被告人喺裁判官嘅席前已經認罪，同埋承認案情之後，交付嚟高院嘅原訟法庭判刑，今朝被告人喺本席席前亦都係再重申佢係認罪，亦都再一次承認咗案情。
被告人承認嘅案情就顯示，喺案發嗰日，被告人就畀差人睇到佢離開喺竹園邨一個單位─竹園邨就喺黃大仙。當時佢形跡可疑，就畀差人截停;跟住差人帶咗佢返到去嗰個單位度去搜查。搜查嘅時候，就喺佢屋企個房一個木櫃入面，搵到有十三個可以再封口嘅膠袋，後屘驗過之後就發覺係共有776.34克氯胺酮嘅936.17克混合物，同埋仲有八十個係空嘅可以再封口嘅膠袋，仲有一個電子磅添。咁係拉咗個被告，就同埋喺警誡之下，被告就承認話因為冇錢，咁幫人運呢個氯胺酮。後來，差人就同個被告人有個錄影會面，喺個錄影會面，被告人就畀咗一啲嘅詳情，就話喺個酒吧嗰度就遇咗個人，花名叫「巨人」，咁呢個「巨人」就係話畀1,000鈫呢個被告人，被告人就係幫佢賣呢啲氯胺酮；後屘就係喺某個地方，同一個佢唔識嘅男人見面，攞咗四包氯胺酮返屋企。返到屋企之後，佢就將其中一包就再分開做九包細包，咁分咗之後都未賣到，就已經係畀差人拉咗。
被告人嗰個背景同埋求情陳詞，被告人而家係19歲，就唔係冇案底，已經喺2004年因為偷嘢有一次案底，嗰次被告人被判感化14個月。跟住就喺2008年有一次藏有或者管有危險藥物，嗰次就去咗更生中心。最後一次就係傷人罪，就係今年嘅5月，嗰次就直情送咗去教導所喇。
喺求情嘅時候，被告人你嘅代表律師蘇律師就話畀本席知，你對於今次干犯咗呢個罪行已經非常之嘅後悔，亦都同警方通力合作，將你所知道有關呢個「巨人」嘅資料話晒畀警方知。不過唔好彩，到而家都冇消息話，即係你嗰啲資料係令到佢哋拉到「巨人」咁，就未有嘅。被告人你亦都係透過你嘅律師話畀警方知，隨時你都係好願意去協助警方，畀更多嘅資料畀佢哋偵緝案件。咁而蘇律師亦都話畀我聽，你點解會係咁等錢使呢？因為你媽媽嗰個醫療嘅狀況係有呢個胃癌，不過就冇任何嘅醫生報告去支持你呢一個講法。
被告人你自己亦都寫咗封信畀我，信嘅內容基本上就係話你係非常之後悔，亦都知道自己做錯咗嘢，就都係願意係承擔嗰個後果，接受判刑。咁亦都好後悔點解喺當初做呢樣嘢之前唔諗清楚個後果呢？不過而家都已經後悔莫及，咁就要求本席係盡量輕判被告人你，等被告人你可以早日出嚟同屋企人係再團聚。
咁喺上訴庭一件叫做許守城嘅案件已經係頒下咗判刑嘅指引，就氯胺酮嗰個量刑起點要喺邊一個範疇，咁因為今次被告人你所牽涉嘅氯胺酮係去到776.34克，所以就喺600至1,000克呢一個嘅範疇。咁而600至1,000克，根據頭先所講嗰個指引，嗰個量刑起點係12至14年。
咁喺今次呢件案件，當然除咗776.34克呢一個嘅份量之外，我仲要考慮埋其他嘅情況。咁我考慮到你就唔係話呢個集團嘅主謀或者主腦，不過另一方面，你又唔係凈係幫人帶咁簡單喎，即係你都可以講話即係俗啲講「小拆家」，因為你拎咗返去嗰四包，其中一包你拆開做九包，然後先至會去賣畀人，相信結果你賣唔成，咁即係你參與程度多過就咁幫人帶一啲嘢。不過呢件案件就唔涉及國際性，同埋亦都睇唔到呢件案件係話牽涉到16歲以下嗰啲好年輕嘅人，所以我會考慮咗呢幾方面嘅情況。而喺你自己嘅背景嗰方面，我又要考慮埋你唔係初犯，仲要有一次係同毒品有關嘅案底添。當然，我亦都明白到嗰次係管有毒品，唔係有相同販運毒品嘅前科，而嗰次亦都好明顯就因為你年紀輕，所以就係判咗你去個更生中心嘅啫。
我考慮晒頭先所講嗰啲所有嘅情況、案情，同埋你嘅背景之後，我都係認為一個12年嘅量刑起點係恰當㗎喇。被告人你係話有畀到呢一個幫助畀警方喇，即係話關於「巨人」嗰方面，頭先已經講咗喇，即係唔好彩，你畀咗啲資料，警方都唔能夠係話去拉到呢個「巨人」，定係點樣，所以喺判刑呢一方面，我就係唔可以考慮話你已經係實質上畀咗協助畀警方。變咗成件案唯一嘅求情理由就係你認罪。咁你喺咁早嘅時候已經認罪，當然我係會畀你一般嘅三分之一嘅刑期扣減。咁以12年為量刑起點，減咗三分一之後，判刑就係8年。