被告陳眞係面對四項控罪。
控罪一至三都係有意圖而傷人罪，違反香港法例第212章《侵害人身罪條例》嘅17（a）條。
控方嘅案情就話喺2019年11月3號，喺太古城中心對出，被告人係非法同惡意傷害三個人，就係溫浩倫、梁碧琪同埋趙家賢，就係意圖令佢哋身體係受嚴重傷害。
被告另外面對一項就係普通襲擊罪。同日，即係同地方，同埋時間，就係違反普通法，同埋可以根據頭先嗰個條例嘅第40條係懲處。
被告襲擊嘅人就係梁瑩瑩。
被告係否認全部控罪。
其實被告就唔否認佢真係有用刀係整傷咗溫浩倫，同埋呢一個梁碧琪，亦都唔否認佢係有咬甩咗趙家賢部分嘅左耳，佢話其實都唔係爭拗話佢有打到梁瑩瑩。辯方個講法話當時，即喺發生事件之前較早嘅當日，佢就飲咗酒，所以事發嘅時候就腦袋一片空白，令到佢就唔知自己做緊乜，亦都唔知自己點解要咁做。佢話佢係冇任何嘅意圖去傷害任何人。
當然，喺審訊之後，因為被告人係被陪審團裁定罪名成立。好明顯，佢呢個咁樣嘅講法，係不受呢個陪審員接納。
講番案情，喺2019年11月3號，當時喺太古城中心，係有一個社會事件。參與嘅人，就喺呢一個太古城中心嘅南橋、北橋中間嗰條橋嗰度，就係手牽手做人鏈，同埋就唱歌咁嘅。又有呢個防暴警察到場，不過後屘好快就離開咗。啲人，即係防暴警察走咗之後，當時喺太古城中心入面嘅人，包括住客，同埋其他啲唔係住客嘅人，都唔高興，話點解呢個太古城中心嗰度畀啲防暴警察入嚟，就要嗰度嘅嗰啲保安員去解釋，做咩嘢畀防暴警察入嚟。
因為有呢一個騷動嘅情況，當時仲係區議員嘅趙家賢先生，就由屋企就去到呢一個太古城中心度，去睇下咩嘢事，去調停。
由閉路電視睇到，當時趙家賢就喺個太古城中心嗰度，作緊調停，成班人圍住佢，喺度講緊嘢，又有呢個保安員嘅時候，就見到被告人喺呢個太古城中心嗰度出現，就離開趙議員嗰班人都相當近。而溫生佢太太梁碧琪，同埋梁碧琪嗰個表姐（梁瑩瑩），同埋梁瑩瑩個細仔，又喺嗰個螢光幕，都見到佢哋當時都係喺呢個太古城中心嗰度出現。佢哋就向住呢一個西邊嗰個出口，即係北座個西邊出口嗰度去緊。
而證據顯示，當時溫生、太太同埋呢個表姐佢哋成班人，其實係去緊食飯。而有一位嘅保安員就陳生，當時就喺呢個西出口嗰度就當值。佢主要嘅工作，其實嗰陣時個閘已經閂咗大部分㗎喇，佢個職責就係唔畀人喺西面嗰個門口係入嚟。當然，啲人可以離開喇。
當溫生、梁碧琪，同埋梁瑩瑩，同埋梁瑩瑩個仔係行過去，即係差唔多都要出去呢一個出口嘅時候，當時就見到被告人其實就喺佢哋後面行。陳生畀口供，就話當時聽到溫生講，就話「做咩嘢畀差人入嚟呀？你想呢度變成新城市廣場咩？」
跟住就，其他呢啲證據，就根據溫生講、梁碧琪，同埋梁瑩瑩講，就話佢哋喺出咗去呢個西出口之後，被告突然間就大聲嗌「光復台灣」。跟住溫生就同被告講，即係用粗口講，問被告「你講乜呀？」跟住，雙方就有呢個言語上嘅爭拗。而好快，被告人就喺佢孭喺個身前面嗰個背囊度，就擝咗把刀出嚟，然後就𠝹向溫生個肚皮嗰度，亦都係曾經插過溫生個背脊。梁碧琪見到佢先生受到呢個襲擊，當然就去阻止被告。佢阻止被告期間，被告就有插埋佢嘅背脊。梁瑩瑩亦都係即係嘗試去阻止呢個被告，當時，佢畀被告係用拳打，又擝佢嘅頭髮。
