香港特別行政區 訴 李中泰

HCCC368/2009

香港特別行政區

高等法院

原訟法庭

刑事案件2009年第368號

----------------

----------------

----------------------------------

判刑
以下內容乃法庭數碼錄音謄本

----------------------------------

官： 被告承認以下兩罪，控罪一，使用他人身分證；控罪二，製造危險藥物，而家由我懲處。

          情節方面，就係警員喺案發單位外面埋伏，趁被告出嚟嗰時一湧而入，結果發現廚房內有可卡因嘅製造工具同製成品。如果淨以原材料計，就有244.07克可卡因鹽酸鹽。製成品，即係適合蒸發吸食嘅可卡因鹼（俗稱「霹靂可卡因」）就有148.19克。呢個大致就係控罪二嘅情況。

          至於控罪一，其實就係指被告喺警方突擊前四日以別人遺失嘅身分證將涉案單位租下。

          背景方面。被告今年剛滿28歲，香港出生及受教育至小六程度，被捕前任職運輸散工，此外，佢未婚，有十二項前科，全部與毒品無關。最嚴重嗰次，獲判刑7年，罪名係傷人。

          求情時，律師指被告係因為想搵快錢供養父親，所以先犯下大錯，而家好有悔意云云，不過，呢啲好明顯都唔係有咩嘢有效嘅求情理由。

          觀乎警方喺涉案單位搵到嘅可卡因，無論係用於咩嘢嘅吸食方法都好，總共就有392.26克，再加上本案係製毒，唔係普通嘅販運，我認為量刑基準最少都要去到17年。被告認罪，可以得到三分一嘅扣減，就下調至十一年零四個月，呢個就係控罪二嘅刑期。

          至於控罪一，我會依例判處被告入獄15個月，不過，由於數罪並罰唔能夠過重呢個原則，我會下令控罪一嘅刑期同控罪二嘅同期。換言之，被告需要為本案總共入獄十一年零四個月。