HCCC 90/2009
HCCC90/2009
香港特別行政區
高等法院
原訟法庭
刑事案件2009年第90號
----------------
訴
黃偉強
-----------------------------------
判刑 以下內容乃法庭數碼錄音謄本
官： 被告人係被控一項搶劫罪，被告係承認咗控罪，亦都同意有關嘅案情。
簡單嚟講，控方個案情係指出話，喺案發當日，有幾名劫匪就喺上午嘅時間，以送貨嚟到作為藉口，進入咗第一證人嘅公司，咁劫匪就用刀架住證人嘅頸，聲稱搶劫，亦都將佢哋夫婦兩人係綑綁，同埋用衣物冚頭、塞口，咁劫匪後嚟從公司裡面，取去價值共約百幾萬嘅電子產品。基於現場嘅血跡，警方最後追查到係被告人為劫匪嘅其中一人。控方第二證人後嚟亦都認出被告係出手綑綁用外套冚住佢個頭，同埋用手巾塞佢口嘅人。
被告今年48歲㗎喇，佢有兩次嘅刑事紀錄，對上一次係喺93年，係相同類型嘅紀錄。代表被告嘅吳大律師喺求情嘅時間係講述咗被告人嘅背景，咁佢父親係過咗身，母親已經係77嘅高齡，仲有心臟病同埋血壓高。被告喺內地係結咗婚，吳大律師強調，被告今次嘅角色只係卒仔，咁佢而家就係非常之後悔嘅。被告人自己亦都寫咗信向法庭表白，佢係因為經濟問題，先至再次犯事，希望法庭畀機會佢，同埋相信佢真係後悔。
被告喺1993年已經干犯過同類嘅案件，更被判監8年，可惜佢並冇係話痛定思痛，出監之後又再犯案，如果唔係警方鍥而不捨嘅追查，被告其實喺今次亦都係就會逍遙法外。正如被告講，佢已經係差唔多五十歲人喇，計埋今次，佢就差唔多會有十分一嘅人身喺監度度過，咁佢係唔係真心悔改呢？係佢真係必須要自己諗清楚嘅事情，但係令人最痛心或者可惜嘅，就係佢年紀老邁嘅媽媽仲要再次面對佢兒子入獄呢個咁嘅不幸事件。
就呢件事件睇嚟，其實都係話有組織、有預謀嘅一個搶劫行為，亦都涉及百幾萬嘅貨品。從茆廣生一案所提及嘅因素考慮，本案被告係有用武力對待受害人，用刀架頸，又將佢哋綑綁，咁今次起碼亦都係有三人犯案。本席經考慮之後，會以七年半作為刑期基準，本席認為，呢一個其實已經係一個較低嘅刑期起點。
被告承認控罪，咁本席會依例將刑期減免三分之一，但除此之外，亦都考慮到警方信件嘅內容，本席唔認為再有其他有效嘅求情因素，因此刑期係5年。