香港特別行政區 訴 余國安

HCCC130/2009

香港特別行政區

高等法院

原訟法庭

刑事案件2009年第130號

----------------

----------------

--------------------------------------------

判刑
以下內容乃法庭數碼錄音謄本

--------------------------------------------

官：　　　　被告原本被控多項控罪，不過審訊之後只有兩項成立，亦即係公訴書上嘅控罪五（猥褻侵犯）同控罪六（向16歲以下嘅兒童作出猥褻行為）。

          情節方面，兩項控罪嘅事主都係同一個人，即係被告嘅外甥女（我哋簡稱做「X」）。控罪五話X事發時十二三歲，喺屋企午睡，不過細佬就放咗上嚟探訪嘅被告入屋，結果被告登堂入室，去到佢床邊大肆非禮。即係點呢？就係掀起事主嘅上衣，撫摸佢胸部，之後伸手穿過佢內外兩條褲，直接觸摸到事主嘅下體，期間仲用手指抽插過佢嘅陰道。X係唔願意嘅，不過就由始至終裝作熟睡，被告則喺事後自行離開。

          至於控罪六，就應該係控罪五發生後一兩年間嘅事，當時X又係獨自同細佬喺屋企午睡，後來到訪嘅被告唔知點樣又走咗入房嚟佢嘅嘴同頸，跟住再伸手入佢嘅衣服，所謂上下其手，期間又用手指插入佢嘅陰道，不過呢啲都係相連嘅環節嚟嘅啫。控方針對嘅係被告之後嘅行為，即係自行脫褲，將X個頭撳向自己下體，要佢替自己口交。X話佢唔想咁做，不過就冇反抗，而被告喺隔咗一陣之後，亦自己停止咗以上嘅行為，返番出客廳。

          背景方面，被告今年46歲，香港出生及受教育至中一程度，之後做過多份藍領嘅工作，被捕嗰時候任職保安，冇刑事定罪紀錄。此外，佢結咗婚，又分居，育有兩名子女，一個21歲，一個16歲，都係學生，與妻子同住。最後，被告從多年前開始患有眼疾，到咗今天，右眼據稱已經完全失明，左眼則餘下百分之二十嘅視力。

          至於我喺本案押後期間所索取嘅背景同心理學報告，內容雖然充實，資料甚長，但係對判刑係冇直接幫助嘅，唯一嘅係心理學家指被告再犯嘅風險偏低。反之，被告對感化官同心理學家都堅稱自己無辜，絕對係冇做過啲咁嘅事。

          同樣，辯方喺求情嗰時都冇咩嘢特別嘅說話可以同被告講，律師基本上都係話本案冇使用暴力，亦都冇喺年齡同埋親屬關係以外嘅加重情節嘅因素。另外一提嘅係，我冇為受害女童攞所謂叫做創傷報告（impact report），原因係控辯雙方都認為冇咁嘅需要，據悉事件對X造成嘅損害極微，呢個同佢嘅個人背景有關，我哋喺庭上睇佢作供嗰時候，似乎呢個亦都係實情。

          無論如何，我認為被告兩項控罪中嘅行為都有高度嘅猥褻性，佢身為X嘅舅父，又涉及違反誠信，再加上X年幼，所以控罪五同六嘅量刑基準都同樣應該為4年。

          總刑期方面，考慮到數罪並罰，不能過重嘅原則，我會下令兩罪嘅刑期有兩年同期，其他分期，即係合共6年，就係咁。