被告承認一項販運危險藥物罪，違反香港法例第134章《危險藥物條例》第4（1）（a）及（3）條，以及一項管有危險藥物罪，違反上述法例第8（1）（a）及（2）條。
案情指，德國海關喺法蘭克福機場偵測到涉案郵包內有懷疑可卡因嘅毒品，佢哋同香港海關聯手展開國際行動，監控該郵包。郵包抵港後，中央郵局按收件人嘅地址送達通知卡，要求收件人到郵局領取郵包，期間曾經有一名操英語嘅人士要求郵局將郵包送到收件地址。海關曾經採取數次監控派遞郵包，但係由於地址係一間賓館，而賓館嘅負責人又稱冇收件人名字嘅人喺該處住宿，派遞不成功。期後，有三名人士致電香港郵政查詢該郵包，表示收件人嘅名係本案被告嘅名。後來，海關與一名男子安排交收郵包，被告喺約定嘅時間前往中間道郵局領取郵包，並且出示郵包收件人嘅塞拉利昂護照副本以及授權書，被告領取郵包之後被捕。警誡下，佢稱佢收取咗他人金錢代領郵包。
關員向被告進行搜身期間，喺被告右腳嘅襪中搜出一包「冰」毒，被告指，該包「冰」係供佢自己服用嘅。被告承認知道郵包內係有危險藥物，而佢正在販運有關嘅危險藥物。被告喺警誡下表示，佢係誤信朋友向佢提供「冰」毒，並且按照朋友嘅吩咐，指示去收取掛號郵包以及朋友提供10,000鈫畀佢作為外快，佢先至會干犯本案嘅，而該郵包內係有一棋盤，棋盤底層有涉案嘅兩袋毒品。
毒品經過化驗之後，證實為內含0.39公斤可卡因嘅0.49公斤粉末，而被告喺襪入面所管有嘅係0.11克甲基苯丙胺鹽酸鹽嘅0.11克晶狀固體，所有撿獲嘅毒品零售值大約五十一萬多元。
大律師求情嘅時候表示，被告現年34歲，過往並冇刑事紀錄，佢係家中幼子，與八十多歲嘅母親同住，而案發嘅時候係一名壽司師傅，有穩定收入。大律師話，本案屬於一宗悲劇，被告本無案底，一向奉公守法，卻因為想賺取區區10,000鈫快錢而干犯嚴重控罪，要面對長時間嘅監禁。被告已經第一時間認罪，以及向海關清楚交代事件嘅始末以及涉案同黨，但係可惜關姓男子已經聞風而遁，人去樓空。大律師希望本席能夠予以一個最低嘅起刑點，好讓被告早日獲釋，改過自新，同家人重聚。
本席喺量刑嘅時候考慮咗本案嘅案情、有關毒品嘅種類、有關嘅量到指引、被告認罪、過往並冇案底，以及考慮咗大律師嘅求情，亦都閱讀咗佢嘅家人聯署所寫嘅求情信。根據案例，販運可卡因兩百至到四百克，起刑點12至15年。本案涉及國際性嘅因素，根據Abdallah一案清楚指出，如果有關嘅可卡因毒品超過1公斤，加刑係不少於兩年。本案嘅可卡因係0.39公斤，本席認為將加刑計算在內，適當嘅起刑點係十五年九個月；至於第二項控罪，適當嘅起刑點係12個月監禁。由於被告認罪，本席予以三分之一嘅量刑扣減，判刑如下：
第一項控罪係十年半；第二項控罪係8個月嘅監禁。考慮咗量刑整體性，下令兩項控罪同期執行，總刑期係十年半。