被告人林靖強原本係被控三項控罪，控罪一同控罪二都係企圖搶劫罪，違反香港法例第210章《盜竊罪條例》第10（1）、（2）條，同埋第200章嘅《刑事罪行條例》第159G條，而第三項控罪係企圖猥褻侵犯罪，違反香港法例嘅第200章《刑事罪行條例》第122（1）條同埋係159G條。
被告人承認咗第一同第二項控罪，但係就否認第三項控罪。經過被告人你承認咗案情之後 - 即係就第一、第二項控罪承認咗案情之後，本席正式裁定你罪名成立。而就第三項控罪，在控方要求之下，本席將控罪留喺法庭檔案，冇法庭嘅批准係唔可以再起訴被告人你。
咁睇番你承認咗嘅案情喇。第一項控罪就發生喺2010年嘅9月24號，咁當時就有一名年輕女子喇，姓楊嘅，咁佢上去即係一個樓宇，叫做金鳳樓嘅，金鳳樓喺黃大仙嘅。咁當時佢就掛住講電話，打手提電話，就冇為意到其實就有人跟緊佢嘅。咁佢一路上咗樓喇，咁就去到即係開嗰個鐵閘㗎喇，咁就預備開門咁嘅時候，就即係入屋喇，咁有個男子就突然間喺後面就係用雙手揞捂住佢個口，咁楊小姐就好驚喇，咁就係大聲叫救命，咁呢個男子就即刻放開手，就落樓走咗喇。咁當時呢位楊小姐只係得望--即係擸一擸眼，望到呢個即係侵犯佢嘅人嘅啫，咁即刻報咗警喇。咁呢個楊小姐喺呢件事件，就冇身體受到傷害，亦都冇任何財物嘅損失。
咁第二項控罪喇，就係幾個月後，喺2011年嘅1月25號，咁當時有個年輕嘅學生，仲著住校服嘅，呢個女仔，咁當時佢係搭地鐵喇，就搭完地鐵之後，就要搭架綠巴，專線小巴係返屋企嘅。咁佢唔知道原來就離開咗黃大仙地鐵站，已經一路畀人跟喇。咁佢後屘就去到黃大仙樂仁樓嗰度，就入嗰個樓宇，就入，咁就係有個男人就跟住佢入去喇喎。咁佢就出，喺3樓出咗喇，亦都冇留意到其實嗰個人就一路跟住佢，重出埋添。咁呢一個男子就突然間就用雙手，就喺後面捂住佢個口，仲話「打劫」。咁呢個男人仲企圖將呢個Y拉向後樓梯嗰橛，咁仲同佢講，叫佢唔好喐。咁Y就好驚喇，就係好強烈咁去掙扎。咁呢個男人繼續係咁將佢擝向後樓梯。因為Y就驚呢個男人都唔知係咪想去到後樓梯度想強姦佢喇，咁所以就咬咗呢一個男人嘅手指尾 - 左手指指尾 - 咬咗一下。咁因為當時呢個男人就住個膠袋嘅，咁呢個男人畀佢咬咗個手指之後，就摑咗佢一巴，摑咗呢個Y一巴，咁跟住就走咗喇。咁就留低咗個膠袋喺度喇喎。咁個膠袋入面，後屘發覺原來係有啲電線，同埋有啲濕紙巾，即係紙巾嘅。咁Y當時就梗係好驚喇，同埋亦都好混亂喇。咁佢睇到嗰個男人留低嗰個袋上面就有啲血跡喎，咁佢自己冇流血吖嘛，咁佢就諗呢啲血梗係頭先佢咬咗隻手指嗰個人㗎喇，於是就報咗警。咁警方就調查呢兩件案件喇。
