|
HCCC 317/2017
香港特別行政區
高等法院
原訟法庭
刑事案件2017年第317號
----------------
----------------
| 出席人士： |
徐福亮先生，為外聘律師，代表香港特別行政區 |
|
張維新先生，由陳淑雄律師行延聘，代表被告人 |
| 控罪： |
販運危險藥物（Trafficking in a dangerous drug） |
-------------------------------------
判刑
以下內容乃法庭數碼錄音謄本
-------------------------------------
官：
被告人經審訊後，被裁定一項販運危險藥物罪，違反香港法例第134章《危險藥物條例》第4（1）（a）及（3）條。
罪行嘅詳情係指，被告人喺2015年3月20日，喺香港筲箕灣港鐵站，非法販運危險藥物，即內含3.85公斤氯胺酮的5.01公斤粉末。
本案嘅案情
本案嘅證供顯示，喺事發當日傍晚七時許，被告人喺筲箕灣港鐵站往堅尼地城方向嘅2號月台，被探員截獲，喺佢手持嘅膠袋裡面搵到涉案嘅氯胺酮。
喺警誡之下，被告人承認嗰啲係「K仔」，係佢幫一個人派畀啲客，每轉收番500鈫。呢個就係本案簡單嘅案情。
被告人現年係20歲，被捕前與父母同住，有一個兄長。被告人完成咗中三學業之後，短暫就業，但係喺案發之前一年多開始就冇職業。
本案係一個相當嚴重嘅罪行。我聽取咗張大律師為被告人嘅求情，我亦都因為被告人咁年青，而被判呢一個咁嚴重嘅罪行，深感婉惜。張大律師要求本席盡量輕判。
喺考慮判刑嘅時候，我顧及女皇訴劉德明及其他人（[1990] 2 HKLR 370）裡面上訴庭有咁嘅講法：「必須謹記：販毒此類罪行極之嚴重，所以某些本可讓罪犯在罪行較輕案件中獲得減刑的求情因素，對此類罪行則作用不大，本庭所指的因素是年齡與殘障。話雖如此，極年輕的罪犯仍可能獲得特別優惠。眾所週知，毒犯進行勾當時，經常利用盲人、殘疾者、瘸子，年輕人及長者作中間人，意圖搏取法庭同情」。喺呢件案裡面，被告干犯嘅時候係大約十七歲半，唔能夠話係極年輕。
根據上訴庭就販運氯胺酮嘅判刑指引，即係上訴庭案件香港特別行政區訴許守城，販運1,000克以上氯胺酮嘅量刑基準係14年以上。亦都有其他眾多嘅上訴庭案例表明，喺判刑考慮當中，呢一類販毒案件主要嘅考慮因素係毒品嘅份量。喺呢件案裡面所牽涉嘅氯胺酮嘅淨重係3.85公斤，係屬於相當大量嘅毒品。
本席留意到有另一個法庭嘅案例，就係香港特別行政區訴單松健（[2013] 1 HKLRD 622），裡面提到係，「採納販運大量其他毒品的案例的刑期增幅比例，販運2,000克及3,000克氯胺酮的恰當量刑基準，應分別不低於18年至20年。假如氯胺酮的份量超越3,000克，量刑基準可超過20年。」呢個單松健嘅案例喺後來香港特別行政區訴周𧙗正（[2014] 2 HKLRD 632）裡面被引用。
考慮到毒品嘅份量達到3.85公斤，呢個遠超過3公斤。上訴法庭嘅雖然唔係量刑嘅指引，但係一個有份量嘅。判詞裡面講到，喺咁嘅情況底下，個量刑基準係唔應該低於20年。我亦都要考慮到被告個年紀，我唔想喺佢咁年輕嘅時候，判處一個令到佢係無法翻身嘅刑期。但係我亦都需要遵循上訴法庭嘅各種判刑原則。喺咁嘅情況底下，我認為一個合適嘅刑期係20年嘅監禁，呢個係量刑嘅起點。因為被告係被審判之後定罪，我睇唔到有任何可以減刑嘅空間。
因此，被告人嘅刑期係20年嘅監禁。
|