被告人你承認咗一項管有危險藥物罪，即係本案嘅第一控罪，同埋一項販運危險藥物罪，即係本案嘅第二控罪。亦都承認咗案情，被裁定兩項控罪都罪名成立。
本席喺判處嘅時候考慮咗整體情況，包括案件嘅性質同埋情節，尤其是涉案毒品嘅種類同埋份量、你嘅個人背景同埋你嘅辯護大律師嘅求情陳詞。
本案嘅案情係簡單嘅：2011年6月28日晚上大約8時45分，當你喺你住緊嘅大廈走出嚟嘅時候被警員截停，警員喺你嘅前腰同埋褲子之間搵到第一控罪所指嘅危險藥物。喺警誡之下，你話嗰啲「K仔」係你自用嘅。
之後你被帶返該大廈嘅住所，警員用喺你身上面搜出嘅鎖匙開啟咗你住所嘅門。喺該單位裡面，警員發現第二控罪所指嘅危險藥物、一個磅、一個可再封膠袋，裡面有十個可再封膠袋。喺警誡之下，你話嗰啲「K仔」係阿雄交畀你嘅，佢吩咐你稍後將嗰啲毒品送交其他人，你話你因此會得到100元嘅酬勞。
喺之後嘅錄影會面裡面，你話一名叫阿雄嘅人問你是否有興趣帶「K仔」賺錢，你話你會考慮。阿雄畀你兩日嘅時間考慮，仲同你講，如果你決定不願意嘅話，可以喺6月29號，即係你被捕之後嗰一日將毒品交還畀佢。你依照阿雄嘅吩咐，喺大廈嘅垃圾房攞到呢啲「K仔」，你從嗰一大包「K仔」倒咗一啲出嚟作為自用，其餘嘅放咗喺床下底嘅櫃桶裡面。你亦都話阿雄吩咐你將嗰啲「K仔」分為小包，每小包14克，而每小包你可以收到100元作為酬勞。當你被警員截停嘅時候，你正在前往酒吧，準備服用帶在身上面嘅「K仔」，身上面嘅「K仔」嘅份量足夠你數次服用，你打算將剩餘嘅毒品帶返屋企。你話你服用「K仔」已經有三至四年，每次支出約200至400元，每個禮拜大概三次。
本案嘅危險藥物係俗稱「K仔」嘅氯胺酮，喺你身上面嘅係內含11.31克氯胺酮嘅13.74克粉末，喺你屋企嘅係內含170克氯胺酮嘅210克粉末。
你現年24歲，案發時23歲，你並非係初犯嘅，2010年4月因為管有危險藥物，被判感化12個月，喺感化期滿之後不久就再犯案。
你嘅大律師喺求情嘅時候，向法庭講你嘅本質不壞，以前一直都有工作，喺大公司任職，收入穩定，今次犯事嘅主因係你染上毒癮。佢亦都向法庭講，你得到家庭同埋教會嘅支持，而你現在已深感後悔，被捕之後有報讀課程，希望可以改過自新。
佢亦都指出，雖然你喺知情之下為他人保管毒品，不過你已經決定將毒品交還，唔會為他人分發。佢亦都指出，被搜獲嘅毒品有部分係你自用嘅。你喺聽取大律師嘅意見之後，決定不會就這兩方面呈遞證據或者出庭作證。
本席認為你嘅做法，因為明知毒品係會出售畀他人而協助處理，已經完全咁樣干犯咗販運危險藥物罪，你決定不為他人分發出售，顧及你喺案中嘅角色同埋參與程度，本席認為可以酌量降低量刑基準，但係幅度唔應該好大。
此外，以本案嘅情況嚟講，即使你真係會保留部分嘅毒品自用，份量唔會多，而且案中嘅潛在風險實在好大，因此本席喺判處嘅時候，只會將量刑基準因為呢個因素稍微降低。
考慮咗整體情況，本席會採用以下嘅量刑基準：第一控罪，本席亦都認為潛在風險不少，因此採用21個月作為量刑基準；第二控罪，單以毒品嘅份量嚟講，本席認為採用七年三個月作為量刑基準係合適嘅，不過顧及上述嘅因素，本席採用6年作為最終嘅量刑基準。因為你承認控罪，可以得到三分一嘅刑期扣減。考慮咗整體情況，本席認為呢個就係你應得嘅刑期扣減幅度。
基於上述理由，本席判你第一控罪監禁14個月，第二控罪監禁4年。考慮咗整體量刑，命令兩項控罪嘅刑期同期執行，就兩項控罪，你要總共服刑4年。