咁樣警方調查，其中一樣嘢幫到警方，就係喺樓宇即係唔同嘅地方有啲閉路電視嘅，咁閉路電視就影到嗰個侵犯人個樣喇。咁警方最後就搵到被告你喇，咁就去拉你喇。咁拉你嗰陣時，就係其實係拉你嘅第二項控罪先，咁拉你嘅時候就警誡咗你喇，咁你就話--即係個反應就係話「我凈係想搶佢嘢，同埋㧬咗佢一下啫」咁，咁跟住係有安排到正式嘅認人手續，咁Y喺一個認人手續度係認到被告你出嚟嘅。咁被告後屘你就係承認咗，喺一個錄影會面紀錄度承認咗，關於第二項控罪嘅案情喇。咁亦都話其實你係真係一路咁跟住佢㗎喇，即係由黃大仙地鐵站出嚟已經跟住佢喇，咁亦都話就係有用到「打劫」呢兩個字嘅，同埋亦都係已經同意咗係話Y有咬到你喇。
咁而警方就再繼續調查呢件案件，調查呢件事件，就係關於楊小姐嗰件喇。咁被告你亦都承認，話當時就係你去打劫楊小姐嘅。雖然你都唔記得個日子喇，咁你亦都同意喇，因為畀番啲閉路電視影到嗰啲照片你睇，話嗰個係你嚟㗎喇。換句話講，你係向警方承認咗，你亦都係干犯咗第一項控罪喇。咁呢個就係你承認咗嘅案情嚟。
咁背景方面喇，而家你就23歲，唔係初犯㗎喇喎。嚟法庭，除咗呢次之外，已經有兩次嘅 - 你以前。咁呢兩次加埋就有五次案底嘅。2004年就有兩項係普通毆打罪，就畀法官判咗要接受感化24個月，咁嗰陣時都好細啫。2004應該都係14歲喥。咁到咗2006年，你就係嗰次就一項搶劫、一項企圖搶劫同埋一項係猥褻侵犯，即係非禮，咁呢三個其實加埋加埋，你總共係要坐5年監嘅，係高等法院判嘅。咁我就睇番，想知道點解嗰次--即係應該嗰陣時你係16歲喥嘅 - 都要坐咁耐監呢？咁根據控方畀我嘅資料，就上次嘅打劫罪同埋呢一個非禮即猥褻侵犯，同埋企圖搶劫，案情都係比今次更加嚴重嘅，咁所以就係判刑咁重。
咁讀書方面就讀到中四，就從來未試過做過嘢嘅，即係未正式就過業嘅。根據代表你嘅鄧大律師話畀我聽，你喺舊年--即係2009年，2009年嘅9月就坐監出嚟喇，出咗嚟之後，曾經就試過話想--即係可以重歸正途喇，咁就去讀過電腦課程嘅。咁就結果好明顯，就係冇用喇，因為你都繼續係干犯而家嗰個控罪。咁鄧律師就話畀我聽，你已經非常之後悔，干犯咗而家呢兩項嘅控罪，同埋亦都係同警方通力合作，亦都有悔意嘅，亦都將你向媽媽道歉嗰個信件畀我睇到，你就叫媽咪話唔好再嬲你喇，就知道自己對唔住媽媽。咁當然我亦都知道，根據呢個背景嗰方面，你係來自單親家庭喇，爸爸根本喺你未出世嘅時候已經離棄咗你媽媽，咁你從來都未見過爸爸，基本上就係呢個你嘅背景喇。
咁而鄧大律師亦都將有關係搶劫案，但係冇用到武器，一啲嘅案例係交畀本席睇，亦都非常之詳盡，用書面嘅形式提及到呢件案件，即係而家嗰兩項罪行，有啲乜嘢獨特嘅地方、有啲咩嘢相同嘅地方、有啲咩嘢唔同嘅地方，同埋同另外以前上訴法庭處理嘅案件有啲乜嘢唔同嘅地方。我唔打算係再重複喇，基本上鄧律師就係話呢兩宗嘅控罪分別嚟睇都好喇，都唔係話以冇用到武器係最差嗰挺，咁所以應該喺判--用一個量刑起點，就唔使用到最盡嘅4年。基本上就係鄧律師嗰個陳詞喇。
咁而鄧律師最倚賴嘅係一宗叫做邱國桐（譯音）嘅案件，即係嗰宗案件就係講到如果係4年，都已經係唔用武器嚟講去到頂點㗎喇。即係基本上就話你嗰件未去到頂點喇。
