香港特別行政區 訴 傅嘉政Chris

HCCC360/2009

香港特別行政區

高等法院

原訟法庭

刑事案件2009年第360號

----------------

----------------

------------------------------------

判刑
以下內容乃法庭數碼錄音謄本

------------------------------------

官：　　　　被告傅嘉政被控一項販運危險藥物罪，違反香港法例134章《危險藥物條例》第4（1）（a）同埋（3）條，被告喺本席嘅席前承認控罪。

案情顯示，喺案發嗰日有一隊警方嘅人員執行反毒品行動，就喺油塘中心附近。當時警察睇到被告人你從一輛私家車度落車，拎住一個黑色嘅膠袋。你將個膠袋擠咗喺個車尾箱度，跟住就返番去個車度就開車。於是警方跟隨你嗰架私家車。當架私家車後屘去到藍田嘅時候停低咗，警察見到被告你落咗車，就喺嗰個車尾箱度拎咗個黑色膠袋出嚟。跟住同另一個男人，就本來坐咗喺架車前座嘅乘客位，落咗車同你一齊就行。當時你仲係住呢個黑色嘅袋，神色就好緊張，周圍咁望。咁警察就跟住你。後屘就喺滙景花園嗰個平台度將你同埋另外嗰個男子截停咗。搜你嘅時候就發覺嗰個袋入面其實係有一啲嘅氯胺酮。而當時就即刻拉被告你，話係販運危險藥物。咁喺警誡之下你就承認係幫其他人帶呢啲毒品嘅。

咁後屘喺差館度，就進行呢一個錄影會面。咁當時被告人你就解釋咗係點樣用500鈫呢個報酬收就未收到添就應承幫人哋去帶呢個氯胺酮。就係由一個人度（即係暫稱佢叫做「甲」），就帶到去畀另外一個人。即係其實喺甲度係攞錢，然後喺乙度買咗，就應該係畀返甲嘅。咁而後屘警方亦都喺被告人你屋企就搵到有個電子磅，同埋有啲係可再封嘅膠袋。咁你話當時就係嗰個甲留低喺你屋企嘅。嗰啲份量嗰方面，經過檢驗之後，就發覺係一啲嘅粉狀嘅物質係有247.70克嘅，咁而其中含有係氯胺酮嘅成份就係200.09克，市值嗰方面大概係29,000鈫。

被告你嘅背景─而家21歲，案發嘅時候就係20歲；初犯，屋企係獨子。屋企本來個家庭就都唔錯，都算可以講係富裕，但係後來就爸爸媽媽生意失敗，咁經濟嗰方面就冇以前咁好嘅。被告你本身亦都寫咗一封英文信，本來係畀另外一位法官嘅，因為初初我諗你唔知道呢件案件會係由我處理。咁你喺嗰封信件入面都顯示到，你即係干犯咗而家呢一個控罪，就係感到非常之後悔，同埋亦都係答應以後唔會再係干犯法律，就希望要求呢個法庭盡量輕判你。而被告你嘅雙親亦都係有寫信畀本席，佢哋都係非常之自責，就話自己喺以前被告你成長嘅時候，因為過於掛住要處理自己嘅生意業務係疏於管教。佢哋兩位亦都係要求本席盡量輕判你。另外被告你以前讀書嗰間學校嘅校長都寫咗一封求情信係畀本席。咁校長就話你讀書嘅時候嗰個學業成績就平平，但係校長都係話希望本席係畀機會一個年輕人有重新做人嘅機會。

咁你嘅代表陳大律師喺求情嘅時候，要求本席考慮到你喺呢件事件嚟講係一個初犯者，亦都係要求本席喺呢個有量刑指引嗰個範疇之內去盡量輕判你。

販運危險藥物係非常之嚴重嘅罪行，一旦呢個罪犯係被拘捕，定罪之後係需要受到嚴懲。咁就氯胺酮嚟講係有呢一個量刑嘅指引，案例就係一件叫做許守城嘅案件。喺嗰件案件，上訴庭頒下嘅量刑指引就係如果一個犯人係販運50至到300克嘅氯胺酮，嗰個量刑嘅起點係喺6年至9年之間。

被告你為咗賺快錢，甘願幫人做呢一個「帶家」，將啲毒品係由一個人帶到去另外一個人。喺本席嘅席前需要將一個咁年輕嘅人判監，本席認為係一件非常之遺憾嘅事。但係本席亦都必需要履行本席嘅職責，係將一個恰當嘅刑期係判予畀呢個被告人。當然，本席呢一個做法，喺判刑嘅時候亦都明白到被告人父母佢哋嘅感受，咁但係始終本席都仍然係要盡忠職守。

呢件係一件非常之嚴重嘅案件，被告人本身先前係冇案底，喺呢方面就唔係太大嘅幫助，咁不過始終我係量刑嘅時候，我都考慮到被告你係初犯者。喺考慮咗呢個案件嘅案情事實所涉及嘅毒品份量（即係200克嘅氯胺酮）同埋被告人本身嗰個個人嘅背景，包括先前係冇案底呢一樣，本席就認為一個量刑起點7年係恰當嘅。咁被告你喺本席席前係坦白承認控罪，本席係會畀你呢個三分之一嘅刑期扣減。除咗被告認罪呢一方面之外，本席就睇唔到有其他嘅理由係再將呢個刑期係遞減，咁所以就呢一個販運危險藥物嘅罪名，被告係需要坐監四年八個月。