HCCC 362/2016
香港特別行政區
高等法院
原訟法庭
刑事案件2016年第362號
----------------
----------------------
判刑 以下內容乃法庭數碼錄音謄本
官：
被告人喺席前承認一項販運危險藥物控罪。
案情撮要顯示，喺事發當日，警員截停正離開住所嘅被告人，喺進入被告人嘅住所後，住所裡面有另外兩名人士在內，喺被告人住所嘅一個房間裡面，警員喺一張檯上搜獲五包共重7.02克嘅「冰」毒、電子磅同埋吸食「冰」毒嘅工具。稍後，警員喺房裡面嘅一個紙盒裡面，警員係搜獲二十個已經盛載咗31.5克「冰」毒嘅膠袋，另外亦都搵到二百八十五個可再封嘅透明膠袋同埋更多嘅錫紙，咁喺被告人嘅身上，警員則係搜到現金一萬四千多元。及後，被告人喺會面紀錄裡面就表示部分嘅毒品係自用，咁而部分就係用嚟出售畀到佢屋企吸食毒品嘅人士。
被告人就現年57歲，就無業，咁過往就有多次嘅刑事紀錄，咁其中兩次係涉及販運危險藥物。根據辯方呈上嘅一份驗尿報告，被告人喺荔枝角拘留中心被驗出尿液中係含有安非他命危險藥物嘅成份，換句話嚟講，佢本身亦都係一名「冰」毒嘅癮君子。
代表被告人嘅梁大律師就因此表示，就案中所搜得嘅「冰」毒，實際上大部分係被告人自用嘅，咁係要求本席給予多過香港特別行政區訴周俊生（CACC 135/2011）所講及上限25個per cent嘅百分比，喺睇過案情撮要同埋係向控方作出查詢後，本席係信納呢一件案件搜獲嘅「冰」毒絕大部分係並非自用嘅，而係作販運嘅用途。喺警員進入住所之後，屋裡面有另外兩個人，而喺檯上高當時就係放有三個人嘅吸食工具，換句話嚟講，喺被告人未離開住所之前，屋裡面嘅兩個人同埋被告人正在係吸食緊「冰」毒。
從各項嘅證據亦都睇到，被告人唔單只提供「冰」毒，亦都提供吸食「冰」毒嘅場所係供其他人使用，及後警員喺房間裡面嘅紙盒裡面搜到嘅31.5克「冰」毒，呢一啲毒品分別放喺二十個可再封嘅膠袋裡面，經查詢之後，九包上高係寫有人名嘅，而七包係寫有唔同嘅數量，而四包就冇任何嘅標示。咁另外從控方呈上嘅相片，尤其是係相片第77號裡面睇到，呢個紙盒上高亦都係寫有相信係金額同埋人名嘅文字，喺考慮嘅過程裡面亦都考慮到搜到嘅二百八十五個全新嘅可再封膠袋同埋喺被告人身上高現金，咁所以本席信納紙盒裡面嘅「冰」毒全然係用作販運之用，咁本席亦都係拒絕接納喺被告人身上高所搵到嘅現金係佢嘅援助金又或者係佢嘅強積金。
若果所有當日搜到嘅「冰」毒都係作販運之用嘅話，咁量刑嘅起點就應該係八年十一個月嘅即時監禁，單就販運放喺二十個膠包總重量係31.5克嘅「冰」毒嘅量刑起點就係八年四個月嘅即時監禁，咁換句話嚟講，呢一件案嘅量刑起點就係介乎八年四個月至到八年十一個月之間。喺考慮到所有嘅因素，包括被告人嘅過往刑事紀錄同埋管有危險藥物本身亦都係一項刑事控罪之後，咁本席係認為喺呢一件案件裡面，合適嘅量刑起點就係八年零六個月嘅即時監禁。
被告人係承認控罪，可以得到三分之一嘅量刑折扣，因此就佢所承認嘅一項販運危險藥物控罪，佢係被判處係五年八個月嘅即時監禁。