咁被告承認控方提交嘅案情撮要，簡單嚟講，喺去年3月左右，被告人係到咗兩名受害人開嘅時裝店鋪，要求修改佢先前買咗嘅衫，但係袁先生就未能提供有關嘅服務，被告就離開咗。咁到咗5月中，被告又返番去鋪頭，要求袁先生替佢改衫袖，雙方出現爭執，被告嘅情緒開始激動，仲講咗一啲恐嚇性嘅說話。咁袁先生嘅妻子尹女士都上前係與被告理論，並話會報警求助。被告就離開咗店鋪，但係無幾耐返轉頭，將膠樽裡面嘅液體潑落袁先生嘅身上。袁先生感覺到呢啲係腐蝕性嘅液體，所以就立刻用水沖洗。當時尹女士見到就試圖將被告係推出鋪頭門外，但係被告亦都將液體係淋向尹女士嘅面部同身體，令佢係感到痛楚。
袁先生同埋尹女士都話案發之前佢哋係唔認識被告嘅。警方後來到場調查，發現被告用嘅係九成幾濃度嘅硫酸。事後袁先生同埋尹女士都有被送去醫院治療，袁先生全身有百分之五嘅皮膚燒傷，程度達到兩級。佢嘅左面頭皮、左手臂、右前臂、胸壁，同埋喺大腿上面都有發現灼傷。袁先生喺做咗手術後十三日先至出院，但係要繼續接受門診嘅治療，而家都係要做呢個物理治療嘅。至於尹女士，佢嘅傷就係非常之嚴重，佢身體表面總共有百分之二十三嘅皮膚被灼傷，部位包括面、頭、頸、身軀同埋四肢。佢要被送去深切治療部治理。佢曾經係出現休克，仲要接受好幾次嘅燒傷手術。之後佢長時間係留喺醫院做唔同嘅手術。
本席睇過兩名受害人嘅照片，咁尹女士嘅傷勢的確係非常嚴重，而最主要嘅，係不幸地，尹女士可以話已經係被毀容，又因為皮膚嘅變形，好明顯尹女士以後都要繼續忍受身體同埋精神上極大嘅痛苦。幸運地，袁先生嘅情況相對嚟講比較好啲，但係佢面部同埋胸口都有係幾嚴重嘅疤痕。
本席係先取得咗兩份嘅精神科醫生報告。其中周醫生嘅報告好詳細咁分析咗被告嘅背景同埋佢嘅精神狀態。周醫生指被告一直有酗酒嘅問題，因此出現與飲酒有關嘅精神病態。但係就呢件事之後，因為佢已經冇機會飲酒，又得到治療，佢現時情緒係平穩，亦冇表現出有精神異常嘅病態。醫生認為佢毋須進入精神科醫院係留醫。另一位嘅廖醫生基本係贊同周醫生嘅結論。
被告今年60歲，無業，有五次嘅刑事紀錄，包括攻擊性武器喇，同埋係刑事毀壞等。
被告代表大律師求情嗰陣時遞交咗兩封求情信，一封係被告打算寄畀受害人嘅信件，佢向受害人係道歉，話自己好內疚同埋難過。另一封係被告弟弟寫嘅求情信，內容提到因為呢件事被告係未能送佢媽媽嘅最後一程。佢亦講到被告係因為妻子離開咗佢，對佢造成打擊，令佢成日係以酒澆愁，但又買唔起好酒，可能係飲得多啲假酒而引致呢個精神出現問題㗎喇。而家佢女兒已經係成人，佢希望法庭可以係較為寬大咁樣處理呢一件案。是大律師向法庭指出，被告弟弟所寫嘅信其實都反映咗被告自己嘅心聲，是大律師要求法庭係可以盡量輕判。
是大律師亦都提供咗幾件案例畀法庭參考，包括龍考連、黃安年（譯音）、黃安麗（譯音）、黎碧玲（譯音）等幾件案例，睇嚟就呢類案件嘅刑期基準嘅幅度，可以係由10年至到15年，咁以本席嘅理解，法庭亦曾經喺一件案係用過18年作為刑期嘅基準嘅。當然訂出呢個刑期嘅基準，都要視乎案件嘅情況同埋案件特別嘅--尤其是係傷勢等等方面。但係其實喺1995年嘅黃安年呢一件案裡面，上訴庭嘅基本指引係話呢啲案刑期基準應該係15年嘅，因為對呢啲危險嘅行為，法庭應該用強烈嘅阻嚇性刑罰。咁本席係認同呢個原則嘅，因為被硫酸傷害嘅人所受嘅身體同埋精神嘅痛苦會係極之大嘅，佢哋亦要面對長時間嘅治療，係影響一生嘅事情。以本案嘅情況嚟講，法庭去決定適當嘅刑期都唔係話好容易嘅，一方面，受害人，尤其是係尹女士嘅傷勢係確實非常嚴重；另一方面，被告都係因為際遇嘅問題而酗酒，影響佢嘅神智。被告基本與對方並冇乜嘢深仇大恨，如果唔係佢神智出現問題，應該唔會咁樣做。但係被告飲酒唔識得節制，令自己神智都飲到出現問題，並因為咁嘅小事竟然用硫酸去報復傷人，某程度上佢係算得為社會上危險嘅人物。
經考慮之後，又根據上訴庭喺龍考連一案嘅提示，本席認為基於本案嘅情況，兩名受傷者嘅傷勢，以及被告本身嘅特別精神狀態，就第二項控罪，本席係會以12年作為刑期嘅基準，而第一項控罪則以9年作為刑期嘅基準，因為被告認罪，所以減去三分一，刑期變成係8年同埋6年。
咁再考慮到整體刑期方面，本席會有以下嘅處理：第一項控罪6年中嘅兩年與第二項控罪嘅8年分期執行，因此總刑期係10年。
咁本席係衷心希望兩名傷者係更加快咁樣能夠康復嘅。