HCCC 77/2014
香港特別行政區
高等法院
原訟法庭
刑事案件2014年第77號
----------------
---------------------- 判刑 以下內容乃法庭數碼錄音謄本 ----------------------
官：
被告承認一項販運危險藥物罪，違反香港法例第134章《危險藥物條例》第4（1）（a）及（3）條。
被告喺街上被警員截查，喺佢個褲袋內發現嘅黑色膠袋，入面有兩個可再封袋，入面係載有毒品嘅，期後警員再喺佢身上搜出四部嘅無線電話。毒品經過化驗之後，證實為163.22克固體，內含122.51克嘅可卡因，毒品當時嘅市值係211,500元。被告承認替人運送該些可卡因會獲得1,000元嘅報酬，而當時正在按指示，將攜帶嘅毒品運交他人。
被告現年38歲，有六次嘅定罪紀錄，當中涉及黑社會、入屋犯法罪、勒索、行劫等，最後一次係喺2002年1月23號，因為販運危險藥物被判監八年半，佢2007年8月獲釋。
大律師喺求情嘅時候表示，被告係家中嘅獨子，雙親年事已高，而父親亦都患有精神病，需要母親照顧。喺事發嘅時候，被告因為失業，而女友剛誕下女兒，先至因為想賺快錢而干犯本案，現在已經深感後悔，故此佢認罪，以及竭盡所能向警方提供有用嘅資料，以彰顯佢嘅悔意，希望能判以較輕嘅刑期，好讓佢刑滿出獄之後照顧父母。
本席喺量刑嘅時候考慮咗本案嘅案情、毒品嘅種類、重量及有關嘅量刑指引、被告認罪，亦都考慮咗大律師嘅求情，閱讀咗被告以及更生會所撰寫嘅求情信。喺毒品案件嚟講，最重要嘅考慮因素自然係毒品嘅重量。喺本案嘅毒品重量，根據量刑指引，販運可卡因重量係50至到200克，起刑點係8至到12年。就本案嘅毒品重量122.51克嘅可卡因，本席認為一個審訊後嘅刑期應該係10年。予以三分之一嘅認罪扣減，判刑係80個月，即係六年八個月。