香港特別行政區 訴 陳志銘

HCCC 288/2016

香港特別行政區

高等法院

原訟法庭

刑事案件2016年第288號

----------------

----------------

----------------------

判刑
以下內容乃法庭數碼錄音謄本

----------------------

官：　

被告陳志銘被控兩項販運危險藥物罪，違反香港法例第134章《危險藥物條例》4（1）（a）同埋（3）條，被告人喺裁判官席前已經承認咗兩項控罪，係交付嚟高等法院原訟庭判刑。

咁案情就顯示喺2015年10月8號，當時就有一隊警方嘅人員係進行呢個反毒品嘅行動，就喺九龍城嘅地方截停咗被告人，當時被告人就係有一個環保袋嘅，警方人員喺被告人孭住嗰個環保袋入面就搵到四十個係載有懷疑氯胺酮嘅毒品嘅物體，當時就拉咗被告人你，就用呢一個販運危險藥物罪拉被告人。

被告人警誡之下就承認就話佢係幫人睇倉，嗰啲「K仔」就係幫人「拖」落樓嘅，咁即係承認咗販運，跟住被告人就帶咗警方人員就去到呢個啟德道一個地方，其實就係一個儲存倉嚟嘅，咁警員喺入面就搵到係載有懷疑係氯胺酮嘅物體，仲有一啲係包裝嘅用品，包括係有封口機、電子磅咁樣。警方人員就再一次用販運危險藥物嘅罪名嚟拉被告，喺警誡之下，被告就話明白喇，就話佢係冇錢使，就幫人睇住喺嗰間房入面嗰啲「K仔」，同埋收到order就會幫人磅好啲「K仔」就送落樓畀人嘅。

而最後經過咗化驗師化驗之後，證實喺嗰個環保袋入面嘅就係內含152.40克氯胺酮嘅301.30克固體，而喺嗰間屋入面搵到嘅就係呢個內含65.1克氯胺酮嘅114克固體。而被告人後屘就參與咗一個錄影會面，咁詳情就唔使講喇，就喺入面佢就提及到就有一個佢唔識嘅即係唔知名嘅男子就介紹佢去做呢份工作，咁因為佢為咗要交學費，為維持生計，於是就同呢個人做，就係人哋畀咗鎖匙佢，佢就喺嗰個所謂倉就睇住啲毒品，咁就然後秤啲毒品，包裝，收到呢一個order嘅時候就係幫人送貨嘅，每日賺就係500鈫嘅報酬，而今次畀人拉嘅時候就係啱啱係喺送貨嘅途中。基本上呢個就係被告人承認咗嘅案情。

咁而都講埋個毒品嗰個市值，當時喺2015年10月嘅市值就大概係53,158鈫。

被告人嘅背景

被告人21歲，而家21歲，犯案嘅時候20歲，未犯案之前就係同父母同埋其中一個哥哥就住埋一齊嘅，住公屋，冇先前犯罪嘅紀錄，就讀緊書嘅，嗰陣時，喺呢個浸會大學度持續進修嗰度讀緊文憑嘅課程，而代表被告人你嘅莊大律師就話畀本席聽，因為被告人你讀完咗中六之後就喺呢個浸會大學度讀呢一個持續進修嘅課程，咁就要畀18,100鈫嘅學費，因為自己又冇錢，所以爸爸就幫你畀咗先，咁被告人因為心急想還番錢畀屋企人，因為屋企家境唔好，所以就去做呢一個兼職，同埋好蠢咁樣受到一啲不良份子嘅誤導影響就同意咗去干犯販運危險藥物呢個咁樣嘅情況，被告而家就非常之後悔，同埋最早喺裁判署就已經承認咗控罪。

