|
HCCC 407/2015
香港特別行政區
高等法院
原訟法庭
刑事案件2015年第407號
----------------
----------------
| 出席人士： |
律政司署理高級檢控盧萃瑩女士，代表香港特別行政區 |
|
被告人，無律師代表 |
| 控罪： |
[1] 販運危險藥物（Trafficking in a dangerous drug） |
|
[2] 管有危險藥物（Possession of a dangerous drug） |
----------------------
判刑
以下內容乃法庭數碼錄音謄本
----------------------
官：
被告人被控兩項涉及毒品嘅控罪嘅，第一項就係販運毒品罪，第二項係管有毒品罪，兩項罪名都係涉及「冰」毒。販運嘅係678克嘅「冰」，然後管有嗰方面就係0.04克嘅「冰」毒。
被告人喺裁判法院嘅時間已經係承認控罪，案件係轉介到原訟庭係判刑嘅，但係在應當判刑嘅嗰一日，即係1月5日，被告係向法庭要求將案件押後，因為佢想家人係幫佢安排私人大律師作求情。當天被告嘅母親亦都喺法庭嘅，睇嚟被告同家人喺安排私人律師方面嘅溝通就唔係太清楚嘅，無論如何，本席都已經將案件押後到今日，好讓被告同家人去處理聘請法律代表嘅事情，但係本席亦都提醒過被告嘅，如果下次係仲未有律師代表，法庭未必會再批准將案件押後，佢可能要自己進行求情；本席亦都大概講咗求情嘅程序。到咗今朝，被告人就向本席表示，佢嘅家人未能夠同佢安排到私人嘅律師，但係佢確認佢係承認控罪，佢話會自己進行呢個求情。
控方嘅代表喺法庭上，就再將呢個案情讀出，被告表示同意嘅。案情其實就好簡單，被告人喺案發當天，佢係打算從羅湖呢個管制站嗰度係入境，就被海關人員截停，仲進行搜查，喺佢嘅手提行李入面搵到第一項控罪嘅毒品，亦都喺佢身上搵到第二項控罪嘅毒品。
背景口供就顯示被告今年30歲，佢喺香港出世嘅，佢有六次嘅刑事紀錄，但係就以毒品案嚟講，今次都可以算係第一次嘅。被告人向海關人員就透露佢係有吸食「冰」毒嘅習慣嘅。
被告人呈上咗自己寫嘅一個簡短嘅求情信，佢亦都表示佢係因為經濟壓力，所以係被毒販引誘，因而販毒，佢希望法庭可以畀次機會佢。
被告嘅母親亦都有喺庭上替被告人係求情嘅，佢話佢希望法庭可以輕判被告，因為被告係在一個單親家庭之下長大嘅，佢自己其實就並非係被告嘅生母，但係被告同家人嘅關係良好，亦都有攞錢返屋企。
喺本席嘅詢問之下被告就指出，部分毒品係自用，佢仲話平時一個星期會吸食幾十克。法庭要求向佢澄清，因為如果一個星期幾十克，豈不是一個月會變成係成100到200克左右？被告就解釋話佢就唔係日日食嘅。在作供方面，被告就話佢決定唔上證人台，喺呢個自用嘅問題方面作供。
考慮到第二項控罪係管有，同埋被告係向海關人員好早已經係表白咗話佢自己係有吸食「冰」毒習慣嘅，本席接納喺呢次嘅案件之中，部分毒品係有屬於自用嘅可能性，當然被告話佢一個星期食幾十克嘅呢個份量呢，本席認為有誇大嘅成份。無論如何，雖然第一項控罪嘅份量係超過600克，基於本席接納部分自用嘅呢個講法，基礎嘅份量，即係判刑基礎嘅份量應該會係比較低，係靠近呢個600克嘅呢個分界線。經考慮後，本席決定都會係以600克呢個基準嚟到去評估刑期起點，因此，20年就係第一項控罪嘅刑期起點。
本席已經向被告人解釋過，跨境販毒係法庭加刑嘅因素嚟嘅。被告以往係冇販運毒品嘅紀錄，今次亦都係佢第一次面對咁長時間嘅監禁判刑。經考慮後，本席會就呢個跨境販毒嘅因素只係加刑6個月，希望被告知道呢個已經係一個比較低嘅一個幅度嚟㗎喇。因此，就第一項控罪而言，刑期起點係二十年六個月。雖然案件先前已經係要押後過一次，係嘥咗法庭嘅時間嘅，但係本席都依然係將全數三分一因為認罪而得到嘅扣減係畀被告嘅，因此，第一項控罪嘅結果係十三年八個月。
至於第二項管有嘅控罪，其實法例上，只要係跨境帶毒，已經係構成販毒㗎喇，但係控方只係以呢個管有嘅罪名檢控，本席認為呢個亦都係對被告公平嘅處理嚟嘅。無論如何，本席係會以12個月作為呢一項控罪嘅刑期起點，扣減三分一之後，結果係8個月。
考慮到整體刑期方面，兩項控罪嘅刑期呢，本席係會下令同期執行。被告以往有各類型嘅犯案紀錄，佢已經係入過勞教同埋係教導所，但係佢現年已經係成30歲人，佢亦都有佢屋企人嘅支持，本席認為佢都應該係時候安定落嚟，希望佢可以利用懲教署所提供嘅各種各樣嘅課程同埋訓練，希望佢搵到自己嘅興趣同埋長處，學到一技之長，將來能夠重投社會，重新做人嘅。今次嘅刑期係十三年八個月。
|