HCCC 219/2015
香港特別行政區
高等法院
原訟法庭
刑事案件2015年第219號
----------------
----------------------
判刑
以下內容乃法庭數碼錄音謄本
官：
被告承認一項販運危險藥物罪，違反香港法例第134章《危險藥物條例》第4（1）（a）及（3）條。
案情指，被告從中國嘅中英街進入香港境內，警員喺公廁外截查佢，發現佢嘅下體位置隆起。被告按警員指示從佢嘅內褲內攞出入面有三包毒品嘅環保袋，被告承認危險藥物係「K仔」，係一個內地人叫佢幫忙帶番香港。毒品經過化驗之後，證實為276克粉末，內含199.53克氯胺酮，而毒品當時嘅零售價為港幣34,776元。
被告現年22歲，過往曾經有一次喺2008年管有危險藥物嘅刑事紀錄，最初被判感化令18個月，但係後來因為違反感化令再被法庭將原有嘅感化令延長至36個月。
大律師喺求情嘅時候表示，被告案發嘅時候係一名散工，月入約12,000元。佢喺大陸認識咗一個朋友，個朋友叫佢帶毒品，從大陸帶毒品嚟粉嶺，會給予1,500元報酬，而今次佢係未獲取報酬已經被捕。大律師亦都指佢係因為一時貪念，冇考慮到後果嘅嚴重性，先至干犯本案。大律師亦都指佢喺被捕嘅時候，第一時間認罪，嚟到法庭亦都及早認罪，彰顯悔意，希望本席能夠從輕發落，以一個較低嘅起刑點。
本席喺量刑嘅時候考慮咗本案嘅案情，毒品嘅種類，重量，有關嘅量刑指引，被告認罪，大律師嘅求情。根據許守城一案嘅量刑指引，販運50至到300克氯胺酮起刑點由六年至到九年，而大律師所呈遞嘅黃秋龍（譯音）案（HCCC 112/2015）屬原訟法庭案件，判刑對本席冇約束性，只有參考價值。而本案涉及嘅毒品係199.53克嘅氯胺酮，就本案嘅案情而言，本席採取一個8年嘅起刑點，另外因為跨境因素往上調九個月，再予以三分之一嘅認罪扣減，判刑70個月，即係五年十個月。