呢一件案係涉及喺2011年1月兩晚嘅事情。一共有五名被告先後被警方拘捕嘅。控方成功申請將兩件案件合併處理之後，幾名被告面對一共十三項控罪嘅公訴書。本席現時係依據番原本合併後嘅，未有任何修改嘅公訴書，而去作出判刑嘅，即係10月31號嘅嗰一份。
控罪嘅內容包括有施用藥物罪、強姦罪、猥褻侵犯罪、與未成年女童性交嘅交替控罪等等；個別嘅被告有承認某項嘅猥褻侵犯罪同交替性交控罪，但基本全部被告係否認控方嘅主要指控，即係施用藥物同埋強姦控罪嘅。
經過審訊之後，陪審員作出以下嘅裁決：第一項施用藥物罪，第一、二、三、四被告，罪名成立；第二項施用藥物罪，第一、二、三、四被告，罪名成立；第三項強姦罪，第一、二、三、四被告，罪名成立；第四項強姦罪，第一、二、三、四被告，罪名成立；第五項猥褻侵犯罪，第二被告在法庭指引下，裁定罪名成立；第六項施用藥物罪，第一、三、五被告，罪名成立；第七項施用藥物罪，第一、三、五被告，罪名成立；第八項施用藥物罪，第一、三、五被告，罪名成立；第九項猥褻侵犯罪，第一同五被告，罪名成立，而第二同第三被告係認罪嘅。
至於其他幾項控罪，即係第十項嘅強姦罪、第十一項嘅交替非法性交罪、第十二項嘅強姦罪、第十三項嘅交替非法性交罪，結果係第一被告被判第十三項罪名成立，第三被告就承認咗第十一項罪名，咁其他被告就呢啲控罪係不被定罪嘅。
因為案件涉及未成年嘅女童，本席就先決定取得呢個被告嘅心理專家報告，以作判刑嘅參考。就第五被告方面，本席亦都攞咗佢嘅背景報告。本席注意到根據專家所講，並冇證據顯示其中嘅被告有孌童癖或者其他不正常嘅心理傾向，重犯機會亦都唔算高嘅。雖然第五被告以往有兩次嘅刑事紀錄，但本席喺判刑時係唔會理會嗰兩次嘅紀錄。其他被告就係冇刑事紀錄嘅。
控方就提交咗第一晚涉案嘅受害女童X同埋Y嘅心理傷害評估報告畀法庭參考。姑勿論X同Y喺事發之前嘅性格或者生活方式係點，佢哋都因為呢件事，明顯受到頗為嚴重嘅打擊，專家都建議佢哋係要接受心理治療同埋輔導嘅。
就施用藥物同埋強姦控罪嘅指控，有關嘅被告一直都係否認嘅。控方嘅證據就指出兩案嘅女童都係被，食咗其實係安眠藥嘅所謂解酒丸，係每人三粒，之後再有性交行為發生。喺施藥嘅環節上，各名被告都推說話唔知道係邊個畀嘅、冇見到、冇聽到，總之係唔知道，之後嘅性行為或者性交行為，辯方整體嚟講，就係話佢哋個別嘅當事人一係冇做過女童所講嘅事情，一係就係喺女童嘅同意下發生。當然，陪審員就住本案嘅證供、證據已經作出咗裁決。好明顯，陪審員並不接納被告嘅證供同埋辯方嘅陳詞，喺施藥方面，裁決顯示相關被告係共犯，即係話佢哋知情，有份參加。本席嘅責任係要根據陪審員嘅裁決同埋有關嘅情況去作出判刑。
本案嘅證據顯示，幾名被告中最年輕，而仲係學生身分嘅第一被告會上網認識女仔，亦好明顯因為佢嘅年紀輕，佢更加有大機會可以接觸到年輕嘅女仔或者女童。之後第一被告就會約對方出街，再用機會帶對方上去佢哋自己嘅地方，先一齊同啲女仔玩遊戲，大家飲酒，然後提出畀佢哋食解酒丸，其實嗰啲就係安眠藥，之後各被告就喺啲女童失去或者減低反抗能力嘅情況下侵犯佢哋。喺咁嘅情況下，各被告當然唔需要使用太大嘅武力，就可以為所欲為。
雖然第二晚嘅強姦控罪並不成立，但係各被告喺呢兩晚表現出合作，同埋有配合嘅行動，以施用藥物想得到性嘅發洩嘅意圖係明顯不過。本席認為呢一種行為係嚴重嘅罪行，某程度上，各被告對年輕女孩嚟講，甚至可以話係危險人物。當然，各位辯方大律師有好詳細咁替被告係作求情，係講盡好說話，本席並唔排除對佢哋嘅家人嚟講，個別被告都係好兒子、好兄弟、孝順、顧家等等，但係呢啲情況並不能抵銷被告人對受害女童所造成嘅傷害。
