香港特別行政區 訴 黎凱儀

HCCC 517/2013

香港特別行政區

高等法院

原訟法庭

刑事案件2013年第517號

----------------

----------------------

判刑

以下內容乃法庭數碼錄音謄本

----------------------

官：　

  本案案情簡單，被告人黎凱儀喺去年5月初嘅時候被所謂「朋友」嘅人羅致係免費去澳洲旅行，以及有20,000元嘅酬勞替人先係所謂運稀土，佢當時係20歲，受到該所謂「朋友」嘅人，同埋同自己同居嘅男朋友嘅慫恿而同意參加，其後喺報團之後，接頭嘅人就話畀佢聽係運毒品，但係就話已經係報咗團，所以冇得唔去。

  咁佢當時係欠咗財務公司大約係30,000鈫嘅，佢喺去澳洲係為咗賺20,000鈫，咁就可以喺財務上對佢有好大嘅幫助。咁佢返去就話畀佢同居男朋友聽，話係去運毒品，同居嘅男朋友就叫佢去，照去，咁而介紹佢去嘅朋友亦都慫恿佢去，個計劃就係同一個劉姓嘅男子假扮情侶去參加澳洲七天嘅旅行團。其後去旅行當日，佢係收到一隻行李篋，放咗佢自己嘅衣物入去之後就去咗機場，而海關係發現佢嘅行李篋裡面係有暗格，內藏「冰」毒，就係而家佢被控嗰個「冰」毒個份量係1.96克嘅--個「冰」毒係1.96公斤嘅晶狀嘅物體，而內含係1.94公斤嘅「冰」毒嘅。咁該同行嘅男子嘅行李篋亦都係搜到有暗格，同埋係內藏相同大約咁嘅份量嘅「冰」毒嘅。

  咁佢係本案嘅被告人，喺本案開始嘅時候已經承認咗控罪，並且喺案中係作供指證該同行嘅男人。陪審團聽咗所有本案嘅證供之後，裁決該同行嘅男人無罪釋放，但係嗰個理由並非係一定係黎凱儀畀嘅證供係唔真確嘅。

  根據律政司訴程國雄一案，嗰個案嘅彙編就喺[1991] 2 HKLR 125，販運超過600克「冰」毒，判刑就係由18年監禁開始嘅。可以參照其他案件，好似係HKSAR v Vhemy AxelSupardi，係[2000] HKCU 426，嗰個係一個國際嘅運毒者，涉及係2,087.25克嘅「冰」毒，判刑嘅起點係24年監禁。第二件案件就係HKSAR v Mak Wing Cheung and another，係[2006] HKCU 1937頁，串謀販運4,769克嘅「冰」毒，起點係25年。第三，較近期嘅HKSAR v 黎勇毅 and another，係[2010] HKCU 815，販運近1,000克嘅「冰」毒，起點係21年。

 程國雄案嘅判刑指引，只對販運600克以下嘅「冰」毒作出實質嘅指引，超過600克嘅就凈係話由18年監禁做起點，本案涉及嘅「冰」毒係1.94公斤，咁就冇明文嘅指引話應該超過18年監禁多少嘅。本席亦都參考咗HKSAR v Abdallah Anwar Abbas（[2009] 2 HKC 197），喺該案上訴法庭係隨著R v 劉德明 and others（[1990] 2 HKLR 370）嘅案件嘅販運海洛英嘅判刑指引係從600克起，將販運600克嘅海洛英嘅判刑起點伸延到係15,000克嘅，即係15公斤嘅。咁嗰件上訴庭嘅案例就指出，佢將600克嘅判刑由20年監禁嘅起點伸延如下：一，600克至1,200克就係20至23年監禁。第二，1,200克至4,000克就係23至26年監禁。4,000克到15,000克就係26年至30年監禁。而超過15,000克就由判刑者酌情判處。該案亦都指出國際販毒嘅情況係屬加刑因素，就唔包括喺上述嘅判刑起點之中，而法庭需加以考慮嘅。

  代表被告人嘅劉大律師向本庭交出一個檔案夾，中間有求情嘅文件，求情嘅信，同埋仲有案例。佢係援引蔡倩儀嗰個案例，咁蔡倩儀嗰個案例就係CACC 27/2014，就係2014年7月17日嘅判決嚟嘅，即是係個鬆啲月前嘅判決嚟嘅。咁嗰個就係牽涉1.73公斤嘅「冰」毒，咁亦都係運去澳洲嘅，有呢個國際嘅元素。咁法庭係採用量刑嘅起點就21年監禁，而就亦都提到係如果有協助當局而畀證據嘅，係可以減刑喇係50個per cent，作50個per cent嘅扣減。咁嗰件案件係引用咗Z v HKSAR呢一件案件嘅，呢件案件就彙編喺[2007] 10 HKCFAR第183頁。其中嘅第23段就咁講，如果係有協助當局嘅被告人，一般嘅扣減就係40個per cent，咁呢個扣減就係協助而冇作供去指證其他人嘅，咁亦有啲案例就係話咁嘅情況之下就扣減40至45個per cent，但係如果係嗰個被告人唔只話係提供資料畀有關當局，而且係喺法庭作供畀真確而實質嘅證據嘅，咁上訴法庭以前亦都係畀過扣減係50個per cent，即是一半嘅扣減嘅。咁呢件案例喺頭先蔡倩儀嘅案例就有提過，而亦都喺姬錫康及其他人嗰件案例喇，嗰件案例就係CACC 145/2011嘅案例，亦都係2014年1月6號判決嘅案例。咁上訴法庭喺呢件案例嗰度第64段，就話雖然被告人唔需要作供，喺嗰件案件度唔需要作供，但係個原因就係因為佢要指證嘅人已經認罪，咁照樣法庭係畀咗50個per cent嘅扣減畀佢嘅。

  因為呢啲案例，劉大律師替被告人求情喇，就懇求法庭係畀50個per cent扣減畀被告人。喺本案嘅情況之下，運「冰」毒去澳洲明顯係需要加入國際販運呢一個加刑嘅因素嘅。考慮咗上述所有嘅案例，同埋呢個加刑因素之後，仲要考慮本案所有嘅周遭環境，包括被告人犯案嘅時候係20歲，係未夠21歲嘅，特別佢係喺證供度，佢畀口供嘅時候，你睇到佢係特別無知嘅。佢係覺得當時畀人告知話係運毒嘅時候，係覺得勢成騎虎，呢個我都感受得到。同埋佢係受到同居男友嘅不良影響而去犯案。根據佢大律師所呈遞嘅求情文件，可以見到佢係真心悔過，有佢媽媽，佢公公同埋婆婆嚟法庭支持佢。

  喺所有呢啲環境之下，本席認為適當嘅判刑基準就係23年監禁，佢坦然認罪，而且又作供指證被告人劉振泉，雖然係唔成功，但係證據、佢畀嘅證供喇，係控方接納為真確而有實質嘅，本席認為應該畀被告人係50個per cent扣減，所以佢應該被處嘅刑罰就係十一年半嘅監禁。咁就判處被告人係十一年六個月嘅監禁。