被告人被控四項控罪，第一項控罪同埋第四項控罪都係猥褻侵犯另一人，違反《刑事罪行條例》第200章第122（1）條；第二項控罪就係向年齡在16歲以下嘅兒童作出猥褻行為，違反《刑事罪行條例》第146（1）條；此外，第三項最嚴重嘅就係強姦罪，違反香港法例第200章《刑事罪行條例》第118（1）條。
被告人喺裁判法院交付聆訊時期，就住第一項、第二項及第四項控罪承認控罪。而案件就住強姦嘅第三項控罪，佢係由於不承認，就交付予原訟法庭開審，而喺2024年3月5日，原訟法庭亦都定下審訊日期為2024年10月25日。
就喺案件管理聆訊時，5月24號，佢透過法律代表向法庭表示係會認罪，當時距離審訊日期大約有五個月時間。終於佢喺今年6月25號，係喺我席前係承認第三項呢個強姦罪。
本案所有四項罪名都係牽涉同一名嘅受害人，該女童喺案發時年紀只係得十一歲半，而當時被告人嘅年紀係37歲，大咗佢足足係二十六年。
案發於2022年8月至9月份，案發時間，當時兩人都住喺同一個公共屋邨入面。而女童X就由於佢係讀緊小學六年班，每個星期星期一至星期六要去到屋邨裡面嘅補習社上補習班。
案情顯示2022年8月24日，當時其實X並不認識被告，但係有幾次前往補習社途中，見到被告人喺公園流連，而當時由於係8月份，佢未讀小六嘅，佢只係讀緊小五。
8月24號當日，X經過嘅時候，被告人就向佢揮手，其後被告透過X嘅朋友，攞到X手提電話號碼，並於8月25號WhatsApp X，叫X將一張自拍嘅照片發畀佢，X照做。咁然後就問及X幾多歲，X話畀被告聽，話自己係11歲。
去到8月26號，被告叫X去到佢位於屋邨裡面個住所，X當時以為其他嘅朋友都會出席，於是同意前往。抵達之後，發覺只有佢自己喺度。咁而被告將佢帶到睡房，推到床上，伸手入佢上衣，撫弄佢胸部，伸手入佢內褲狎玩佢私處，並且用手指插入佢陰道。而X亦都因為佢嘅行為感到非常疼痛，係話過畀佢聽同埋非常驚慌嘅，但係佢繼續佢嘅行為。呢個就係有關第一項控罪嘅案情。
其後，佢就將兩個人嘅衣物都除咗，然後就捉住X嘅手為佢自己自慰，然後再強逼X為佢口交，直至到佢射精為止嘅。呢個就係本案第二項控罪嘅案情。
自此之後，佢就稱呼X作為「BB」，令到X覺得自己同對方已經成為情侶嘅關係。
其後被告人要求X喺8月29日再去佢屋企見面，由於X擔心被告會將事情告訴佢嘅朋友同埋媽媽，所以佢就同意當日再去。
當日，佢去到被告屋企，被告首先就係除咗佢嘅衣服，將佢推倒床上面，「舔」佢嘅私處，並且問佢「破咗處未？」然後又問X「想唔想試下？」X就話「唔想。」但係被告就話「唔痛嘅。」於是強行就喺X唔同意嘅情況下同佢進行性交，當時並冇使用任何避孕套，而X亦都唔知道佢是否有射精，但係X感到非常疼痛。
喺呢個性交之後，佢亦都係喺離去嗰時候有問及X讀幾多年班，X話畀佢聽正讀六年班，因為當時已經係8月尾。佢叫X唔好話畀任何人聽發生咗咩嘢事，並且要刪除佢哋之間嘅WhatsApp訊息。呢個就係本案第三項控罪嗰個嘅案情。
其後，大概2022年9月某日，X同朋友喺屋邨入面碰到被告人。當佢朋友離開晒之後，被告人叫X親佢一下，X拒絕，但佢依然親吻同埋擁抱X，並且隔住上衣撫弄佢胸部兩至三次，而X當時亦都係感到害怕。
終於喺9月9號嘅傍晚，X嘅媽媽查看X手機個時候，發現有一個電話62228250嘅用戶，用戶名叫做「NN」，呢個人曾經透過WhatsApp叫X吸啜佢嘅棒子，並且話「好想妳含住我棒棒」，於是質問之下揭發本案，亦都喺9月10號向警方報案。報案之後，X進行身體檢查，發現佢感染咗砂眼衣原體，係一種經過性行為傳播嘅性病。
