香港特別行政區 訴 湛浩偉及另一人

HCCC 75 & 76/2016

香港特別行政區

高等法院

原訟法庭

刑事案件2016年第75及76號

----------------

----------------

----------------------

判刑
以下內容乃法庭數碼錄音謄本

----------------------

官：　

HCCC 75/2016案，被告人湛浩偉（下稱「第一被告人」）喺本席席前承認一項販運危險藥物罪。HCCC 76/2016案，被告人云永輝（下稱「第二被告人」）之前喺一名裁判官席前承認一項販運危險藥物罪，被交付高等法院原訟法庭判處。

兩宗案件源自同一事件，各方同意可以一併處理判處。本席喺判處嘅時候，考慮咗案件嘅整體情況，包括案件嘅性質同埋情節，兩名被告人嘅個人背景，同埋辯方大律師嘅求情陳詞。

案情可以簡述如下：2015年7月15日下午，第一同埋第二被告人喺天水圍輕鐵站附近，第一被告人打開第二被告人孭住嘅背囊，喺背囊攞出一個紅色嘅膠袋，然後將嗰個紅色膠袋放喺附近花槽嘅石壆上面，警方即時上前作出行動，喺紅色嘅膠袋裡面搵到四個膠袋，分別載有裡面一共內藏983克粉劑內含747克氯胺酮。喺第二被告人孭住嘅背囊裡面搜到一個膠袋，裡面有六個膠袋，分別載有氯胺酮，總共嘅份量係1.47克粉劑裡面含有1.11千克氯胺酮，背囊裡面亦都有七十四個全新嘅紅色膠袋。

警方作出拘捕。喺警誡之下，第一被告人話，「我都係一時手緊，幫人拖啲K落嚟收番啲報酬咋。」第二被告人喺警誡之下話，「我一時等錢使，先至幫人帶啲毒品。」

喺稍後會面嘅時候，第二被告人話，喺案發日，一個叫做阿迪嘅人指示佢去九龍城碼頭花槽攞一個紅色嘅膠袋，攞去天水圍。佢同佢嘅朋友（即係第一被告）就一齊去攞嗰個紅色嘅膠袋。第一被告人攞咗膠袋之後，將個膠袋放咗入佢嘅背囊裡面。當佢哋去到天水圍嘅時候，就畀警方拘捕。佢話，佢哋每個人會收到港幣1,000元作為報酬。

第一被告人現年23歲，單身，中四學業程度，曾經入職機場搬運工人，亦都曾經做過不同嘅工作，包括喺髮型屋做學徒、茶餐廳做侍應、喺廚房做學徒同埋銷售員，但係所有嘅工作都做唔長。第一被告人喺被捕嘅時候無業，之前冇刑事定罪紀錄。

第二被告人現年22歲，亦都係單身嘅，中三程度，無業，佢亦都係初犯嘅。

代表第一被告人嘅鄭大律師喺求情嘅時候指出，第一被告人冇做工作之後，因為積蓄唔多，經濟情況唔好，經唔起損友嘅慫恿，先至跟隨指示干犯咗本案。鄭大律師請法庭顧及，第一被告人初犯，有家庭嘅支持，亦都打算喺服刑嘅時間學一技之長，等將來返回社會之後可以重新做人。

代表第二被告人嘅顧大律師指出，被告人一向勤力，喺求學嘅時候已經有兼職。佢犯事之前，因為祖母生病，需要金錢去治病，冇經過深思熟慮就干犯咗本案，第二被告人現在已經深感悔意。現在佢嘅祖母已經身故，佢亦都因為被囚無法奔喪。第二被告人第一時間承認控罪，而且主動提出成為控方證人，指證第一被告人。代表第一被告人嘅鄭大律師亦都接受，第二被告人成為控方證人係第一被告人最終承認控罪嘅主要原因。

顧大律師亦都指出，第二被告人喺獄中曾經被毆打。懲教署嘅醫學報告顯示，第二被告人確有傷勢，但係並不嚴重。顧大律師請法庭接受，因為當時控方已經將第二被告人針對第一被告人嘅證人供詞披露咗，呢一次嘅襲擊相當可能同第二被告人成為控方證人有關。但係顧大律師亦都指出，第二被告人並非指稱呢一次嘅事件係第一被告人所為。

辯方亦都呈遞咗第二被告人親手寫嘅求情信。信裡面，第二被告人表示悔意。

兩名被告人共同行事，一齊販運一共係1,857克純含量嘅氯胺酮。根據上訴法庭案例許守城（[2009] 1 HKLRD 1）：販運純含量超過100克氯胺酮嘅人，應該判處起碼14年監禁嘅刑罰。喺單松健案（CACC 458/2011），上訴法庭雖然並非定下量刑指引，但係指出如果販運氯胺酮純含量有2公斤嘅話，可以考慮判處監禁18年。

考慮過整體情況，本席睇唔到兩名被告人嘅刑責有實質嘅分別，認為針對兩個人嘅量刑基準都應該係十七年半。兩名被告人都分別承認咗控罪，因此應該各自得到三分一嘅刑期扣減。以第一被告人湛浩偉嚟講，顧及鄭大律師嘅求情陳詞，認為三分一就係第一被告人應得嘅刑期扣減幅度。至於第二被告人云永輝，佢唔單止第一時間承認控罪，仲主動成為控方證人，促致第一被告人承認控罪，仲可能曾經因此被毆打，本席給予額外減刑。

兩名被告人請起立。基於上述理由，湛浩偉，本席就HCCC 75/2016案，判你監禁十一年八個月。被告人云永輝，就HCCC 76/2016呢宗案件，判你監禁九年三個月。