香港特別行政區 訴 楊小均又名楊軍

HCCC175/2008

香港特別行政區

高等法院

原訟法庭

刑事案件2008年第175號

----------------------

----------------------

判刑
以下內容乃法庭數碼錄音謄本

官：被告楊小均（又名楊軍），原本被控下列罪行：一項企圖入屋犯法罪，違反香港法例第210章《盜竊罪條例》第11（1）（a）條同埋第200章《刑事罪行條例》第159G條；而另一項係搶劫罪，違反香港法例210章《盜竊罪條例》第10（1）同埋（2）條。

被告承認企圖入屋犯法罪，但係否認搶劫罪。經審訊後，被陪審團以六對一大比數裁定罪名成立。

被告承認企圖入屋犯法罪承認嘅案情如下：被告承認喺2008年1月28日朝頭早9點50分喥，喺九肚山金鞍花園C號兩層高嘅屋入面，有一個工作緊嘅菲傭就喺廚房做嘢嘅時候，聽到洗手間傳嚟撬玻璃同埋物件跌落嚟嘅聲音。佢去察看，就見到個抽氣扇已經跌咗落嚟。佢返到去客廳嘅時候，就見到有一個住紙刀嘅男子。佢即刻跑上樓上通知佢嘅女主人，同埋報警。警察不久就到場。後來就喺後園樓梯底一個細窿度搵到被告人。菲傭確認被告就係剛剛住刀嗰個男子。警員喺被告藏身樓梯底個窿嗰度就發現有刀同埋膠手套嗰啲咁樣嘅物品。案發期間，嗰間屋正係裝修。裝修工人話，嗰把刀係佢擠咗入去儲物室度。警方就搜查，喺呢個案發現場附近嘅山坡就發現有一個背囊，裡面嘅物件係包括有衣物同埋香港嘅地圖。被告喺警誡之下，承認佢喺被拘捕之前係匿咗喺嗰個窿仔入面。

就被告不認罪，但係被陪審員裁定罪名成立嘅搶劫罪，控方提出嘅案情顯示係有四名持刀嘅劫匪潛入去九肚村松柏花園第8座，劫去屋內四人共三十幾萬嘅財物，包括現金、名貴手錶、首飾等等。喺事件中，各人係有被綑綁，最後更加係被劫匪用膠紙封口。除咗菲傭嘅手指係喺同劫匪糾纏嘅時候被傷之外，戶主一家三口係冇受傷嘅。

被告嘅背景

被告係內地人，喺2008年1月26日，持旅遊證件嚟咗香港。根據資料，被告人係喺1979年喺內地出世，現年30歲，曾受小學教育。被告人唔係一個以前冇案底嘅人，喺2001年已經係就入屋犯法罪同埋非法嚟咗香港逗留喺香港罪，被定罪同埋判刑，服刑總共四年三個月；2003年12月8號先至係釋放出嚟。

企圖入屋犯法罪，辯方律師求情嘅時候指，被告係因為一事無成，所以就諗錯咗，干犯控罪。母親已經七十幾歲，有病需要醫治，爸爸已經去世。律師亦都強調，就呢一個控罪，被告係承認控罪，與警方合作，事件中冇人受傷，亦都冇人受到損失，希望本席喺判刑嘅時候考慮各項呢啲嘅因素。而就搶劫罪，辯方律師話，被告嘅指示係冇任何求情說話。

就入屋犯法罪，如果涉案嘅係住宅，一般嘅量刑指引係3年。以本案嘅案情而言，如果個菲傭唔係聽到聲音去查看，同埋睇到呢個住刀嘅被告就即刻上樓話畀女戶主聽同埋報警，被告都好可能已經成功喺個屋裡面攞到啲財物。佢干犯咗嘅企圖入屋犯法罪，其實同呢一個實質入屋犯法罪相差唔係太大，被告亦都唔係初犯。不過，喺考慮咗所有嘅環境情況之後，本席認為恰當嘅量刑起點係兩年半。被告坦白認罪，可以得到一般嘅三分之一減刑，刑期就即係20個月（一年零八個月）。

持刀行劫係有上訴庭嘅量刑指引，喺茆廣生案件，上訴庭已經頒下指引，單單帶住刀，亮刀指嚇受害人，量刑起點已經係5年。如果劫案係發生喺住宅，6年嘅起點係恰當嘅。如果劫案中罪犯係使用暴力，包括將受害人綑綁，法庭係應該考慮以7年作為量刑起點。如果有其他令到案情更加嚴重嘅元素，譬如係夜欄人靜嘅時候入到去住宅行劫、恐嚇或者係虐待受害人，干犯多宗類似嘅罪行或者係劫案涉及多過一名罪犯，法庭係應該更加將呢一個刑期增加。

以本案嘅案情而言，四名嘅劫匪係喺夜闌人靜嘅時候潛入去戶主嘅住所，佢哋持刀指嚇屋內人士。四個人明顯就係糾黨行事，不單只係有綑綁屋內嘅各人，後來仲係用膠紙嚟封佢哋個口 ─ 雖然喺案件裡面嘅黃詠恒最初係冇被綁，後屘先被綁。佢哋搶去嘅財物唔可以話係少 ─ 三十幾萬，亦都係因為有傷到個菲傭，所以對呢一個菲傭嚟講係做到多過綑綁上嘅傷害。

本席考慮咗被告嘅背景 ─ 佢唔係初犯，但係呢一項係第一次就搶劫被定罪名成立 ─ 亦都考慮咗所有嘅案情，認為恰當嘅量刑起點係七年半。被告係經審訊後被定罪，唔能夠得到認罪後嘅刑期扣減。本席亦都睇唔出有其他嘅理據將刑期遞減。雖然本席了解到被告自己話覺得冇出息，所謂一念之差，而被告喺香港坐監，一定喺某程度上會影響喺屋企嘅家人，但係呢一啲全部都唔係將刑期遞減嘅理由。雖則如此，本席仍然需要考慮係將兩項控罪嘅刑期一起嚟睇嘅時候，整體刑期應該係幾多。

本席經過考慮之後，認為總共嘅判刑8年係恰當嘅。企圖入屋犯法罪一年八個月監禁，搶劫罪七年半，其中六年四個月與企圖入屋犯法罪一年八個月分期執行，其餘同期執行，整體總刑期8年。