被告人本身亦都寫咗一封求情信係畀本席，被告人最主要係講到係點樣後悔做咗而家呢件事，知道自己所做嘅嘢係會影響他人，亦都喺嗰個信件入面係顯示到點樣珍惜屋企人對自己嘅關懷同埋亦都係講到就下定決心會重新做人，就會繼續喺嗰個監倉入面係讀適合自己嘅課程嚟進修，咁希望將來出嚟之後就可以重新做人，亦都保證承諾唔會再犯法。除咗被告人自己之外，被告人媽媽、被告人以前讀書學校嘅兩位老師，有一位係一個教會嘅一個基督徒，同埋係一個社區即係黃大仙區嘅議員，全部都係分別寫信畀本席，咁我唔提佢哋嗰啲詳細內容，基本上都係話即係被告人本來就係品性良好，即係對於你犯咗而家一個咁嚴重嘅控罪，都表示即係有啲驚訝喇，可以講，同埋就希望本席係盡量輕判嘅，畀機會你。

販運危險藥物罪係一個非常之嚴重嘅罪行，一個人如果係經公訴罪行下係判罪名成立，係可以被判終身監禁同埋罰款係五百萬，今次被告人你係承認咗兩項控罪嘅，兩項都係販運危險藥物罪名，不過考慮到兩項控罪係同一日發生，亦都係可以講係非常之有連繫嘅，呢兩件事件，所以本席就係將兩項控罪嘅氯胺酮加埋一齊，就係一次過嚟判刑，而唔係分開兩條控罪嚟判刑，咁加埋一齊就係217.5克，217.5克，係。咁好喇，217.5克就睇番上訴庭喺一宗叫做許守城嘅案件就頒下咗量刑指引嘅，就係話如果係販運氯胺酮某一個數量，嗰個判刑要係幾多。因為217.5克就係符合50至300克嗰個範疇，50至300克，上訴庭話嗰個量刑起點係要6至9年嘅，被告人喺呢件案件其實嗰個做嘅嘢，可以講，扮演嘅角色其實就係嚴重過一個普通就咁幫人帶毒品嘅人，因為被告你睇住個倉，咁樣喺個倉度睇住啲嘢不特只，又要磅、又要包裝，收到呢一個order嘅時候又要去送貨，又要收錢，其實做多咗好多嘅工夫，所以喺呢個罪行嗰方面係較為嚴重嘅，明白到喇。考慮咗呢件案件所有案情，即係被告尤其你嗰個扮演嘅角色同埋毒品嘅份量，本席就認為一個恰當嘅量刑起點係8年。

其實喺法庭嚟講，係須要判一個咁年輕嘅人，又先前未犯過事嘅人去坐監，都係覺得好可惜嘅，但係被告人你所干犯嘅控罪係真係好嚴重，同埋對我哋整個社會影響係好深遠，咁我都接納被告人你係真正有悔意，我亦都希望你係真係會遵守你自己對屋企人同埋對你自己嘅承諾，喺呢個監倉入面係盡量搵到適合你自己去進修，然後出咗嚟之後係唔再犯事，但係最主要其實都係要係你本人落個決心嘅，即係屋企人對你幾大支持都好，如果你自己唔做係冇用嘅。不過呢個就唔可以構成一個求情嘅理由，唯一求情嘅理由就係你喺最早有機會嘅時候已經認罪，咁呢個亦都係好明顯顯示到你係有充份嘅悔意，由於呢一個嘅求情，即係你充份悔意可以求情嘅理由，我就係會畀你一般三分之一嘅刑期扣減，即係用8年做呢個量刑起點，畀三分之一刑期扣減。頭先都講咗喇，你其他嗰啲承諾或者你家境係幾困難，呢啲都唔可以係一個特別嘅理由係令到法庭係可以再將呢個刑期係嚟遞減嘅，明白喇嘛？所以正式嘅判刑就以8年做量刑起點，減咗三分一就係五年四個月，第一項控罪，五年四個月；第二項控罪，都係五年四個月，同期執行，即係夾埋晒都係五年四個月。

如果分開嚟睇就好似話五年四個月好重，即係如果分開兩項控罪，就咁睇嗰個份量，但係因為而家我哋將兩項控罪加埋一齊嚟做，而唔再咁麻煩去計番開邊條呢幾多、幾多，所以就咁係第一項控罪，五年四個月；第二項控罪，都係五年四個月，夾埋係一齊同期執行，都係五年四個月。