|
HCCC 142/2016
香港特別行政區
高等法院
原訟法庭
刑事案件2016年第142號
----------------
----------------
| 出席人士: |
王熙曜先生，為外聘律師，代表香港特別行政區
曾藹琪小姐，由法律援助署委派的關惠明律師行延聘，代表被告人
|
| 控罪: |
[1] 販運危險藥物（Trafficking in a dangerous drug）
[2] 管有危險藥物（Possession of a dangerous drug）
|
----------------------
判刑
以下內容乃法庭數碼錄音謄本
----------------------
官：
被告人被控兩項控罪，第一控罪係一項販運危險藥物罪，第二控罪係一項管有危險藥物罪。被告人承認咗第二控罪嗰項管有危險藥物罪，但係不承認第一控罪嗰項販運危險藥物罪。經審訊之後，陪審團裁定被告人第一控罪都罪名成立。
本席喺判處嘅時候，考慮咗案件嘅整體情況，包括案件嘅性質同埋情節，尤其是相關危險藥物嘅種類同埋份量、被告人嘅個人背景同埋辯方大律師嘅求情陳詞。
本案嘅案情係簡單嘅，2015年10月26日凌晨時分，一隊巡邏嘅警員發現被告人喺街上行走，打算截停佢調查，被告人轉身逃跑，警員追截，期間被告人將帶住嘅一個環保袋掉咗喺地上面，警員繼續追截被告人，最終被告人被截停。喺被告人嘅環保袋裡面係一啲茶葉包，茶葉包裡面其實全部都係裝住毒品，呢個就係第一控罪所涉嘅危險藥物。
警員亦都喺被告人身上搜出一包毒品，以藏毒罪拘捕咗被告人。控方指稱，被告人喺警誡之下話「阿Sir，啲毒品係我自己食嘅。」呢個係第二控罪所涉嘅危險藥物。
被告人現年39歲，同未婚妻與佢哋所出嘅三名子女喺大角咀一個自置單位居住，仲需要償還按揭。子女都未成年，分別係14、12同埋8歲。被告人有中學嘅學歷，1995年輟學，輟學之後任職油漆工人，喺案發嘅時候就喺果欄工作，月入大概一萬五千元。未婚妻係護士，月入大概兩萬五千元。被告人並非初犯，佢曾經三次干犯襲擊他人與關嘅控罪、一次刑事毀壞罪同埋一次搶劫罪。
辯方曾大律師請法庭顧及今次係被告人第一次干犯與危險藥物有關嘅罪行，亦都曾經做義工，服務社會，佢亦都請法庭顧及被告人家中有三次年幼嘅子女尚在求學，亦都要供樓，而家未婚妻要獨力承擔所有呢啲家庭嘅責任。被告人嘅未婚妻同佢嘅父親都分別撰寫信件，喺信件裡面指出被告人係負責任嘅好丈夫同埋父親，希望法庭從輕。
被告人販運嘅危險藥物係可卡因，份量係內含1,409克可卡因嘅1,647.5克固體。根據AG v Chang Chen Liu Sa（[1995] 1 HKCLR 69）呢一宗案例，法庭喺判處嘅時候應該考慮英皇訴劉德明（[1990] 2 HKLR 370）一案裡面所提出嘅量刑指引。考慮咗本案嘅整體情況，本席睇唔到有咩嘢理由要偏離上述嘅量刑指引。根據劉德明案，販運呢類毒品純含量如果超過600克嘅話，應該考慮超過20年嘅監禁刑期。喺之後嘅Abdallah案（CACC 304/2008），上訴法庭指出如果所涉嘅毒品純含量係1,200克至到4,000克嘅話，應該考慮判處23至26年嘅監禁。顧及今次係被告人第一次干犯販運危險藥物罪，本席認為第一控罪應該採用23年作為量刑基準。
至於第二控罪，被告人管有嘅係內含0.32克可卡因嘅0.35克固體，本席採用12個月作為量刑基準。被告人承認咗第二控罪，因此應該得到三分一嘅刑期扣減。
顧及整體情況，包括辯方大律師嘅求情陳詞，本席認為呢個就係被告人就第二控罪應得嘅刑期扣減幅度。就第一控罪，本席睇唔到任何足可減刑嘅因素。
被告人，請起立。基於上述理由，本席就第一控罪判你監禁23年，第二控罪監禁8個月。顧及整體量刑，本席命令兩項控罪嘅刑期同期執行，因此，你就兩項控罪，總共監禁23年。
|