HCCC 67/2016
香港特別行政區
高等法院
原訟法庭
刑事案件2016年第67號
----------------
----------------------
判刑 以下內容乃法庭數碼錄音謄本
官：
被告人被控告一項販運危險藥物罪。佢承認控罪，亦都同意控方案情嘅撮要。
簡單嚟講，事件發生喺2015年7月6號，被告喺黃昏時分，想從羅湖管制站進入香港。關員截停咗佢同埋作出搜查，就喺佢嘅隨身物品裡面發現到嗰兩包嘅毒品。
在被拘捕後，被告向關員承認毒品係「冰」毒，佢為咗14,000鈫港元係同意替人從內地帶返嚟香港嘅。之後，被告有參與一個監控遞送嘅行動，但係未能成功拘捕其他人。被告喺錄影會面之中進一步向關員透露咗佢犯案嘅背景同埋細節。
經政府化驗師檢驗之後，涉案嘅毒品係被確認為「冰」毒，份量係1,893克。根據估計，當時嘅零售價值大約係港幣五十六萬九千鈫。
被告今年37歲，離咗婚，有一名兒子同女兒，讀書讀到中三，佢當時聲稱冇職業，主要依靠前夫提供生活費。
在求情時，黃大律師指出，其實被告當時係有工作嘅，佢做嘅係清潔散工，但係入息唔多，佢係希望搵到多啲錢去租屋住，等嗰個仔女嚟探佢嘅時候佢哋有地方係共聚天倫。
被告就有一次賭博嘅紀錄，冇其他同毒品有關嘅刑事定罪紀錄。
黃大律師亦都提出，被告願意參加海關嘅監管送遞行動。雖然係冇實質嘅結果，但係佢真誠想協助海關嘅。
就刑期起點方面，根據毒品嘅數量同埋指引，本席接納二十二年半會係合適嘅水平。加上國際因素之後，刑期起點係上調到24年。被告承認控罪，應該得到三分一嘅扣減。除此之外，本席同意被告願意提供協助，亦都參加咗監控嘅運送，在咁嘅情況下，本席會給予整體接近四成嘅扣減。
最後刑期會係十四年半。