危險藥物罪，違反香港法例第134章《危險藥物條例》第4（1）（a）及（3）條。
案情指，警員喺荃灣進行行動嘅時候，睇到被告神情可疑，搜查佢嘅手提環保袋，發現內有四包毒品。被告喺警誡下承認嗰啲係「K仔」，佢正在替人運送毒品，從沙田將毒品運送到荃灣西鐵站，將會收到200鈫嘅報酬。毒品經過化驗之後，證實係960克粉末內含750克嘅氯胺酮，當時嘅零售價為港幣115,200元。
被告現年27歲，過往並冇刑事紀錄。據稱，佢喺案發之前，喺一個貿易公司任職運輸工人，每個月有8,500元嘅收入。
大律師喺求情嘅時候表示，被告大約5歲嘅時候，父親過世，母親曾經因為中風兩次，現在行動不便，生活不能自理，而佢哋兄弟姊妹自少就相依為命。屋企人均表示，被告本性不壞，今次只係受人唆擺，所以先會鋌而走險、干犯本案，希望本席能夠考慮被告過往冇案底，而即時已經承認控罪，充分彰顯被告嘅悔意，希望法庭能夠予以輕判。
本席喺量刑嘅時候，考慮咗本案嘅案情、毒品嘅種類、毒品嘅重量、有關嘅量刑指引、被告承認控罪、大律師嘅求情，亦都閱讀咗被告家人所撰寫嘅求情信。
喺牽涉毒品案件之中，最大嘅求情因素，一般嚟講，係被告承認控罪。而根據許守城案嘅量刑指引，販運氯胺酮係600至到1,000克，起刑點係12至到14年。本案涉及係750克嘅氯胺酮，本席採納十二年九個月嘅起刑點，予以三分之一嘅認罪扣減。判刑八年半。