DCCC 520/2009
DCCC520/2009
香港特別行政區
區域法院
刑事案件2009年第520號
----------------
主審法官：
區域法院法官容耀榮
日期：
2009年8月24日上午11時22分
出席人士：
Mr M F Tang，為外聘律師，代表香港特別行政區 Mr Lee Kwok Chuen Victor，由法律援助署委派的黃國康律師事務所延聘，代表被告
控罪：
販運危險藥物（Trafficking in a dangerous drugs）
判刑理由書
1. 販毒方式可以講話比第一件案件比較嚴重啲，你參與程度係多過一啲嚴重個案，好多案帶毒，但係個嚴重性都唔係高好多嘅啫。你律師亦都係要求法庭採納上訴庭就呢個情況所提議嘅方式，法庭已經講過，你本身嘅背景、年紀等等都唔係特別嘅求情因素，判刑亦都主要係考慮毒品嘅數量。法庭亦都係採納你律師所提議嘅運算方式，法庭亦都認為佢所計算出嚟嘅量刑起點係合適嘅，法庭亦都嘗試用其他嘅方法計算呢個量刑起點，得出嘅結果亦都係差唔多，所以法庭認為採納上訴庭，採納你律師提議嘅計算方法比較準確。所以法庭考慮過犯案嘅環境等等，法庭認為量刑起點應該係五年半嘅，正如你律師所提議。
2. 任何人，無論係十惡不赦、案底纍纍、犯案後誤導警方或者拒絕協助警方，堅拒不認罪，嚟到法庭如果認罪，都有三分一嘅判刑，所以法庭就畀呢個三分一寬免，你亦都唔需要多謝法庭，你要多謝上訴庭所訂立嘅規定。
3. 正如喺上一件案件講過，法庭認為喺第二件案件入面亦都係坦白同警方認罪，至於冇進一步講嘢，呢啲係你自己嘅選擇，可能幫助唔到警方繼續跟查其他涉案嘅有關人士，但係你本身件案件在某程度上係慳咗警力，你係認自己嘅罪行嘅，上一件案件法庭都同你講過，既然上到法庭認罪或者上到法庭先認罪，都有三分一嘅，如果一早認罪嘅，亦都應該有額外，象徵式，起碼都象徵式嘅減免，法庭亦都唔可以畀太多嘅減免，因為已經定咗三分一嘅減免你㗎喇，咁一樣，法庭認為可以再減免多兩個月。
4. 咁呢件案，無論同第一件案已經相隔嘅時間嚟睇，同埋個事實就係你係擔保期間、候審期間犯案嘅，所以冇可能係同期執行，你律師亦都冇要求，非常之正確，但係法庭亦都會考慮到呢兩件案件嘅性質非常相似，最重要就係考慮到個總體刑期唔應該太過苛刻，所以最佳嘅方法就係唔係喺呢件案減刑，而係部分刑期同第一件案件同期執行，呢件案件頭先已經講過喇，總共係66個月去到減24個月，咁換句話講，09年犯嗰件案件法庭判你監禁42個月，其中12個月就同案件324同期執行。