HCCC 83/2016
香港特別行政區
高等法院
原訟法庭
刑事案件2016年第83號
----------------
----------------------
判刑 以下內容乃法庭數碼錄音謄本
官：
被告人承認咗一項普通襲擊罪。
佢現年係43歲，過往並冇刑事紀錄，根據大律師所講，佢係大學程度，已經離婚。
大律師喺求情嘅時候指，被告一早已經認罪，初次涉及官非，而且被捕嘅時候之後已經被還押咗3個月，希望本席喺量刑嘅時候考慮呢一點。
其實本案嘅案情係好簡單嘅，被告原先係同第一控方證人係有口角，但係後來死者用一個骰盅打中被告嘅頭部，喺兩個人理論期間，被告推跌死者，之後再襲擊第一控方證人，而呢一項就係現時佢要面對嘅普通襲擊罪。呢一啲事件根本上係源自掟飛標嘅雞毛蒜皮小事，事件根本可以好輕易避免，但係好可惜，卻被發展成為一發不可收拾嘅局面。雖然被告而家已經洗脫咗誤殺嘅罪名，而本席喺判處普通襲擊罪判刑嘅時候係唔應該考慮到誤殺嘅控罪，咁但係法庭應該發出嘅信息係鏗鏘嘅，法庭絕對唔容忍任何人訴諸暴力去解決任何問題或者糾紛，即係話所有人必須具有適當管理情緒嘅能力。再者，喺本案中，當被告襲擊死者以及第一證人之後，根據影像，均冇對兩人施以任何嘅援手，只係企喺度。雖然只係普通襲擊罪，但係案件有著佢嘅嚴重性。本席認為6個月嘅量刑起點係正確嘅，由於佢認罪，所以予以三分之一嘅認罪扣減，判刑4個月。