個別替被告編寫求情信嘅家人或者朋友亦有提出，話被告係誤交損友。本席當然理解佢哋係想替被告求情，但係各被告都係成年人，佢哋想同邊個結交係佢哋嘅決定。從本案嘅細節睇嚟，本席認為絕對冇「誤交」嘅呢一回事；如果係「損友」嘅話，佢哋係大家嘅損友。比較可惜嘅係第一被告，以佢嘅宗教教育背景，佢又係有讀書能力嘅人，佢應該專心向學，同對自己有一定嘅道德要求，現時先至去推說話誤交損友，實在令人覺得係驚訝嘅。但本席希望佢對家人所作出嘅努力承諾，真係可以達成。
至於各位辯方大律師嘅求情說話，本席已經重溫同埋考慮過。喺佢哋--即係被告人個別嘅家庭同埋背景嘅事情上，本席唔可以話呢一方面對判刑有任何嘅作用，尤其係幾位女童需要上庭作供，又要接受係詳細嘅盤問。當然我要接納一點，各位辯方大律師都冇蓄意咁樣去令女童證人係更加難受同埋尷尬嘅。
根據上訴庭喺譯音胡志強一案中指出，施用藥物以便利作非法性行為嘅罪，本身已經係一項嚴重嘅罪行。喺分析過呢一件案嘅環節之後，上訴庭將原判嘅判刑提高至6年。當然呢個判刑並非係一個指引，而判決係建基於該案嘅特別情況。
喺本案嚟講，本席要考慮到嘅係包括被告女童所食嘅藥物嘅藥性、數量，同埋被告之後有關嘅行為。另一方面，本席認為尤其係第一晚而言，被告畀女童食藥之後嘅實際情況係幾個被告人先後侵犯女童，俗語所講，呢個情況係所謂輪姦，咁嘅情況會令受害女童所受嘅心理打擊同埋烙印係會更加嚴重嘅，呢個因素應該反映喺整體判刑上。但係最終嚟講，本席係需要考慮到整體判刑嘅因素。
經過考慮之後，本席有以下嘅決定。就第一項控罪，本席會以7年作為刑期基準；就第二項控罪，本席都係以7年作為刑期基準；就第三項控罪，本席係會以8年作為刑期基準；第四項控罪，本席會以8年作為刑期基準；第五項控罪，本席會以3年作為刑期基準，但係因為第二被告係承認嘅，所以扣減三分一之後，變成兩年；第六項控罪，本席會以6年作為刑期基準；第七項控罪，本席會以6年作為刑期基準；第八項控罪，刑期基準都係6年；第九項控罪，本席會以3年作為刑期基準，第一、第五被告係被定罪，因此唔會得到扣減，第二同第三被告，因為佢哋認罪，可以得到扣減，刑期變為兩年；第十一項控罪，第三被告承認咗非法性交，本席會以4年作為刑期基準，而扣減後得到係兩年八個月；第十三項控罪，第一被告係被定罪嘅，本席以4年作為刑期基準，咁就冇呢個扣減喇，咁所以刑期係4年。
考慮到整體刑期方面，就第一被告嘅情況，本席會有以下嘅調整。第一、二、三、四項控罪同期執行，即係一共8年；第六、七、八、九、十三項控罪同期執行，即係6年。呢兩組嘅刑期分期執行，即係14年。雖然第一被告有帶頭嘅行動，但係考慮到佢始終係較為年輕，咁本席會酌情減1年，即係刑期為13年。
第二被告方面，第一、二項同期執行，即係7年；第三、四、五、九項同期執行，即係8年。8年年期中嘅4年，同第一組嘅7年分期執行，總刑期係11年。
第三被告方面，第一、二、三、四項同期執行，即係8年；第六、七、八、九、十一項同期執行，即係6年。第三被告嘅第十一項只係非禮，而唔係話非法性交罪，而佢係自己承認嘅。經考慮後，本席決定將嗰6年嘅其中4年，同第一組嘅8年分期執行，總刑期係12年。
第四被告方面，第一、二項同期執行，即係7年；第三、四項同期執行，即係8年。第二組嘅8年之中嘅3年，同第一組嘅7年分期執行，總刑期係10年。
第五被告：第六、七、八項同期執行，即係6年；第九項係3年。3年中嘅1年同第一組嘅6年分期執行，總刑期係7年。