後來，即係當呢個梁碧琪係受到襲擊之後，佢就走咗去搵呢個即係保安員陳生係求助。與此同時，就有一位高生，佢就係咁啱喺附近經過嘅啫。佢亦都係喺嗰個西出口出緊嚟，佢見到呢件事件，就見到被告人係插溫生，所以佢亦都走番入去呢一個中心入面，係要求人幫助。另外，仲有一位係過路人，就係鄧生。佢就見到被告人係去插溫生，但係佢就睇唔到被告人係點樣插溫生個肚嗰部分。呢位鄧生係報咗警。
趙家賢議員，佢當時就喺嗰個中心入面，仲係調緊㗎嘛，佢聽到呢啲騷動嘅聲音，佢就走出去嗰個中心出面，睇下發生咩嘢事。佢出到去嘅時候，就從嗰啲群眾度知道，被告人係曾經襲擊其他人。於是，佢就問被告人「你做咩嘢打人呀？」被告人當時同趙家賢就話「我冇打人，我打狗。」跟住，呢個趙家賢議員就睇到被告人就用腳去踢（即係𨅝），𨅝向梁瑩瑩個頭，梁瑩瑩當時已經喺地下㗎喇。於是，趙家賢就要求陳生（即係嗰位保安員）就去捉住被告人，因為被告人已經係做出一啲侵犯人嘅事吖嘛。陳生就企圖去捉住被告人，但好快被告人就甩咗身。於是，趙生就去捉住被告人。與此同時，被告人就咬甩咗趙議員嘅左邊嘅外耳。
到最後，其實被告人，從呢啲嘅影片度睇到，佢仲想咬埋趙生嘅右耳，不過就畀人制服咗。結果，就係制服咗被告。當然，就所有嘅傷者都係送咗去醫院度，係接受治療。而喺嗰啲照片度睇到，被告人係畀當時在場嘅人士係毆打，即係俗稱叫做「私了」，嗰個情況。
好喇，關於各個受害人佢哋嘅傷勢嘅情況又點呢？首先講溫生。溫生當時喺入醫院嘅時候，個情緒，即係就好混亂下嘅情緒。而呢個格拉斯哥昏迷指數，最高15度，佢就去到14度。喺上身度，好多嘅裂傷，就包括係左手呢個上臂，同埋個肚嘅前面，同埋佢個背脊嘅上半部，同埋頸嘅部分都有。佢因為都係後屘陷入咗呢個昏迷嘅狀態，所以要接受呢個靜脈注射，同埋要係輸血，就直情要畀埋呢一個morphine畀佢係等佢止痛，亦都要插喉，亦都係要佢縫針，要入去呢一個深切治療部。去到6號（即係11月6號），先至可以係去番呢個普通嘅大房。去到12號（即係11月12號），先至係出院。
溫生出咗院之後，喺2018年嘅11月同12月，都曾經要去覆診。嗰個傷口護理小組就話，佢啲傷口已經都喺12月13號就好番喇。溫生嘅投訴就係，左上肢都仲有麻木同埋呢個刺痛嘅感覺。於是，就安排咗溫生去接受呢一個嘅物理治療，就係去令到佢嘅左上臂係更加嗰個力係強番。咁就冇話呢個肌肉萎縮嘅情況，但係就左上臂就好高度敏感，就好多時係有針刺咁樣嘅感覺。佢就亦都係，即係有時覺得好似有電咁，觸電嘅感覺。佢總共去咗七次係呢一個嘅物理治療嘅情況，就都理想嘅。
而另外，我就係收到一個呢個臨床心理學家嘅報告書，呢位係邱小姐，就即係關於溫生。我唔打算將邱小姐入面所講，全部講晒出嚟。只係講，就話溫生其實係受到雙重嘅創傷。點樣雙重創傷呢？就係首先，就佢自己受到嚴重嘅傷害，同埋佢係親眼睇到佢太太係畀呢個被告人去襲擊。所以，佢係有呢個創傷後遺症，時時喺個腦海入面就事件重演，又失眠，又係經常處於呢個高度戒備嘅狀態，即係求生嘅模式。亦都有，好多時不停咁有啲好侵略性嘅想法，感到好煩躁、憤怒，又高度嘅苦惱，即係喺做嘢又好，社交個環境都係咁。同埋就發覺，即係自己唔得協調。佢基本上係患有呢個受創傷之後嘅後遺症。咁就呢個心理學家建議佢係繼續去接受呢個治療，等佢可以係即係漸漸去復原。
