陳卓業，你喺初級偵訊嘅時候，喺裁判法院承認咗一項販運危險藥物罪嘅，亦都同意咗一個案情嘅摘要，因此，你係被轉介到高等法院原訟法庭作判刑嘅。
喺你第一次喺本席面前出現嘅時候，就本席發現嗰個控罪裡面係有一個手民之誤嘅，就係話喺欽州街。咁呢一個地方應該就係錯誤地擺咗喺呢個控罪嘅詳情裡面，明顯地，嗰個係一個手民之誤喇，同埋當時代表你嘅大律師亦都對於呢一樣嘢係冇反對，因此，嗰條控罪嘅詳情被修訂，就係刪除咗「欽州街」嗰啲嘅字嘅。由於有個咁嘅更改個控罪，所以就再同你聽取過答辯，咁你亦都有係承認咗嗰條控罪嘅。
案情其實好簡單，就係話2022年7月19號嘅下午，海關人員喺秀茂坪進行呢個反毒品嘅行動。大概喺兩點四十分嘅時候，睇見你喺秀茂坪曉光街近住呢個埃索油站嘅對面個垃圾桶嗰度徘徊。跟住，其後見到你攞起咗喺垃圾桶旁邊一個啡色嘅紙袋，跟住上咗一架的士。海關人員就尾隨嗰架的士。
大概喺3點08分左右喇，架的士去到呢個葵涌圳邊街停車，你就帶同啡色袋就落咗車。海關人員行近你，向你表露身分。你即時掉咗嗰個紙袋，同埋亦都有一個激烈嘅反抗，試圖逃走。最終，你畀海關人員制服咗同埋拘捕。喺你反抗期間，兩位關員分別都有一啲嘅損傷嘅。一位關員個左手有紅腫喇，雙膝亦都有擦傷，另外一位就左手食指同埋雙膝有擦傷嘅，而你抌咗嗰個啡色嘅袋亦都有一個撕破嘅痕跡。
海關人員跟住搜你嘅身喇，就發現你有現金港幣100元同埋一個iPhone。再搜查個紙袋，發現個紙袋入面有三個比較大啲可再封口嘅膠袋。而呢三個膠袋裡面一共載有46個可以再封口嘅小膠袋，呢啲小膠袋裡面載住總含量就係945.6克嘅固體，裡面係有745.8克可卡因。毒品嘅估計市值係大概969,240元。
喺現場警誡之下，你表示嗰個袋裡面所裝嘅毒品係屬於其他人嘅。你亦都承認膠袋裡面所裝住嘅固體係可卡因。你向海關人員表示，有人會致電通知你如何處理嗰啲物品，而你事後會收到6,000元嘅報酬。但係你唔知道來電者嘅電話號碼，當時你仍然喺度等待緊來電。海關帶你返去你嘅屋企喇，喺葵涌嘅石蔭邨，咁喺屋企係冇發現任何可疑嘅物品。
你喺2004年9月21日出世，即係而家接近20歲。犯事嘅時候，你係踏入將會係18歲，讀書只係讀到中二。冇讀書之後，你冇特別嘅工作，終日都係喺屋企渡過。喺今次拘捕你之前，你係同屋企人（即係包括你媽媽同埋你個哥哥）就住喺石蔭邨嗰度，爸爸已經離開咗屋企超過十年。冇讀書之後，你冇搵一份工作去支持你自己嘅生活費，你係倚賴你媽媽畀你嘅零花錢。
喺你寫畀法庭嘅求情信裡面，你有提及媽媽嘅工作唔能夠畀你足夠嘅零用錢，所以就想搵快錢。而搵快錢嘅時候，當時有人介紹咗份工作畀你做，就係帶毒品，做佢哋嘅跑腿。咁你就話你當時無知，唔知毒品嘅禍害，所以毅然就做咗呢個毒販嘅跑腿。
你信中所述嘅，我可以接受，喺你第一次犯事，即係未夠16歲嘅時候。你係喺2020年10月27日被裁定一項販運危險藥物罪成。根據嗰個案件嗰個編號，我相信個案件係2019年干犯，即係當時你係16歲或者未夠16歲添，或者啱啱過咗16歲。姑勿論如何，都係一個非常之年幼嘅時候干犯個罪行，因此，我係可以接受你喺求情信所講無知，想搵快錢，就毅然應承咗做呢個毒品拆家嘅跑腿。我亦都相信當時由於你嘅年紀，同埋當時你冇案底，所以法庭喺該次係對你非常之寬大處理，因為嗰次只係判你守感化令24個月。
上訴法庭已經講過好多次，除非係好年幼，否則嘅話，就有個錯誤嘅訊息傳遞咗出去，就係話年輕人犯販運危險藥物，一般判刑都不會重。雖然如此，該次嘅法庭仍然輕判你，只係判你接受感化24個月。可惜，你冇珍惜呢個機會。更甚者，你喺感化令仍然生效期間，當你仍然接受緊感化官嘅輔導嘅時候，你干犯咗本案，因此，我有困難接受你喺干犯本案嘅時候，仍然係無知，仍然係唔知道干犯咗販運危險藥物，面對嘅判刑係會頗長。我完全唔理解到，喺干犯本案嘅時候，你已經接受咗感化超過一年半，你唔單止冇學好，仲干犯同樣嘅罪行。我肯定相信當時嘅法庭係亦都有叮囑過你，販運危險藥物係非常嚴重嘅罪行，一經定罪，刑期係非常之長。明顯地，你係因為冇錢用而鋌而再走險。
根據上訴庭嘅指引Abdallah Anwar Abbas（上訴庭案件2008年第304號），600克至1.2公斤嘅海洛英，刑期係20至23年。喺另外一宗案，上訴庭喺AG對Pedro Nel Rojas [1994] 2 HKCLR 69，上訴庭有講可卡因嘅刑期嘅判刑，海洛英嘅判刑係適用。因此，我哋睇緊嘅就係，今次嘅毒品涉及745克嘅可卡因，我哋睇緊嘅刑期係20至23年。
你喺現場同海關講你係一個托運人，你自己畀本席嘅求情信亦都述及你係一個跑腿。喺冇相反嘅證券下，我接受你嘅刑責喺此案裡面為最低層次嘅運送員。但係我亦都要考慮涉案嘅毒品已被分為46個小包，呢個係增加咗呢一次嘅罪行嘅嚴重性。
犯案嘅時候只係得18歲，其實唔係特別年幼，而且你已經接受咗一年半多嘅感化監管，唔可能仲係一個心智未成熟。你有同類嘅案底，不但喺法庭對你寬大處理後冇學乖，反而喺感化令仍然生效嘅時候干犯咗同樣嘅罪行。抱歉，呢個係一個加刑嘅因素。
考慮過你喺呢一件案件裡面嘅罪責，同埋毒品嘅份量，我以21年為量刑嘅起點。你不但有販運危險藥物嘅前科，更於感化令有效期干犯本案，刑期向上調到22年。除卻你認罪之外，我睇唔到有其他可以輕判你嘅理由。我會畀你三分之一嘅扣減，刑期下調為十四年零八個月。
最後，我考慮十四年零八個月對於你一個而家20歲，仲係年青嘅人，是否喺顧及罪行嘅嚴重性同埋你個人嘅背景後係一個公平、公正嘅判刑。雖然你仍然係好年青，但係顧及罪行嘅嚴重性同埋你嘅紀錄，尤其是，再給予任何嘅扣減會發出一個錯誤嘅訊息畀社會，同埋亦都唔足夠反映案件嘅嚴重性，因此，我最終決定判你監禁十四年零八個月。