HCCC 223/2016
香港特別行政區
高等法院
原訟法庭
刑事案件2016年第223號
----------------
----------------------
判刑以下內容乃法庭數碼錄音謄本
官：
被告人喺席前承認一項販運危險藥物控罪，違反《危險藥物條例》第4條。
案情撮要係顯示，被告人喺事發當日嘅凌晨時分被警員截停。警員喺較早時分觀察到被告人從一架私家車落車之後，將一個黑色嘅膠袋就係丟喺馬路旁堆放咗水樽嘅地方，警員見狀就上前向被告人作出詢問，被告人並冇回答。警員檢查黑色膠袋裡面嘅東西，懷疑係毒品可卡因。而喺警誡之下，被告人表示「阿Sir，我都係搵食啫，畀次機會。」警員及後進一步搜查涉案嘅私家車，喺車裡面一個暗格內再搜獲係懷疑嘅可卡因。
經過政府化驗所嘅檢驗之後，涉案嘅懷疑毒品證實係可卡因，共重係234克，零售價就係約為係280,000港元。
被告人現年就係37歲，咁係有一項管有危險藥物嘅刑事紀錄。喺求情嘅時候，律師表示涉案嘅毒品部分係被告人自用嘅。
就住量刑方面，上訴庭已經有清晰嘅量刑指引，販運200至400克嘅可卡因，量刑嘅起點係12到15年嘅即時監禁。今次涉案嘅可卡因份量係234克，量刑嘅起點因此係會高於12年。喺今次嘅案件裡面，因為被告人聲稱部分係自食嘅，咁即使其中嘅34克係自食，量刑嘅起點亦都最少係12年。當然，管有危險藥物本身亦都係一項嘅刑事控罪。
喺考慮過以上所述之後，喺呢一件案件而言，本席係就以12年嘅即時監禁作為量刑嘅起點，咁被告人係承認控罪，佢可以獲得過往一般嘅三分之一量刑折扣，因此，就被告人所承認嘅一項販運危險藥物控罪，佢係被判處8年嘅即時監禁。