而梁碧琪嗰方面，當時梁碧琪個左邊上背嗰度，係有成五個插傷嘅傷口。就起碼有4個cm咁長，就入醫院，就係去到呢個3號（11月3號）就可以出院。而佢個傷口係要縫針，又佢受到情緒支援嗰方面嘅幫助。Sorry，佢應該6號先至出院。亦都喺佢出咗院之後，就安排佢去見呢個即係臨床心理學家。佢亦都係有呢個情緒上嘅好大嘅波落，即係上落。亦都係話眠得唔好，失眠，就好多時，嗰個事件又試喺佢腦海重現。佢就直情唔敢去呢個太古城嗰個地鐵站添。咁變咗就，譬如，佢搭架地鐵站係人多，或者好多人企喺佢後面，佢就好高度警覺，因為佢好驚又試有人喺後面就襲擊佢。佢亦都唔想睇關於呢件事件嗰啲報道。雖然佢嗰啲傷口已經係好番晒喇，但係有時都仲係覺得有痛。同埋，佢見到佢先生身上嗰啲疤痕，就令到佢成日諗番起當時嗰個襲擊嘅情況。
呢位臨床心理學家鄭小姐就話，梁碧琪都係患有呢個就係創傷後遺症。佢話要集中畀佢有呢個心理輔導，去幫助佢係克服呢個創傷後呢啲嘅經驗，等佢認知自己其實而家面對嗰個情況係點，教一啲技巧畀佢。佢總共就去咗四次，而後屘喺2020年11月，佢就冇再去到。就應該係，應該佢就話最後一次係2021年2月，就再去見咗呢一個嘅臨床心理學家，就話似乎嗰個精神狀況已經好番啲。就佢試過有兩次去太古城，但係都係當時嗰個反應，嗰個經歷就係極度恐慌，心跳、氣促咁樣，仲有呢個肌肉繃緊嘅情況。所以，都要睇番佢即係將來點樣去處理，即係佢呢一方面，即係嗰個技巧，去幫助佢克服呢一個嘅情況。
而趙生，佢當時就係入到去醫院嘅時候，佢覺得就係佢左邊嘅左耳一部分已經係咬咗落嚟。根據趙生講，因為佢係有呢一個糖尿病，所以就唔可以即刻進行呢一個手術，入咗醫院之後。趙生就記得，佢當時畀口供都係咁講，話佢當時就係直情失控咁樣喊，就係去猛話點解咁樣嘅事件會發生喺佢身上。到最後，佢就即係平靜咗落嚟，結果就係手術做咗。最初，雖然就將甩咗出嚟嘅外耳係聯番好，但係因為嗰隻耳都係，唔能夠生存，可以講。咁變咗佢要再做多一次嘅手術，就係移除咗嗰個嘅外耳，就變咗就要有呢個假嘅耳，就安上去嘅。佢話佢嗰個耳仔，就當時就即係非常之敏感，即係掂到嘅時候就好敏感，同埋佢覺得，即係自從呢個事件發生之後，佢去留意嗰啲聲音喺邊個方向度嚟，係有困難。佢用到假耳，但係佢喺庭上都顯示到，因為佢個假耳係唔可以用力。變咗雖然戴眼鏡都仲可以，但係譬如，戴口罩，佢就唔可以戴我哋一般即係鈎喺耳仔後面嘅口罩，佢要戴係綁喺個頭後面嘅口罩，因為嗰個食唔到力。
而根據臨床心理學家林女士講，即係佢就係見趙生嗰位。佢就話因為佢失去咗呢個部分嘅外耳，係永久失去，咁變咗對趙生嚟講，就永世都記得有呢一個嘅襲擊。趙生特別係對於今次嘅事件係好失望，係點解呢？就係因為發生咗事件之後，佢係畀人冤枉，話佢係捏造呢件事件出嚟。佢覺得即係好難過，因為咁嘅事。同埋，喺發生咗呢件事件之後，佢就覺得佢自己集中精神有困難。譬如，以前未發生事之前，佢一日可以做成十二個鐘頭，但係發生咗呢件事之後，佢就唔能夠集中精神，就好多時做個零鐘頭已經冇精神再做。而當然喺審呢件案件同埋到而家都係，趙生係因為涉嫌違反《國安法》，係被還押㗎嘛。佢而家仲係還押中，佢又好感受到呢個壓力，一方面就係兩年前到呢個襲擊，同埋而家係受到還押，咁有好大嘅壓力。除咗呢個冇咗左耳，即係左耳嘅部分，同埋佢係專注力下降，同埋有時係有心跳，又會覺得好驚，係覺得不安。佢都願意係喺獄中係接受呢個心理嘅輔導，嚟增強佢呢個應付壓力嘅能力。呢個基本上就係關於趙生。