喺2022年11月11日，警方拘捕本案嘅被告人，而佢嘅手提電話搜出個SIM卡，電話號碼就係剛才提及嘅62228250。稍後，X喺認人手續當中，辨認出本案被告人就係WhatsApp入面自稱「NN」呢一名人士。
喺被告人認罪之後，法庭索取創傷評估報告審視X嘅狀況。根據臨床心理學家黃女士嘅報告顯示，X現年已經去到13歲，但佢明顯仍然有創傷後壓力症同埋情緒病，包括做惡夢、出現回閃、感到廣泛焦慮同埋間歇出現自殘嘅想法。而呢件事導致到佢喺結交新朋友嗰陣時候更加謹慎，亦都影響佢對異性同埋性嘅睇法，可能令佢將來難以處理親密嘅關係。而且X心存內疚，感到羞恥，以為自己應該為呢件事件負責。佢亦都採取咗一個迴避嘅態度去調適自己，呢個係一個常見嘅創傷反應，但係可能會導致佢適應不良，同埋會阻礙佢康復進展。佢嘅媽媽亦都因為呢件事係受到深遠影響，情緒變差咗，出現抑鬱症同埋壓力症。X同佢媽媽兩個人都係需要繼續接受心理嘅治療。
本案被告人現年39歲，案發時37歲，受教育至到中三程度。佢係一個離婚人士，冇兒女，案發時與父母同住。佢當時任職搬運工人，每個月收入15,000鈫左右。佢有四次刑事定罪紀錄，其中三次就係藏有危險藥物(所謂藏毒)，另外一次就係入屋爆格。
辯方大律師喺求情嘅時候，亦都有向法庭表示佢係已經戒除毒癮，已經唔再係吸毒嘅人士。佢由於呢個毒品嘅罪名於案發前一年，即係2021年5月27日，先至啱啱放監。當然，佢雖然有四次刑事定罪紀錄，但係所有四次嘅定罪都係與性罪行完全冇任何關係。
本案嘅第一、第二及第四項控罪嘅最高刑罰，喺法律上可以達至10年監禁；而第三項嘅強姦罪，最高刑罰可以達至終身監禁。
對於一個兒童嘅性侵犯，上訴庭不同嘅案例已經多次強調係非常非常嚴重嘅事件，為社會所不恥，而且法庭亦都應該判予非常嚴重嘅懲罰，以警惕其他人唔好效法，亦都要懲戒呢個當事人。
上訴庭喺好多嘅案件當中提及呢一類（包括兒童性侵）應該考慮嘅量刑因素。就住本案適用嘅，我認為有以下因素：
第一，被告人同受害人年紀嘅差異。喺本案當中，兩個人嘅年紀差異有二十六年，X當日只有11歲，而被告人已經37歲。
第二，犯罪嘅次數同埋時間。本案總共牽涉四項控罪，頭三項控罪都係喺2022年8月尾四日之內發生，但係第四項控罪就喺9月，明顯就9月9號之前，或者媽媽發現之前，咁即係話佢短短兩星期內總共有四次不同對X進行性侵犯。而且，就以頭三項控罪嚟睇，佢四日之內嘅行為係一次比一次嚴重，變本加厲，直至到最後喺8月29號嘅強姦。
此外，當佢性侵犯、尤其是強姦X嗰時候，佢冇採用任何安全措施防止傳染性病或者令佢懷孕，而結果亦都係引致X，呢個11歲嘅細路女，患上咗性病。
此外，佢嘅行為亦都對X同埋佢嘅家人，尤其是佢嘅媽媽，造成身體同埋精神上嘅創傷，呢啲都係法庭考慮到本案當中有加刑因素嘅原因。
辯方大律師陳舶港大律師喺求情嗰時候向法庭表示，被告人犯案嘅原因係由於佢冇控制到佢嘅性慾，並非佢嘅心理有問題，而且佢有悔意，重犯機會低。
陳大律師指出，本案雖然兩人相差嘅年齡為二十六年，但並非係一個最極端嘅情況。而且案件發生嘅期間，例如頭三項控罪，只係橫跨四日，喺同一場合發生，即使係全部控罪，都唔係喺一個好長時間之內發生。而佢個角色並非係違反誠信，更加冇用到更多不適當或者不必要嘅暴力令到女童受到傷害。
當然，法庭係有考慮另外一點，就係案情顯示佢曾經喺強姦之後，叫女童X要刪除所有WhatsApp聯絡，同埋稱呼佢「BB」，而令到女童覺得兩人有情侶嘅關係。
陳大律師亦都求情時表示，佢好後悔令到女童因為今次嘅性侵犯染上性病，但表示佢自己當時亦都唔知道自己有性病。當然，正如辯方正確地指出，最大嘅求情因素就係佢坦白承認控罪，但始終強姦最嚴重嗰項罪名，係喺案件審訊日期排期之後佢先至承認控罪。
