|
HCCC 304/2017
香港特別行政區
高等法院
原訟法庭
刑事案件2017年第304號
----------------
----------------
| 出席人士： |
律政司檢控官鄭先赬先生，代表香港特別行政區 |
|
張秀群小姐，由法律援助署委派的黃律師事務所延聘，代表被告人 |
| 控罪： |
販運危險藥物（Trafficking in a dangerous drug） |
------------------------------------------
判刑
以下內容乃法庭數碼錄音謄本
------------------------------------------
官：
被告人喺裁判官席前承認咗一項販運危險藥物罪，被交付高等法院原訟法庭判處。本席喺判處嘅時候考慮咗案件嘅整體情況，包括案件嘅性質同埋情節、所涉危險藥物嘅種類同埋份量、被告人嘅個人背景，同埋辯方大律師嘅求情陳詞。
案情可以簡述如下：警方喺被告人嘅住所外面嘅街上面截停咗被告人，之後用被告人身上嘅鎖匙進入被告人嘅住所。搜屋嘅時候喺雜物房發現三個膠袋，裡面共載有內含41.58克可卡因嘅共48.22克固體嘅膠袋、一把刀、一支膠鎖匙、一張錫紙、五個空膠袋、三個電子磅，同埋一本寫有一啲中文字，同埋姓名，旁邊寫明款項嘅記事簿。喺警誡之下，被告人承認相關嘅「可樂」係佢自己嘅。
後嚟警方喺儲物房發現一個行李箱，裡面有裝住可卡因嘅多個膠袋。喺被告人屋企裡面共有搵到內含2,575.58克可卡因嘅一共3,263.22克固體，當時嘅零售市值估計為二百九十多萬元。
之後被告人喺警誡之下承認全部「可樂」係屬於佢自己嘅。喺一個錄影會面之中，被告人話佢照其他人嘅吩咐，將涉案嘅可卡因帶咗番屋企，如果成功運送全部可卡因嘅話，可以得到3,000元嘅報酬。
被告人現年25歲，1992年從內地嚟到香港。佢有中四學業程度，曾經任職運輸工人。被告人已婚，妻子係家庭主婦，佢哋育有一名五歲嘅女兒，同埋一名兩歲嘅兒子。被告人並非初犯，2014年9月因為一項管有危險藥物罪被判感化。
辯方張大律師喺求情嘅時候指出，被告人喺案發嘅時候已經失業半年，佢靠儲蓄供養一家，並冇領取綜援。當儲蓄用盡嘅時候，被告人想快啲搵到錢，就被一名結識咗唔係好耐嘅朋友慫恿，為咗3,000元嘅酬勞答應運毒。被告人喺案中並非擔任重要嘅角色，只係聽從指示，而且佢仲未收到任何酬勞。張大律師指出被告人已經十分後悔，亦都意識到佢嘅行為對家庭影響深遠，願意承擔責任。被告人已經下定決心改過自新，並且打算喺服刑期間好好裝備自己，等將來可以好好照顧家庭同埋服務社會。張大律師亦都指出被告人嘅家人並冇放棄到被告人，喺家人支持之下係有助被告人重新做人。張大律師亦都請法庭顧及被告人係第一次干犯販運危險藥物罪。
辯方呈遞咗被告人家人嘅四封求情信，喺妻子嘅信中，妻子指出被告人係一名盡責嘅父親，因為失業欠下咗100,000元嘅債項，喺巨大嘅經濟壓力之下先至起咗一時嘅貪念。子女十分懷念父親，佢自己亦都會堅持等待被告人重回家庭。
被告人嘅母親指出，因為家庭嘅經濟能力有限，父母對被告人嘅管教不足，令到被告人受唔到誘惑，因而自責。事件亦都令到佢自己嘅精神健康惡化，佢亦都指出被告人係一名好嘅父親。被告人嘅兩名弟弟亦都指出被告人係關懷家人嘅，雖然犯咗錯，希望法庭輕判。
被告人販運嘅危險藥物係可卡因，份量係內含2,575.58克可卡因嘅共3,263.22克固體，根據AG v Chang Chen Liu Sa（[1995] 1 HKCLR 69）呢宗案例，法庭喺判處嘅時候應該考慮英皇訴劉德明（[1990] 2 HKLR 370）一案裡面所提嘅量刑指引。考慮咗本案嘅整體情況，本席睇唔到有咩理由要偏離上述嘅量刑指引。根據劉德明案，販運呢一種毒品純含量如果超過600克嘅話，應該考慮超過20年嘅監禁刑期。喺之後嘅Abdallah案（CACC 304/2008），上訴法庭指出如果所涉嘅毒品純含量係1,200克至到4,000克嘅話，應該考慮判處23至26年嘅監禁。考慮咗整體情況，本席會採用二十四年三個月作為量刑基準，被告人喺裁判法院已經承認控罪，應該得到三分一嘅刑期扣減。
考慮咗案件嘅整體情況，包括辯方大律師嘅求情陳詞，本席認為三分一係被告人喺本案應得嘅刑期扣減幅度。
被告人請起立，根據上述理由，本席判你就本案監禁十六年兩個月。
|