咁睇番今次呢件嘅案件喇。無可否認，兩宗嘅控罪都係有啲相同嘅地方，即係都話被告你係單獨行事喇、被告你就係專揀就咩嘢呢？揀個係單獨嘅女子，仲要年輕嘅，咁單獨女子喇，就跟人上樓喇 - 行樓梯又好、搭又好 - 都係跟人上樓喇。根本都可以講話喺呢兩個即係獨行嘅女子屋企門口去襲擊佢㗎喇，唔係大街大巷嘅。咁又襲擊嘅方法就係喺背後，突然間用雙手捂住人哋個口喇，即係突襲喇，可以講，阻住人哋，等人哋唔可以出聲嗌喇。咁你都冇用到武器嘅。咁而喺Y嗰件，即係第二項控罪就多咗嗰個情節，就係想拉人哋--即係拉緊，拉人哋去後樓梯，咁就不過終於拉唔成。咁而兩次都係唔成功，即係嗰個搶劫都係得唔到任何嘅財物。
咁好明顯，因為係冇用到武器喇，所以上訴庭就使用咗武器嚟打劫嘅茆廣生案例，喺呢件案件就唔適用喇。咁另外上訴庭喺一宗叫做丁超（譯音）嘅案件亦都係咁講嘅，即係話你如果係冇用到武器，就唔應該用茆廣生呢件案件嚟作為考慮起點。
咁正如鄧大律師代表你嘅時候，其實都承認就呢件案件喺--即係兩宗案件，某程度上都有一啲侵犯私人嘅地方喇，因為唔係大街大巷吖嘛。雖然未入到屋，但係都上咗樓，去到人哋屋企門口喇，咁嗰度都係一個私人樓宇嘅地方喇。另外就兩個嘅受害人都係受到驚嚇喇，畀你咁樣喺後面咁樣去捂住佢個口，咁就嚇親佢哋喇。咁而喺Y嗰件案件嚟講，仲要係想拉佢去後樓梯，咁佢要掙扎，咬咗被告你，你仲摑佢一巴，咁就有用到暴力喇，即係比起第一宗多咗。不過都唔係話好嚴重嘅暴力，即係摑一巴，即係唔算係話好嚴重嘅暴力。另一方面，就兩件案件，都唔係話喺啲半夜三更，凌晨冇乜人嘅時候發生嘅，都唔係嘅。仲有就係你係獨行行事喇，頭先已經講咗喇。同埋你亦都係即係唔成功，攞唔到財物嘅。
咁好喇，睇番第一項控罪喇，咁當時就真係上咗樓㗎喇，咁就喺楊小姐屋企門口，咁你當時的確係好明顯，就係搵都搵到個單身嘅嚟跟佢上屋，個目的就係去打劫佢喇，有啲預謀、計劃嘅行事嚟喇。咁當然喇，最後你就係唔成功，咁好彩楊女士亦都係冇受到傷，亦都冇係即係財物嘅損失。咁所以喺呢一個案件，又冇用到武器喇，咁就肯定就唔係話用--即係喺搶劫案冇用武器最差嗰件喇，梗係唔係喇，即係以咁樣嘅案情就唔係嘅。咁但係另一方面，又要考慮到你啱啱坐完監出嚟冇幾耐㗎咋喎，其實即係一年喥，咁你犯係咩嘢呢，犯同樣㗎喎，就係又搶劫、企圖行劫，同埋非禮喇，嗰次有。咁你啱啱出咗嚟先嗰一年，即係要再犯喇，咁所以喺考慮嗰個量刑起點嘅時候，我就要考慮埋嗰--呢一點，就要將嗰個量刑起點係稍為提高，因為即係似乎你坐完監出嚟，都唔係幾得到嗰個教訓，明白未？
咁考慮晒呢個頭先所講嗰啲案情喇，同埋你係即係罰完都出嚟再犯過同樣嘅罪行，呢一點我就認為兩年半嘅量刑起點係啱嘅。