陳大律師話控罪一至控罪三發生於四日嘅時間之內，希望刑期能夠大部分同期執行，而且控罪一同控罪二發生喺同一天。本案嘅案情去到控罪四，係比較案情為輕，亦都希望法庭用一個比較低嘅量刑考慮。
正如我剛才所講，向未成年嘅兒童作出性侵係非常嚴重嘅行為，為法庭所不恥，亦都為大眾所不恥，應該被判處予以比較長期嘅刑罰。
本案除咗我剛剛提及嘅加刑因素之外，法庭亦都考慮過所有案中嘅情況，尤其是係女童同埋佢媽媽所受到精神上嘅傷害。
本案強姦嘅控罪，一般嚟講，法庭如果冇任何加刑因素，會採取5年為量刑起點。
至於其他兩種嘅控罪（即係猥褻侵犯另一人同埋向年齡在16歲以下兒童作出猥褻行為），法律上最高可以監禁去到10年，但其實係冇任何特別一個量刑指引或者準則，會視乎每宗案件嘅案情而定。
考慮過本案被告人喺案發時同X嘅年齡巨大差距，佢大佢二十六年，即係兩倍都唔止。尤其是第一至第三項控罪，喺短短四日之內，佢嘅行為係一而再，再而三，變本加厲。而去到9月份，大概兩個禮拜內，佢再干犯第四控罪。佢嘅行為令到X唔單只係心靈上受到創傷，亦都係染咗性病，由於佢冇戴到安全套。X嘅媽媽亦都受到嚴重嘅情緒影響。而且佢叫X刪除啲WhatsApp，又叫佢「BB」，除咗係避免案件畀人發現之外，亦都係誤導咗X，以為兩人之間係一個情侶嘅關係，對一個咁年幼嘅女童嚟講，嚴重地歪曲佢對事件性質嘅了解，亦都令到佢錯誤地以為發生喺佢身上嘅事情係正確嘅，呢點我亦都視為一個加刑因素。
我首先就住第一、第二及第四項控罪判刑，就住第一、第二同埋第四項控罪，我考慮晒剛剛提及嘅所有加刑因素。就第一項控罪，我考慮咗案情之後，我認為適合嘅量刑起點應該係4年嘅監禁。被告人第一時間認罪，喺交付審訊聆訊嗰時候已經認罪，所以佢係應該有三分一嘅折扣。因此，就住第一項控罪，我係判佢兩年八個月監禁。
就住第二項控罪，即係發生喺同一日（8月26號），佢強逼X為佢自慰同埋幫佢作出口交，直至到佢射精為止。我以3年作為量刑起點，同樣，由於佢及早認罪，扣減三分一，於是第二項控罪嘅量刑係兩年監禁。
我考慮過兩宗控罪係發生喺同一日，但如果係完全同期執行，完全顯示唔到佢跟住所做出第二項控罪行為嗰個嚴重性，因此，我認為第二項控罪當中嘅3個月刑期應該同第一項控罪分期執行。就此，被告人就住第一及第二項控罪，總共面對嘅刑期係兩年十一個月監禁。
第四項控罪發生喺9月頭，我採取9個月為量刑起點。被告人及早認罪，可以得三分一折扣，因此，判刑係6個月監禁。
案件發生於其他控罪大概兩星期之後，考慮過整體刑期各方面嘅原因，我決定將第四項控罪監禁當中嘅其中1個月，與第一項及第二項控罪分期執行，嗰個刑期分期執行。因此，就住第一、第二、第四項控罪，總刑期係3年監禁。
就住第三項嘅強姦罪，考慮咗剛剛我所提及嘅所有加刑因素，我認為適當嘅量刑起點係8年監禁。被告人並非及早認罪，佢喺案件審訊日期被釐定之後，距離審訊日期大約五個月之前先至向法庭承認控罪。根據案例，如果案件聆訊日期被釐定之後，而喺開審第一日之前，佢應該獲得嘅扣減刑期，應該係百分之二十至百分之二十五嘅刑期扣減。考慮到本案佢認罪嗰個時間個情況，同埋都係有五個月，而係未開審，控方不至於浪費太多人力物力準備審訊期間嘅事項，因此，我決定畀佢百分之二十四嘅刑期扣減（24 per cent）。8年嘅刑期喺扣減咗百分之二十四之後，我係判佢就第三項控罪六年一個月監禁。
考慮過所有四項控罪整體嘅刑期長短，我決定將第一、第二，第四項嘅刑期當中嘅3個月與強姦罪嘅刑期分期執行。因此，總刑期係六年四個月監禁，即係76個月。
被告人就住本案四項控罪係被判六年四個月監禁。