到梁瑩瑩喇。梁瑩瑩其實喺發生事嗰日，佢就冇即刻去醫院，因為佢諗住自己冇刀傷吖嘛。佢4號先至去醫院，因為佢發覺即係頭痛，同埋即係個膝頭哥好痛，因為佢當時畀被告人打嘅時候，襲擊，因為畀被告人用個背囊係打佢，同埋佢係曾經好大力咁樣跌落個地下，所以兩個膝頭哥係撞落地下度，所以膝頭哥傷咗。佢終於，佢就入醫院，即係去醫院度睇醫生。當時發覺就係冇骨折，所以即日已經出咗院㗎喇。
梁瑩瑩亦都係有去到睇呢一個臨床心理學家，因為佢都係情緒方面有問題，同埋失眠。喺2020年9月21號，就曾經係去接見呢個心理學家，亦都有兩次係跟進嘅情況。梁瑩瑩就話畀呢位臨床心理學家就係姚（姚小姐），佢話佢好多時就發惡夢，就諗番呢件事件，佢覺得好緊張，好不安。後期，如果佢見到有人係孭住個背囊向佢行，或者係經過佢，佢就好驚㗎喇。佢就自從係發生呢件事之後，就即係盡量唔返去發生事件嘅地方（即係太古城），亦都覺得佢同朋友，或者係同屋企人即係出去呢啲社交情況，佢都係覺得唔係咁開心，即係冇以前咁開心。亦都責怪佢自己，就話即喺呢件事件佢冇去即係幫到佢嘅親戚，令到件事件冇咁嚴重。佢亦都係曾經，即係梁瑩瑩話畀呢個心理學家聽，佢有試過搵私家醫生，係喺2020年嘅4、5月期間，去睇呢個精神科嘅醫生，亦都話佢係有創傷後遺症，建議佢係繼續睇醫生，因為就即係財政上面嘅問題，因為呢個私家醫生，咁就冇繼續去。而根據呢位臨床心理學家講，就係呢位梁瑩瑩亦都係有呢一個創傷後遺症嘅情況出現。就佢畀咗呢個心理嘅教育方面，就係畀佢去調較佢嘅情緒嗰啲技巧，就係幫到佢。
我亦都留意到，喺呢件案件未審之前，其實梁瑩瑩同埋梁碧琪，都係關於話就嚟開審，咁係令到佢哋非常之緊張。但係當然，而家已經係審結喇，佢哋已經畀完晒口供，喺呢一方面，即係佢哋所面對嗰個嘅精神緊張嘅情況，就已經係消失咗㗎喇。
好喇，被告。被告嗰個背景嗰方面，其實被告就喺1970年出世，就喺呢個大陸出世，其實而家就應該係52歲。佢話發生事件嘅時候，應該就49歲。佢係冇案底，即係初犯，可以講。就根據呢啲資料，就話佢有呢個復發性嘅抑鬱症，亦都係有呢個依賴酒精嘅症候群。呢啲係喺3月，即係呢個11月3號之前發生嘅事㗎喇。
關於佢嘅背景嘅詳情，其實都唔需要特別去提喇，即係當然陸資深大律師亦都特別去講番佢個背景。因為其實被告人畀口供嘅時候，都畀咗幾詳細嘅資料，關於佢嘅背景。可以講，就話即係佢點樣喺內地，後屘就去咗呢個夏威夷，初初就喺夏威夷係非法逗留，後屘就成為咗正式嘅公民，然後佢又點樣係從事呢個時裝嘅嗰個職業，而又生意失敗，到最後嚟咗香港。嚟咗香港之後，就冇正式做嘢，不過係靠儲蓄，同埋靠呢一個投資為生，基本上係做家務，好鍾意煮嘢食，呢啲其實都喺嗰個證供度出晒嚟㗎喇。而被告人係有呢一個嘅一個背景，就係酗酒，同埋係有自殘嘅歷史。
