[2018] HKCFI 1155 · HCCC 299/2017
HCCC 299/2017
[2018] HKCFI 1155
香港特別行政區
高等法院
原訟法庭
刑事案件2017年第299號
----------------
-------------------------------------
判刑
以下內容乃法庭數碼錄音謄本
官：
被告人係經審訊之後，被陪審團一致通過，佢所面對嘅販運危險藥物罪，罪名成立。
控罪裡面嘅毒品就係內含480克甲基苯丙胺鹽酸鹽，即係俗稱「冰」毒嘅494克晶狀固體。
咁我聽咗係蘇大律師對你嘅求情，我相信蘇大律師已經盡佢所能，將一切可以為你所講嘅求情理由都擺出嚟。咁就本席得悉案發嘅時間，或者現在，你係54歲，你喺香港出生，喺香港接受中五教育，案發嘅時候係冇職業，你已經結咗婚，有一個20歲嘅兒子，現在係同太太同埋兒子居住喺一個公共屋邨嘅單位。你報稱係一位吸毒者。
本席考慮過相關嘅判刑案例，喺販運危險藥物呢一個嘅罪名，上訴法庭就頒下咗一個判刑指引，判刑指引係喺上訴法庭嘅案件，香港特別行政區訴譚伊真，即係[2014] 3 HKLRD 691，裡面講到就係販運300至600克「冰」毒嘅量刑係15至20年監禁，咁就蘇大律師求情嘅時候講話你喺呢單案件裡面嘅角色輕微，你所係同毒品有接觸嘅時間好短，大概係分零鐘嘅時間。
本席亦都考慮過蘇大律師嘅陳詞，但係另一方面，本席亦都要顧及有其他嘅案例，即係上訴庭嘅案例講明，就係刑期主要係取決於即係適用嘅判刑範圍之下，毒品嘅數量，被告人作為信差嘅角色，並非係獲得減刑優惠嘅理由。喺呢單案，咁就雖然你嘅角色唔係信差，咁就你嘅講法係話你係幫人暫時保管呢一啲嘅毒品，咁但係根據陪審員嘅裁定，咁佢哋好明顯一致係認為你係喺當事時係知道袋裡面嘅係毒品，而你亦都接過呢啲毒品係管有佢，即係作為販運嘅用途。
咁考慮過相關嘅案例之後，本席認為呢件案件主要嘅判刑考慮都係毒品嘅重量，我亦都睇唔到有啲乜嘢特別嘅原因要我去偏離上訴法庭畀下級法庭嘅指引，咁根據呢件案件毒品嘅數量，480克嘅「冰」毒，適當嘅量刑起點就係18年監禁，咁本席就係判處你係需要入獄18年。