好喇，第二項控罪喇。第二項控罪咁就第一項控罪9月犯咗之後幾個月，其實四個月喥㗎咋喎，因為1月你去再犯吖嘛。咁就呢個啱啱先至做完，唔成功又再嚟過喇，咁就令到個案件更嚴重喇。咁今次就揀擇一個仲係學生女添，又係獨行㗎喎。即係人哋一個人，咁你就去搵佢埋手喇，仲要跟咗一段時間㗎喎。你喺地鐵站出嚟，上埋綠巴，咁跟到人哋返屋企喎，咁就更加係有計劃行事，咁就嚴重咗喇，比起第一項。咁仲有呢，你除咗係喺後面用雙手捂住佢個口之外，仲扯佢去後樓梯，咁喺咁嘅情況之下，即係好令人明白個女仔就梗係驚喇，「做咩嘢擝我去後樓梯啫」，係咪先？咁所以佢驚，就以為你係想去非禮--即係想強姦佢喇，呢個係佢嘅相信喇，所以佢就去咬你，咁而好好彩，如果佢唔係咬到你，咬到你流血嘅話，佢未必會甩到身，即係你未必咁快會放手，所以喺佢嚟講，佢係好彩，呢件事件。咁而到最後，就係你摑咗佢一巴，之後你就去走喇。咁不過你走之餘，急過頭，就漏低個袋，咁就留低呢啲線索，所以就有你嗰啲血跡喇，即係留咗喺上面，同埋當然亦都有呢一個閉路電視係影到你喇。咁好明顯，第二項控罪嗰個案情就梗係比第一項嚴重咗喇，即係除咗頭先已經講埋話你完嗰5年監出嚟，都唔係話學咗再重新做人嘅，即係一年啫，咁就再犯過，已經係嚴重咗喇，仲要四個月前犯咗一次唔成功，仲未識得係悔改嘅，再嚟過。
咁考慮咗第二項控罪全部呢啲嘅案情之後，我就認為個恰當量刑起點係三年半。
咁你就真係同警方合作，亦都係喺我面前係承認控罪，所以我會畀你呢一個足足嘅三分之一刑期扣減嘅。咁第一項控罪，畀埋個刑期扣減之後，嗰個判刑就應該係20個月，因為兩年半就30個月喇，減咗三分一，就係20個月。第二項控罪就係呢個三年半喇，減咗呢個三分之一，就係兩年四個月。
咁好喇，兩項控罪其實就真係完全分開㗎嘛，兩個唔同嘅受害人、兩個唔同嘅日子、唔同地方，咁就應該就係分期執行㗎嘛，即係喺呢個理論上、原則上就冇理由同期執行㗎嘛，咁但係有另外一個睇法，就係要睇個量刑，即係總刑期喇，即係唔係話就咁樣加埋，咁坐晒佢，咁唔係嘅，要睇一個總刑期，就係恰當嘅刑期先得嘅，咁我要再計一計呢個總刑期喇。
咁我睇過晒之後，我就認為個總刑期3年就啱喇，即係話呢個3年就代表咗喺呢件案件你嗰個罪責。咁如果掉番轉去睇，如果用3年嚟睇，就等同係話我將呢兩件案件夾埋一齊，畀一個總量刑嘅起點，就係呢個四年半喇。即係掉番轉睇，如果我唔係逐單逐單睇嘅話，兩件案加埋，一個總嘅量刑起點係以四年半，畀咗你三分之一刑期扣減，就係3年。掉轉睇啫，我唔係用嗰個方法，不過即係畀多一個睇法，可以咁樣講法都啱㗎喇。
咁點樣去達至到3年呢一個嘅結果呢？咁我就認為就係將第二項控罪嘅刑期，其中16個月同嗰20個月係分開執行，咁夾埋咪36個月囉，咁就會去到達至咗我3年呢一個嘅目的喇。
咁正式嘅判刑喇喎。第一項控罪就係20個月。第一個控罪係20個月，第二項控罪係28個月，即係兩年四個月，16個月就係同20個月分開執行，咁即係夾埋晒係36個月，36個月等於3年。