而根據呢個精神科同埋心理學家嘅報告書都睇到，就話被告人其實對於佢自己呢個倚賴酒精嘅問題，係冇洞察力。嗰頭入完醫院，又因為佢自殘，又或者係做咗一啲係嚇人嘅嘢，即係譬如，就係話佢好多次佢攞把刀去嚇佢太太，就結果係冇傷害佢太太，揸住把刀嚇佢太太。入完醫院，過咗，出番嚟，又再飲過酒，根本都對自己嗰個嘅問題，係冇呢個洞察力。而精神科同埋心理學家都係話，被告人冇呢個精神病喎，需要佢去入院治療。淨係建議佢係喺呢個出面接受呢個治療，就係一路睇住佢嘅情況就得㗎喇。呢個心理學家就建議，就話被告人係接受呢一個輔導，等佢可以去即係控制自己嗰個啲脾氣嗰方面嘅情況，就話佢再重犯呢一類咁嘅案件嗰個機會都係中等。
陸資深大律師喺最初開始求情嘅時候，都已經代替咗被告人就向呢件事件嘅四位受害人係致以呢個歉意，同埋都不單止係對嗰四個嘅受害人，亦都對佢哋嘅親人係表示呢個歉意。喺求情嘅時候，當然，頭先我都講咗喇，陸資深大律師再講多一次，就關於呢個被告人嘅背景。亦都提埋就係被告個細女係有呢一個自閉症，即係雖然喺證供嘅時候已經講咗，話佢喺香港係同細女同太太住，大女係繼續喺美國做嘢嘅，個大女唔喺香港。呢方面，當時佢畀口供已經講咗㗎喇。而陸資深大律師亦都係特別強調，被告人係喺發生呢件事件之前，係冇案底。仲有，係畀咗一份證書我睇，就係顯示被告人喺事發之前，已經係應承咗即係呢個中文大學，係話佢死之後，就會將佢個遺體，係畀呢個中文大學去做研究。被告人嗰個意願，就因為佢有呢一個抑鬱症嘅情況，就希望呢個研究，即係如果係即係用佢個遺體，可以幫助到研究究竟即係點解會有呢個抑鬱症嗰方面嘅情況，即係對個社會有啲貢獻。
而陸資深大律師亦都係向本席提供咗一宗係上訴庭嘅案件，就係關於喺呢一類，即係我哋叫做係「傷人17」嘅判刑，係嗰個原則係乜嘢，個案件就係叫做陳駿達。根據上訴庭講，就一般嚟講，一般，就呢一類嘅案件，嗰個判刑就會喺3至12年之間。當然，要睇番嗰件案件嘅獨特案情。而嗰個情況特別，亦都可以係超過呢個範圍入面嘅嗰個起點。
而陸資深大律師亦都係提番，喺呢一個案件入面第49段，係提出咗法庭可以考慮嘅嗰啲嘅因素。嗰個表就唔係話即係列晒出嚟㗎喇，但包括啲乜嘢呢？譬如，包括係唔係預謀，即係嗰個佢襲擊呢件事件，傷人呢件事件係咪有預謀；點解襲擊；就嗰個襲擊者喺事發嘅時候，即係佢嗰個目的係乜嘢、佢嗰個精神狀況係點、佢係唔係受到酒精，或者係毒品影響；又譬如，係一個人做吖，定係成班人去襲擊人；用乜嘢武器，用乜嘢嘅力度；就嗰個令到嗰個人受傷嘅程度去到邊度；對嗰個傷者，同埋對嗰啲傷者嘅親人嘅影響有幾大。陸資深大律師要求本席喺考慮個判刑嘅時候，就考慮上述嗰啲嘅原則。
陸大律師佢話，被告人自己就自稱係冇任何政治嘅背景，佢當時係獨自行事，就對事件唔係話有預謀。雖然佢有把刀喺度，但係嗰把刀就唔係話特登帶出去傷人，佢咁啱即係因為佢去行山，係用嗰把刀愛嚟切生果，所以有把刀喺個背囊度。而嗰把刀亦都係普通嘅刀嚟，唔係話啲即係菜刀，咁「盛」。而今次嘅事件，因為佢係同嗰啲傷者係有呢個口頭上嘅爭拗，而進而發展到去傷人。呢個嘅做法，就同佢平時嗰個人，就嗰個人格好唔相似，即係一個好獨特嘅事件。而陸資深大律師亦都係強調，被告人本身係有呢一個抑鬱症，需要食藥，同埋係有呢個即係酗酒嘅情況。
