|
TMCC700003/2020
[2020]HKMagC 3
香港特別行政區
屯門裁判法院
刑事案件2020年第700003號
水佳麗裁判官審理
| 日期： |
2020年5月26日 |
| 時間： |
上午10時正 |
| 出席人士： |
律政司法庭檢控主任Mr Vincent M S Tsoi，代表香港特別行政區 |
|
Mr Kevin T K Tang，instructed by Messrs JCC Cheung & Co，代表被告人 |
判刑
以下內容乃法庭數碼錄音謄本
官：
請起立吖，所有嘅報告，所有嘅求情信，本席可以知道你過去確實係一個相當唔錯個青年。不過有一樣我都想勸告你，你犯咗法，本席得知你仲有另外一件嘅案件在身，本席想勸告你，喺你尚未成年嘅之前，多啲聽下你嘅父母講，如果你睇一睇你嘅父母因為你嘅犯案對佢哋個打擊，有啲嘢呢，唔係衝動就可以嘅，唔係滿腔熱誠就可以嘅。
我好深信，你喺呢度，雖然你只係咁細個，得嗰十五歲，但係本席嘅欣賞嘅，就係我相信你真係好愛，好愛惜呢個城市呀，雖然你咁細個。每一個真真愛惜香港嘅人都會好希望能夠為香港盡一分自己嘅綿力。可能大家個位置都唔一樣，全庭人坐喺呢度，個個都喺一個唔同個位置度，唔一定個個都會去做一啲嘅從事將來好似你咁嘅大嘅願望呀，去做議員呀等等，唔一定個個都去從政，但係每一個人都好希望真係愛護香港嘅，係希望喺自己個崗位上去努力，將香港變得更好。
本席欣賞你嘅，就係你咁細個，你好主動，好樂意去，去服務香港。不過，你真係要認識一下你個幫助香港個方法，行唔通呀。當你自己呀，因為你嘅行為走去被法庭去拘留，或者被法庭去監禁，你能夠帶嚟嘅只不過係畀你嘅父母重重嘅打擊，你冇帶嚟其他嘅嘢。
所以對於法庭而言呢，經常要去面對你哋呢啲咁樣嘅年輕嘅犯法嘅人，亦都好似你咁樣，過去其實都係一個真係好優秀，好好嘅細路，對法庭嚟講，一啲都唔愉快呀。但係法--本席只係能夠好期望你真係汲取教訓，如果你希望將來有一日去到呢個嘅區議院好，甚至你將來有一日，冇人能夠睇小你嘅，因為當你係裝備好你自己，又真係對香港有一個好熱誠嘅愛，冇人會--唔會因為你有可能有一個半個案底，可以阻撓到你嘅。
不過，你真係要諗下，當你越嚟越成熟，裝備好你自己，判斷好各樣個事物，邊啲做得，邊啲唔做得，邊啲該要去做，瞓身去做，你先至去做呀。期間，聽下你嘅父母講喇，我知道有好多嘅家庭分裂，細路仔點都唔聽父母講，結果出事，結果唔知幾多個家庭分裂咗，咪就係而家咁樣囉。
所以我都好希望你話你愛香港之前，愛下你嘅父母，體會下佢哋嘅心腸，唔好咁任性，唔好咁魯莽。你知道你個一--你所有嘅行動，你只係做得唔好嘅，你只係打擊佢哋。
好嘞，呢一件嘅案件你唯一，上次已經講過喇，其實事態好嚴重嘅，不過你，唯一對你嚟講係好一啲嘅，就係第一，當然你認罪喇，第二，就係當時候你去試射你呢啲咁樣嘅汽油彈嗰時候，基本上係半夜，冇咩嘢人，冇咩嘢交通，你唔係目的要去傷害任何人，係呢一樣嘢係對你係真係好嘅。
呢個嘅報告嘅建議，分別建議你去勞役中心，勞役中心過去還押咗喺勞役--過去兩個禮拜還押咗喇，剪埋個頭髮返嚟嘞，我希望你真係明白犯法嗰個後果，好多人都其實經唔起犯法之後嗰個結果。
但係本席好期望你會重新出發喇，你自己痛定思痛呀，重新出發，就係本席所講呀，冇嘢可以攔阻你繼續係去愛護香港，好好裝備你自己，將來搵一個合適嘅機會，合適嘅崗位去貢獻畀香港，而我亦都希望你會繼續咁做。
但係分辨清楚啲人喺你嘅耳仔講嘅說話，邊啲係可以做，邊啲唔做得，一做就好似你今天咁樣樣。你好快十六歲，你再唔會喺兒童庭出現喇，你會承擔個責任就遠比起做細路仔嗰個時候為高呀，所有做嘅嘢之前三思呀。
好嘞，送你去邊度呢？考慮到你過去事實上都唔係一個唔好嘅細路，你過去亦都還押咗四個月，感化官報告亦都建議呢十八個月嘅感化，你要有一段時間留番喺呢個青少年院，本席認為考慮過所有嘅因素，呢個係本席可以願意採納嘅因--一個嘅選項。
呢個嘅社會運動而家可能即將又要牽起一--唔知幾多浪呀，幾多個浪潮嘞，本席都相信喺你呢段時間，你係喺呢個青少年院嗰度生活，對你嚟講係一個嘅保護，免得你又滿腔熱血，又衝出去，又去做埋啲傻事。但係你真係希望你汲取教訓，有啲嘢唔可以一而再，再而三呀，冇得返轉頭呀，你清楚明白？
被告人：（沒有可聽見的回答）
官：好喇，感化嘅條件你清楚明白？
被告人：（沒有可聽見的回答）
官：答出聲，唔該。
被告人：清楚。
官：如果你喺呢未來十八個月之內，你違反呢個感化令，甚或犯事，咁新犯嘅事要有佢個判決之外，呢個感化官絕對有權要求將案件帶番返嚟本席呢度重新再判過，如果有咁嘅情況發生，咁你應該知道嘞，最起碼勞役中心或者更加嚴重嘅地方，就係你會去嘅下一站。珍惜與否，就在乎你嘞，明白未？
被告人：明白。
官：係咁。
MR TANG︰法官閣下，我其實...
MR TSOI︰法官閣下，有...
MR TANG︰係，你先。
MR TSOI︰唔好意思，紀錄起見，我都想睇清楚，因為有...
官：呢個...
MR TSOI︰...兩個控罪。
官：對唔住，係。
MR TSOI︰第二呢，就係始終...
官：同期執行。
MR TSOI︰係，第二...
官：好喇，仲要提醒你，係留下案底嘅。
MR TSOI︰唔該，法官閣下。
官：所以呢個就係提醒你嘅記項。
MR TANG︰法官閣下，父母有個...
官：點樣？
MR TANG︰...關注，就唔知法庭會唔會考慮需唔需要有一個進度報告返嚟，關於被告嗰個感化？
官：感化官冇呢個建議，暫時唔需要嘞，本席冇--有理由相信你喺呢個最起碼青少年院入面，你會表現良好，所以即係如果講番進度報告，幾個月嘅事，本席冇呢個憂慮，好自為之，係咁。
|