HCCC 308/2009
HCCC308/2009
香港特別行政區
高等法院
原訟法庭
刑事案件2009年第308號
----------------
主審法官： 高等法院法官潘敏琦
日期： 2010年2月23日上午10時03分
----------------------
判刑 以下內容乃法庭數碼錄音謄本
官： 被告承認一項販運危險藥物罪，違反香港法例第134章《危險藥物條例》第4（1）（a）及（3）條。
案情指，警員截查一部停泊喺路旁嘅私家車，從被告右手嘅袋中司機位旁邊車內嘅儲物處嘅一張摺疊起嘅20鈫紙幣以及司機位左邊近手掣處搜出數包毒品。被告承認危險藥物係「K仔」，共10安重。毒品經過化驗之後，證實為277.43克粉末，內含219.91克氯胺酮。
被告現年29歲，過往有四次共五項嘅刑事紀錄，2002年因為管有危險藥物被判緩刑。佢喺2009年12月19日，因為喺2007年5月所干犯嘅入屋犯法罪，喺聆訊之後被區域法院判處監禁42個月，該案係指佢與另外四名被告潛入一貨倉偷竊MP3同埋MP4電子零件及播放器，本案係該案被告喺警察擔保期間干犯嘅。
大律師喺求情嘅時候表示，被告原本係家中嘅經濟支柱，但係染上毒癮，09年失業，經不起損友唆擺、誘使而鋌而走險，以為可以藉住販運毒品賺快錢，先至會干犯本案。大律師指，被告已經深感後悔，並第一時間認罪，彰顯悔意，希望本席能夠考慮量刑整體性嘅原則，從輕發落。
本席喺量刑嘅時候，考慮咗本案嘅案情、毒品嘅種類、重量、有關嘅量刑指引、被告認罪及大律師嘅求情。根據許守城案嘅量刑指引，販運50至到300克嘅氯胺酮，起刑點係6年至到9年。本案涉及嘅氯胺酮係219.91克，就本案嘅案情而言，本席採納8年嘅起刑點，予以三分之一嘅認罪扣減，判刑64個月。
另外，本案係喺區域法院案件471/2009一案嘅擔保期間干犯，兩案嘅刑期理應分期執行。但係本席考慮到量刑整體性嘅原則，下令本案刑期中嘅9個月與該案同期執行。