被告人嘅太太、佢個大女，同埋幾個好朋友，全部都寫嚟法庭度，就要求輕判。基本上，都係話被告人就即係平時對人好好嘅，佢唔係一個有暴力對人嘅人，呢件事件亦都係影響到佢，除咗即係被告之外，影響屋企人。因為被告喺呢件事件，就受到好嚴重嘅傷害，都要係要去有呢個手術。而屋企人，亦都係畀人起底，令到太太，同埋喺香港嘅細女就受到好大嘅困擾。仲有，就係要變賣家財，因為畀嗰啲受害人去用民事嘅形式告，所以要賠償畀人。所以，各方面都令到呢個屋企係受到好大嘅困難㗎喇。所以，陸資深大律師要求本席，係喺考慮判刑嘅時候，就係判以呢一個嘅同期執行。
好喇，一個人如果係喺審訊之後，即係公訴書定罪，話係呢個有意圖傷人，係可以判到去終身監禁。就呢項嘅罪行，係冇量刑指引，因為好明顯，傷人可以係比較輕微嘅傷人，亦都可以好嚴重嘅傷人。所以，一定要睇番究竟嗰件事件本身嗰個事實嘅狀況係乜嘢，然後先至可以去決定嗰個刑期。陸資深大律師都好幫助咁樣畀咗呢法庭，係關於呢個陳駿達嗰件案件，就係話就呢個「傷人17」嗰個判刑，係可以考慮啲咩嘢因素。
喺呢件案件，當然我係考慮到被告人係獨自行事。好明顯，當時佢亦都係受酒精影響。我就睇唔到被告人本身，即係抑鬱症，係導致佢去傷人嘅其中一個原因，即係佢個精神狀況本身，我睇唔到係其中一個嘅元素。但係佢酗酒，係嘅，係一個元素。佢自己係獨自行事。同埋，亦都睇到，唔係話一早已經預謀，即係睇到成件事件，都係相當突發。好明顯，係因為大家有言語上嗰個嘅衝突，所以先至引發到呢件事件。被告人去襲擊溫生，同埋襲擊梁碧琪，係用一把好尖銳嘅刀。當時睇落，就係雙方持不同政見喇，雖然被告人就話佢自己冇呢一個政見，但係以當時嘅環境、情況，溫生咁樣同嗰個保安員講，話「你做咩嘢畀啲警察入嚟呀？係咪想呢度變成新城市廣場？」跟住被告人一出去就講嗰個，話「光復台灣」。睇落，就係似乎係因為有不同嘅政見，而令到大家係有呢個口角。
跟住，就當然被告人就係擝咗把刀出嚟，就首先襲擊溫生，然後就襲擊梁碧琪。首先，溫生先。溫生嗰啲傷勢都即係相當嚇人㗎喎。你睇到佢，即係我頭先已經講咗佢當時受嘅傷勢係點樣，要接受咩嘢治療。同埋，佢嗰個創傷後遺症都相當嚴重，令到佢變咗而家就唔能夠好似以前咁樣過番一啲正常嘅生活。
當然，呢個量刑起點係以一個被告人冇案底嚟計㗎嘛。我考慮咗呢件案件嘅所有情況，我就認為7年嘅起點係啱。
好喇，被告人係傷害咗溫生嘅時候，跟住轉身就去傷害佢太太。然後跟住，佢就係插梁碧琪嘅背脊。不過，好彩，即係對梁碧琪嚟講，就好彩。嗰啲傷勢就唔係好似佢先生咁嚴重，所以佢好快都可以出到院。但係始終都要考慮到，梁碧琪係睇住被告人去傷害佢先生吖嘛，然後跟住傷害埋吖嘛。然後，梁碧琪自己亦係有呢一個受到創傷後遺症。佢日常嘅生活亦都係有受到影響，即係譬如話，佢都係唔係幾去到呢個太古城，去啲人多嘅地方又驚。
我考慮晒所有情況，即係當然已經考慮埋被告人係獨自行事、受到酒精影響、唔係預謀，各樣情況，唔再重複。我就認為三年半係適合。
好喇，到趙生。趙議員，當時佢係議員。佢雖然就冇受到刀傷，但係被告人佢咬甩咗趙生部分嘅耳仔，呢一樣嘢，係一個非常之野蠻嘅行動。真係令人難以置信，老實講。而當時趙生嗰個情緒異常激動，同埋即係喺未有做到手術之前，咪話即係喊到失聲咁樣「盛」，係完全可以理解。因為我諗，一個人好難去想像自己嘅耳仔會畀人咬甩咗。好不幸，雖然已經試過，係話將佢即係被咬甩咗出嚟嘅左耳係縫番好，但係結果即係唔成功，即係趙議員仲要接受多一次嘅手術，嚟將嗰個壞死咗嘅左耳外邊上面係移除。咁即係變咗佢有兩次嘅手術，但係結果都係冇用。佢要戴呢個假耳，佢呢個假耳，頭先講咗，就唔能夠係話食力。所以佢就，即係我哋經歷呢一個Covid呢段時間，即係個個要戴口罩，佢連戴普通嗰個耳仔嘅，即係嗰啲口罩都戴唔到。咁你可想而知，對佢嘅影響幾大吖。
我考慮咗，當然喇，佢當時受呢個傷，同埋喺觀感上，佢冇咁部分嘅耳仔，佢要戴呢一個假耳，係亦都令佢做到呢一個不便。我認為喺佢呢個情況，係同呢一個溫生嘅情況，分別唔係咁大。所以，我都係用呢個7年作為量刑起點。
好喇，最後嗰一項就係普通毆打，或者普通襲擊。被告人就係拳打腳踢，可以講，對梁瑩瑩。就用嗰個背囊係捹咁打佢，令到佢，即係佢跌咗落地下，又擝佢頭髮，跌咗落地下，都仲要踢佢。佢好彩就唔係受到任何嚴重嘅傷害，但係佢一樣係有受到呢一個創傷後遺症。因為佢係睇住被告人係當時去傷害佢個表妹、表妹夫，完全明白佢當時嗰個嘅感受會係點。
我認為考慮晒所有情況，就係6個月嘅量刑起點，就係啱㗎喇。
咁就變咗呢四項控罪個量刑起點就係7年、三年半、7年、6個月。加埋晒就應該係18年。啱唔啱？18年，7加7加三年半，再加6個月，18年。
被告人唔認罪，當然就唔可以得認罪後嘅扣減。不過，我都考慮到被告人自己就真係畀人私了。受到即係相當嚴重嘅傷害，當時都打得好犀利下。而傷害嘅程度，就係入咗醫院度，不單止係要做手術，仲要係即係喺個腦度開有個道管，即係情況都相當嚴重。除咗個被告人自己係受到咁嚴重嘅傷害之外，佢屋企人亦都係受到呢個逼害，即係頭先都講咗話即係起底，嗰啲。
喺咁嘅情況之下，我會考慮就係畀被告人一個扣減。當然，我會考慮埋呢個整體刑期，我會畀個扣減佢。而被告人另一方面，就成個屋企，就好明顯係受到呢一個財政上嘅損失，因為嗰幾名嘅受害人係以民事嘅形式去告被告人，因為要賠。但係因為呢一個需要賣屋去賠錢，係完全係因為被告人去傷害嗰啲受害人而引致，所以我就唔覺得呢一方面係一個求情嘅陳詞，話令到嗰個刑期係要扣減。
好喇，考慮呢一個整體刑期。我就認為考慮晒全部嘅情況，15年嘅監禁刑期就係適合。呢個15年，去晒呢四項嘅控罪，就已經係足夠去反映到被告人嗰個罪責。我會畀被告人多6個月嘅扣減，呢個6個月，就係話佢自己受到好嚴重嘅傷害，同埋屋企人受到嗰啲嘅傷害。所以，變咗就係十四年半，就係個監禁。
點樣達致十四年半呢個監禁呢？第一項控罪7年；第二項控罪係三年半，同期執行，變咗係7年；第三項嘅控罪，嗰7年，就要同第一、第二係分期執行，即係變咗而家就14年；然後，第四項控罪又係分期執行，6個月。變咗加埋晒，就係十四年半。明白喇嘛？第一項控罪7年；第二項控罪三年半，兩個係同期執行，所以都係7年；然後第三項控罪嗰個7年，就同頭先講嗰7年係分期執行，所以變咗14年；然後再第四項控罪嗰6個月，又分期執行。所以加埋就十四年六個月，十四年半。明白喇？應該冇計錯嘅。